بيىل ء«وز ارمانىڭدى قوس!» تاقىرىبىمەن كورەرمەنگە ۇسىنىلعان بالالار شوۋ – كورسەتىلىمىن تاماشالاۋعا الەمنىڭ 16 ەلىنەن ءسان الەمىنىڭ وزىق ماماندارى مەن بەلگىلى فەشن-سايتتار مەن جۋرنالداردىڭ نەگىزىن قالاۋشىلار, ءسان اپتالىعىن ۇيىمداستىرۋشىلارى جانە ديزاينەرلەر ارنايى كەلدى. قۇرمەتتى قوناقتاردىڭ قاتارىندا اقش, كانادا جانە ەۋروپا اۋماعىندا تارالىپ, 150 ميلليون ءسان سايتتارىنىڭ ىشىندە وندىققا كىرەتىن FNL Network تەلەۆيزيالىق ونلاين-جۋرنالىنىڭ نەگىزىن قالاۋشى جانە پروديۋسەرى Rocco Leo Gaglioti, «Gazetta Italia» فەشن-جۋرنالىنىڭ رەداكتورى Sebastiano Giorgi جانە Mad Mood Milan Fashion Week پرەزيدەنتى Marianna Miceli بار.
قازاقتىڭ شاپانىن جامىلىپ كەلگەن FNL Network تەلەۆيزيالىق ونلاين-جۋرنالىنىڭ نەگىزىن قالاۋشى Rocco Leo Gaglioti قازاقستاندىق ديزاينەرلەردىڭ جاس بولا تۇرا, اسا تالانتتى ەكەنىنە تاڭداسىنىڭ ءبىلدىردى: «بىرىنشىدەن ۇلتتىق كيىمدەرىڭىزدىڭ وتە ادەمى ەكەنىن ايتا كەتەيىن. ماعان ۇستىمدەگى شاپاندى وسى ەلگە كەلگەنىمدە قازاقستاندىق "باۋىرىم" ايدارحان سىيلادى. مەن ونىڭ كرەاتيۆتىلىگىنە ءتانتى بولدىم. ول ءوز جۇمىستارى ارقىلى ماعان قازاقستاننىڭ ءسان الەمىن تانىستىردى. وسىنداي تاعى بىرنەشە تالانتتى قازاقستاندىق ديزاينەرلەردى بىلەمىن. سوندىقتان مەن ءۇشىن «Kazakhstan Kids Fashion Show-2018» شوۋ - كورسەتىلىمىنە قاتىسۋ ماڭىزدى بولدى.»
قازاقستاننىڭ ءتۇرلى ايماعىنان كەلگەن ديزاينەرلەر قاتارىندا ايدارحان قاليەۆ, زارينا اكشۋلاكوۆا, مايا جۋمانبەكوۆا, سابينا جانزاكوۆا جانە ۆەرونيكا يۆانچەنكو بولدى. ال شەتەلدىك ديزاينەرلەردەن Christophe Guillarme (پاريج, فرانتسيا), Indra Kaffemanaite (ميلان, يتاليا), ەكاتەرينا يۆانكوۆانىڭ(فلورەنتسيا, يتاليا) توپتامالارى كورسەتىلدى.
شوۋ-كورسەتىلىمدە 14 جاسار قازاقستاندىق ديزاينەر ۆەرونيكا يۆانچەنكو العاش رەت ءوز توپتاماسىن ۇسىندى:
«بۇل مەنىڭ ديزاينەر رەتىندەگى العاشقى جۇمىسىم. نەگىزى ءسان الەمىندە 10 جاسىمنان بەرى مودەل رەتىندە تانىلدىم. ماعان ديزاينەر بولۋعا شابىت بەرگەن «باربي» مۋلتفيلمدەرىندەگى ء«سان» ۇيلەرى ەدى. سول كەزدەن ءوزىمنىڭ ۇلكەن ءسان ءۇيىمنىڭ بولعانىن قالادىم. بۇگىن «روني» اتتى العاشقى كوللەكتسيامدى تانىستىردىم. ەرەكشەلىگى, مۇندا كوشە ستيلىندەگى, ەركىن, جاستارعا ىڭعايلى, زاماناۋي توپتامالار عانا بولدى.»
جاس تالانت ۆەرونيكا بولاشاعىن دا ءسان الەمىمەن بايلانىستىرۋدى جوسپارلايدى جانە الەمنىڭ تۇكپىر-تۇكىپىرىنەن بالالار قاتىسا الاتىن «Kazakhstan Kids Fashion Show-2018» سەكىلدى ۇلكەن شوۋلاردى ۇيىمداستىرامىن دەيدى.
بيىل كورسەتىلىمگە 60-تان استام مودەل قاتىستى, ولار 6 كاستينگتەن ءوتىپ, ىرىكتەلگەن. قاتىسۋشىلار قاتارىندا ەلىمىزگە تانىمال تەلەجۇرگىزۋشىلەر دانا نۇرجىگىتتىڭ, اراي ءالىمحاننىڭ جانە جۇلدىز ابدۋكاريموۆانىڭ ۇلى بار.
جاس انا, تەلەجۇرگىزۋشى اراي ءالىمحاننىڭ ايتۋىنشا:
«مۇنداي اۋقىمدى جوبالار بالالاردىڭ تۇلعالىق قابىلەتىن ارتتىرۋدا زور ماڭىزعا يە. سەبەبى كىشكەنتاي كەزىنەن بەلسەندى بولعان بالالار ەشقاشان ىنجىق, ۇيالشاق بولمايدى. كەرىسىنشە, ولار ۇنەمى كوشباسشى بولۋعا, جان-جاقتى بولۋعا تىرىسادى. قازىر انۋار 5 جاستا, سوندىقتان نە ءۇشىن, قانداي جوباعا قاتىسىپ جاتقانىن جاقسى بىلەدى. جوبا اياسىنداعى فوتوكورمەدە ۇلىم يسپاندىق, الەمدىك چەمپيون رافاەل نادالدىڭ رولىندە بولدى. ءبىر مىسال, وسىدان كەيىن انۋاردىڭ تەننيسكە دەگەن قىزىعۋشىلىعى ارتىپ, «مەن دە چەمپيون بولامىن» دەي باستادى. مۇنداي جوبالاردى مەن ءبىر جاعىنان, تاربيەلىك پروتسەسس دەپ ەسەپتەيمىن.»
ال تەلەۆيزيادا ءوزىنىڭ «دارا جولى» بار دانا نۇرجىگىت:
ء«الىمنىڭ ءبيدى جاقسى كورەتىنىن, ساحنادان قورىقپايتىنىن وسى جوبادان كەيىن اڭعاردىم. فوتوكورمەدە بريتاندىق سۇيىكتى ءانشىم دجوردج مايكلدىڭ وبرازىندا بولدى. بولاشاقتا دا ۇلىم ونەر سالاسىندا بولادى دەپ ويلايمىن» - دەسە,
دانا حانىمنىڭ ۇلى, ءالىم بولاشاقتا ەلىنە قىزمەت ەتكىسى كەلەتىن نيەتىن ءبىلدىردى: «مەن بولاشاقتا پرەزيدەنتتىڭ كومەكشىسى بولسام دەيمىن»
ايتا كەتەتىن جاعداي, الەمنىڭ تانىمال تۇلعالارىنىڭ كەيپىنە ەنگەن قاتىسۋشىلار فوتوكورمەسى ەۋروپالىق وداقپەن ىنتىماقتاستىق اياسىنداعى ءىرى جوبا جانە بۇل ۇيىمداستىرۋشىلار ۋادە ەتكەن توسىنسىيلاردىڭ ءبىرى ەدى.
حالىقارالىق دەڭگەيدەگى مۇنداي شارالار ەلىمىزدىڭ تۋريزم سالاسىن دامىتۋعا دا زور ۇلەس قوسادى.
قارلىعاش قۇرامىس,
«ەگەمەن قازاقستان»
