جيىن بارىسىندا رىمعالي نۇرعاليدىڭ رۋحاني ءىنىسى, اقىن, س.سەيفۋللين مۋزەيىنىڭ ديرەكتورى نەسىپبەك ايت ۇلى ىنىلىك ءىلتيپاتىن ءبىلدىرىپ, عالىمنىڭ عيبراتتى عۇمىرى جايلى ەستەلىگىمەن ءبولىسىپ, ۇستازدىق بولمىسىنان بولەك, اعالىق قامقورلىعىنىڭ بيىك ەكەنىن جەتكىزدى.
«رىمعالي اعانىڭ ۇيىندەگى سىرماققا اۋناپ وسكەن باۋىرلارىنىڭ ءبىرى مەنمىن. ول كىسى وتكەن عاسىردىڭ ەكىنشى جارتىسى, حح عاسىردىڭ باسىنداعى قازاق ادەبيەتىنىڭ ۇلكەن تۇلعاسى. ونىڭ كىتاپتارى, اسىرەسە دراماتۋرگيا جونىندەگى ەڭبەكتەرى, ادەبي سىندارى, باسقا دا شىعارمالارى قازاق ادەبيەتىندە, جوعارى وقۋ ورىندارىنىڭ وقۋلىقتارىندا ەل باردا, جۇرت باردا وقىتىلا بەرەدى, جۇرە بەرەدى دەپ ويلايمىن. ءبىز اعانىڭ تاربيەسىن كوپ كوردىك. اعانىڭ جەتەكشىلىگىندە قانشاما دوكتورلار وسى ادەبيەت سالاسىندا ەڭبەك ەتىپ ءجۇر. ول كىسى قازىرگى شىعىس قازاقستان وبلىسىنىڭ ابىرالى اۋدانى, قاينار اۋىلىندا تۋعان. بىراق مەكتەپتى شۇبارتاۋ اۋدانى, بارشاتاس اۋىلىندا بىتىرگەن. مۇحتار ماعاۋين, تولەك تىلەۋحانوۆ بارلىعى ءبىر مەكتەپتىڭ تۇلەكتەرى. مەن دە سول وقۋ ورداسىندا وقىعانىما ماقتانامىن. سوندىقتان ءبىز اعانىڭ تاربيەسىن كوپ كوردىك. ول كىسى وتە سۇڭعىلا ادام ەدى, تەرەڭ ادام ەدى. ىنىلەرىنە قامقور بولا ءبىلدى. اسىرەسە, ۇلت تاعدىرىنا, ەل تاعدىرىنا قاتىستى ماسەلە تۋىنداسا, الدىڭعى شەپتە جۇرەتىن جاۋىنگەر سياقتى ەدى. رىمعالي اعا عىلىم مەن ءبىلىم جولىندا تابانى تايماي وتكەن تارلانداردىڭ ءبىرى. ول كىسىنىڭ ەرەن ەڭبەگى ەلدىڭ ساناسىندا ساقتالىپ, جادىندا جاتتالىپ تۇراتىنىنا مەن سەنىمدىمىن. بۇگىنگى قويىلىپ جاتقان تاقتا اعانىڭ اتىن ۇرپاقتان-ۇرپاققا جالعايتىن التىن كوپىر بولىپ, ونىڭ ازاماتتىق تۇلعاسىن اسقاقتاتىپ تۇراتىن بەلگى بولماق», دەدى ن.ايت ۇلى.
ەۋرازيا ۇلتتىق ۋنيۆەرسيتەتىنىڭ رەكتورى ەرلان ءباتتاش ۇلى عالىمعا ارنالعان شاراپاتتى شارانىڭ تاعىلىمى مەن ءتالىمى مول وقيعا ەكەنىن العا تارتىپ, ەسكەرتكىش تاقتا ساندىك ءۇشىن ورناتىلمايتىنىن تىلگە تيەك ەتتى.
«رىمعالي اعا تالانتتى جاستاردى تابا ءبىلدى, تاني ءبىلدى. ولاردى ءوسىرىپ, عىلىم جولىندا تاباندى بولۋعا تاربيەلەدى. ەڭبەككە ەندى ارالاسىپ, عىلىم جولىنداعى باعىتىمىزدىڭ قالىپتاسۋ كەزەڭىندە ول كىسىنىڭ قاسىندا جۇرگەنىمىزگە ءوزىمىزدى باقىتتى سانايمىز. اعا استاناعا العاشقىلاردىڭ ءبىرى بولىپ قونىس اۋداردى. ارينە الماتىدا جىلى اۋا رايى, تاۋدىڭ باۋرايىندا جايلى ءومىر سۇرە بەرۋىنە بولاتىن ەدى. بىراق ول كىسى جايلىلىقتى ىزدەگەن جوق. كەرىسىنشە, قاي جەردە قيىنشىلىق بار, قاي جەردە كۇرەس بار سونى شەشۋ جولدارىن قاراستىردى. ول كىسىنىڭ بويىنان الاش قايراتكەرلەرىنىڭ قاسيەتى كورىنىپ تۇراتىن. استانانىڭ قازاقى قالا بولىپ قالىپتاسۋىنا ۇلكەن ۇلەس قوسىپ, رۋحاني ومىرىنە تىڭ سەرپىن بەردى», دەدى ەرلان سىدىقوۆ.
سالتاناتتى جيىنعا قاتىسقان استانا قالاسى اكىمىنىڭ ورىنباسارى ەرمەك امانشاەۆ رىمعالي نۇرعاليدىڭ عىلىمدى سۇيەتىن, ءبىلىمدى, بىلىكتى جاستاردىڭ شوعىرىن تاربيەلەپ شىعارعانىن, قازىرگى ۋاقىتتا ونىڭ تاربيەسىن كورگەن تالىمگەرلەرى دۇنيەنىڭ ءار تۇكپىرىندە ەلەۋلى ەڭبەك ەتىپ جاتقاندارىن تىلگە تيەك ەتتى.
راۋان قايدار,
«ەگەمەن قازاقستان»
