ت.گرەمينگەر استانانىڭ قازىرگى جاعدايدا اسا وزەكتى بولىپ وتىرعان جاھاندىق دىنارالىق جانە كونفەسسياارالىق ۇنقاتىسۋدى نىعايتۋداعى كۇش-جىگەرىن قۇپتادى.
باس حاتشى «اسىرەسە كوپجاقتىلىق ۇلكەن قىسىمعا ۇشىراعان كەزەڭدە» ۇيىمعا شىنايى بەيىلدىلىگى مەن تۇراقتى تۇردە قولداۋ كورسەتىپ جاتقانى ءۇشىن قازاقستانعا العىسىن ءبىلدىردى.
ق.ءابدىراحمانوۆتىڭ ايتۋىنشا, قازاقستان ەقىۇ-نى قازىرگى زامانعى حالىقارالىق قاتىناستار جۇيەسىندەگى ماڭىزدى جانە سۇرانىسقا يە ۇيىمداردىڭ ءبىرى دەپ سانايدى. ۇيىم كەيبىر ەلدەردە قايشىلىقتاردى ەڭسەرىپ, جانجالدار شەشىلۋى ءۇشىن ودان دا كوپ نارسە جاساي الادى. وسىعان بايلانىستى قازاقستاندىق تاراپ بىتىمگەرشىلىك ميسسياسىن جالعاستىرۋعا دايىن. استانا ءسامميتىنىڭ مۇراسىن ەسكەرە وتىرىپ, جاڭا قۇقىقتىق بازا نەگىزىندە ەۋرواتلانتيكالىق جانە ەۋرازيالىق كەڭىستىكتەگى قاۋىپسىزدىكتى نىعايتۋ جونىندەگى كەلىسسوزدەردى باستاۋ – وتە ماڭىزدى. ول قاۋىپسىزدىكتىڭ ءۇش ولشەمى, قۇرىلىمدىق ديالوگتى تالقىلاۋ, تەرروريزمگە جانە ترانسۇلتتىق قاۋىپ-قاتەرلەرگە قارسى ارەكەت ەتۋ, ورنىقتى دامۋعا جاردەمدەسۋ, ادام قۇقىقتارىن قورعاۋ ماسەلەلەرى شۇعىل تۇردە قاتىسۋشى مەملەكەتتەردىڭ كۇش-جىگەرىن شوعىرلاندىرۋدى تالاپ ەتەتىنىن اتاپ ءوتتى.
سىرتقى ساياسي ۆەدومستۆو باسشىسى سەنىم مەن ءوزارا تۇسىنىستىكتى نىعايتۋعا ىقپال ەتەتىن ەقىۇ قۇرىلىمدارىن ۇيىم جاۋاپكەرشىلىگىنىڭ بۇكىل ايماعىندا تەڭ جاعدايدا ورنالاستىرۋ ماڭىزدىلىعىنا توقتالدى. بولاشاقتا مۇنداي قۇرىلىمداردىڭ ءبىرى رەتىندە ەكسپو ينفراقۇرىلىمىنىڭ بازاسىندا ەكونوميكالىق بايلانىس, ءتيىمدى باسقارۋ, جاسىل ەكونوميكا, اپات جانە ەنەرگەتيكالىق قاۋىپسىزدىك قاتەرىن ازايتۋ سالاسىنداعى وزىق تاجىريبەمەن الماسۋعا نەگىزدەلگەن ەقىۇ-نىڭ تاقىرىپتىق ورتالىعىن قۇرۋعا بولار ەدى. قازاقستان ەقىۇ-نىڭ ەكونوميكالىق-ەكولوگيالىق كوميتەتىن باسقارىپ كەلە جاتقانىنا ەكى جىل بولدى جانە پرەزيدەنت ن.نازارباەۆتىڭ قازاقستان حالقىنا جاقىندا جاساعان جولداۋىنىڭ تۇرعىسىنان كولىك ينفراقۇرىلىمىن, ترانزيتتىك الەۋەتتى, ءتۋريزمدى دامىتۋ بويىنشا جوبالارعا ءوز سەرىكتەستەرىن شاقىرۋعا نيەتتى.
«ەگەمەن-اقپارات»
