«ارىستان ايبات» دەگەن اتپەن جارىق كورگەن جيناقتاعى تۋىندىلاردى قىرعىز تىلىنە قىرعىزستان جازۋشىلار وداعىنىڭ توراعاسى, قىرعىزستاننىڭ كورنەكتى مەملەكەت جانە قوعام قايراتكەرى, حالىق اقىنى اكبار رىسقۇلوۆ اۋدارعان. اقىننىڭ بارىمىزگە تانىس "مەن كىم؟" شىعارماسىنىڭ قىرعىز تىلىندەگى نۇسقاسى بىلاي باستالادى:
«ارىستانمىن, ايباتىما كيم چىدار؟
جولبورسمۋن, ماگا كارشى كيم تۋرار؟
كوكتو - بۋلۋت, جەردە - جەلمين كۇۇلوگون,
جەر ەركەسي - جەلدين ءجونۇن كيم سۋرار؟»
كىتاپقا ماعجاننىڭ 80-گە جۋىق ولەڭى مەن «باتىر بايان» جانە «قورقىت بابا» داستاندارى ەنگىزىلگەن.
ەستەرىڭىزگە سالا كەتەيىك, تۇركى اكادەمياسى ماعجان جۇماباەۆتىڭ ولەڭدەرىن 9 تىلگە اۋدارىپ - جيناقتاپ, ءبىر كىتاپ قىلىپ باسىپ شىعارعان بولاتىن. ال, مامىر ايىندا وزبەكستاندا اقىننىڭ وزبەك تىلىنە اۋدارىپ, جەكە جيناق رەتىندە «تانلانعان اسارلار» دەگەن اتپەن جارىق كورگەن كىتابىنىڭ تۇساۋكەسەرى ءوتتى.
سونىمەن قاتار ءتۇبى ءبىر تۇركى جۇرتىنىڭ ازاتتىعى مەن بىرلىگىن جىرلاعان, تۇركىستاننىڭ تۇتاستىعىن اڭساپ وتكەن ايبىندى اقىننىڭ تۋعانىنا بيىل 125 جىل تولىپ وتىر. وسىعان وراي TWESCO 2018 جىلدى «ماعجان جىلى» دەپ جاريالادى.
اكادەميانىڭ ماعجان جۇماباەۆ شىعارماشىلىعىنىڭ تۇركى جۇرتىنا, الەمگە تانىستىرۋ باعىتىندا اتقارعان ەڭبەگى زور. بىرتۋعان xالىقتى ماعجان جىرلارى جاقىنداستىرا تۇسەتىنىنە سەنىم مول.
قارلىعاش قۇرامىس,
«ەگەمەن قازاقستان»
