بۇل جولعى جولداۋ, پەداگوگتەر قاۋىمىن ءتول مەرەكەلەرى قارساڭىندا ەرەكشە قۋانىشقا بولەدى. ويتكەنى ماڭىزدى قۇجاتتا مەملەكەت باسشىسى «پەداگوگ مارتەبەسى تۋرالى» زاڭدى ازىرلەپ, قابىلداۋ قاجەتتىگىن تاپسىردى. بۇل قۇجات مۇعالىمدەر مەن مەكتەپكە دەيىنگى مەكەمەلەردىڭ قىزمەتكەرلەرىن قاناتتاندىرىپ, ءوز ماماندىعىنا دەگەن سۇيىسپەنشىلىگىن ارتتىرا تۇسەتىنى انىق. پەداگوگ – وقىتۋشى عانا ەمەس, ۇلت تاربيەشىسى. سول سەبەپتى, قوعامنىڭ اۋىر دا, جاۋاپتى جۇگىن ارقالاعان مۇعالىمدەر ۇلكەن قۇرمەتكە لايىق.
جالپى, وبلىسىمىزدى پەداگوگتەردىڭ مارتەبەسىن ارتتىرۋ, قولداۋدى ماقسات ەتكەن كوپتەگەن يگى جۇمىستار اتقارىلىپ جاتىر. سونىڭ ءبىرى – جىل سايىن وبلىستىق, رەسپۋبليكالىق دەڭگەيدە ۇيىمداستىرىلىپ جاتقان «ۇزدىك پەداگوگ» بايقاۋى. بۇل بايقاۋدىڭ مۇعالىمدەر ءۇشىن پايداسى زور. جاقىندا عانا «ۇزدىك پەداگوگ-2018» رەسپۋبليكالىق بايقاۋىنىڭ قورىتىندىسى شىعىپ, ناتيجەسىندە جەڭىمپاز اتاندىم. مەن ءۇشىن – ۇلكەن مارتەبە, زور جەتىستىك. بۇل تەك قانا مەنىڭ مەرەيىمدى ۇستەم ەتكەن جوق, مەن جۇمىس ىستەيتىن م.قۇسايىنوۆ اتىنداعى وبلىستىق مەكتەپ-ينتەرناتتىڭ, وبلىستىڭ ابىرويى.
ەلباسى جولداۋىندا نازارباەۆ زياتكەرلىك مەكتەپتەرىنىڭ ءبىلىم بەرۋ ادىستەمەسى مەملەكەتتىك مەكتەپتەر ءۇشىن بىرىڭعاي ستاندارتقا اينالۋى ءتيىس ەكەنىن اتاپ كورسەتتى. وسىعان وراي مەكتەپتەردەگى حيميا, بيولوگيا, فيزيكا, ينفورماتيكا پاندەرىنىڭ مۇعالىمدەرى اعىلشىن ءتىلى كۋرستارىن ءتامامداپ, ناتيجەسىندە قازىر ولار حالىقارالىق تالاپتارعا ساي باعدارلامالار نەگىزىندە پاندەرىن ءۇش تىلدە جۇرگىزىپ جاتىر. وسىلايشا ەلىمىزدىڭ مەكتەپتەرى كەزەڭ-كەزەڭمەن مەملەكەت باسشىسى جۇكتەگەن جاڭارتىلعان ءبىلىم مازمۇنىنا كوشەتىن بولادى.
بالا – ەلىمىزدىڭ ەرتەڭى, ءبىزدىڭ بولاشاعىمىز. ولارعا كاسىبي باعدار بەرۋىمىز قاجەت. جالپى, ورتا مەكتەپتەرگە كاسىبي دياگنوستيكا جاساپ, تاپشى ماماندىقتاردى ايتىپ, بالالارعا باعىت كورسەتۋىمىز كەرەك. مەكتەپتە وقۋشىلاردىڭ فۋنكتسيونالدىق ساۋاتتىلىقتارىن قالىپتاستىرىپ, العان بىلىمدەرىن ومىردە قولدانا بىلەتىن جاڭاشىل, سىني, جاقسى ويلاي الاتىن تۇلعا قالىپتاستىرۋىمىز قاجەت. بۇل دا مەملەكەت باسشىسى جۇكتەگەن مىندەت.
ەلباسى تاپسىرماسىمەن قولعا الىنعان «رۋحاني جاڭعىرۋ» باعدارلاماسى ۇلتتىق قۇندىلىقتاردى ۇلىقتاۋعا نەگىزدەلگەن. ولاي بولسا, جاڭارتىلعان ءبىلىم بەرۋ باعدارلاماسىنىڭ نەگىزگى يدەياسى – وسى ۇلتتىق قۇندىلىقتارعا باعىتتالعان.
گۇلناز مىڭجاساروۆا,
«ۇزدىك پەداگوگ-2018» رەسپۋبليكالىق بايقاۋىنىڭ جەڭىمپازى
اقتوبە
