كەزدەسۋ ماقساتى - ەكىجاقتى ىسكەرلىك قارىم-قاتىناستى دامىتۋ. يتاليا ىسكەرلىك توبىن لونيگو قالاسىنىڭ مەرى لۋكا رەستەللو باستاپ كەلدى. ونىمەن بىرگە قازاقستانداعى يتاليا ەلشىسىنىڭ ورىنباسارى ماركو ەزپوستو, مەر كەڭەسشىسى ديەگو ماركازان جانە «لەيزين» حالىقارالىق مەكتەبىنىڭ باس ديرەكتورى گەورگي ماحۆيلادزە دە بار.
تاراپتار تۋريزم, قۇرىلىس, اۋىلشارۋاشىلىعى, كەن ءوندىرۋ سالالارىن بىرلەسىپ دامىتۋعا قىزىعۋشىلىق تانىتىپ وتىر.
- مەملەكەت باسشىسى قازاقستان حالقىنا ارناعان جولداۋىندا ەلىمىزدىڭ دامۋىنا جاڭا مىندەتتەر جۇكتەدى. ەلىمىزگە كەلەتىن يمپورتتى وتاندىق ونىممەن الماستىرۋ بويىنشا جۇمىستى كۇشەيتۋ جانە تاۋاردى ەكسپورتتاۋشىلارعا قولداۋ كورسەتۋ قاجەتتىلىگىن اتاپ ءوتتى. وبلىستا سىرتقى ساۋداعا شىعاتىن پوليەتيلەن قۇبىرلارى, تسەمەنت جانە امموني نيتراتىنىڭ ەكسپورتى ۇلكەن الەۋەتكە يە. بۇگىنگى تاڭدا ماڭعىستاۋ وبلىسىنىڭ سىرتقى ساۋدا اينالىمى 3,5 ملرد. اقش دوللارىن قۇرادى, سونىڭ ىشىندە ەكسپورت - 3,1 ملرد $, يمپورت -338,1 ملن $. قازاقستاندا ساۋدا ارىپتەستىگىن نىعايتقان العاشقى ۇشتىكتە يتاليا تۇر. بۇل ەلمەن ماڭعىستاۋدىڭ ساۋدا اينالىمى 482,2 ملن. اقش دوللارىن قۇرادى, ياعني ەكسپورت - 447,1 ملن. اقش دوللارى, يمپورت - 35,2 ملن. اقش دوللارى, دەدى ماڭعىستاۋ وبلىسى كاسىپكەرلەر پالاتاسىنىڭ ديرەكتورى ن.قاراساەۆ.
سىرتقى ساۋدا اينالىمىنىڭ نەگىزگى بولىگىن مۇناي مەن مۇناي ونىمدەرىنىڭ ەكسپورتى قۇرايدى (265,7 ملن. اقش دوللار), تابيعي اسفالتقا نەگىزدەلگەن بيتۋم قوسپالارى 25 مىڭ اقش دوللارىنا جەتىپ وتىر. بۇدان باسقا, ەكسپورتتىڭ ۇلەس سالماعىن 54 مىڭ اقش دوللارىن قۇرايتىن قارا مەتالداردىڭ جىكسىز قۇبىرلارى, تۇتىكشەلەرى مەن قۇيمالارى تولىقتىرادى. ايماقتاعى يمپورت كولەمى- 35,2 ملن $, سونىڭ ىشىندە قۇبىرلار, كاقپاقتار مەن قۇبىرلارعا ارنالعان جابدىقتار - 10,1 ملن $, سۇرىپتاۋ, سكرينينگ جانە تاس ءبولۋ ءۇشىن جابدىقتار - 10,1 ملن. اقش دوللارىنا جەتتى.
وسى جەتىستىكتەردى ودان ءارى دامىتىپ, ەكىجاقتى ءتيىمدى قارىم-قاتىناستى كوزدەگەن لونيگو قالاسىنىڭ مەرى لۋكا رەستەللو: «اقتاۋ مەن لونيگو قالالارى اراسىندا ىنتىماقتاستىقتى دامىتۋ جونىندەگى مەموراندۋمعا قول قويىلدى. سونىڭ نەگىزىندە وڭىردە ينۆەستيتسيالىق جوبالاردى دامىتۋدى كوزدەيمىز. مادەنيەت, ءبىلىم, سپورت سالالارىنا دا قوسارىمىز بار. اۋىل شارۋاشىلىعىنا ارنالعان جوبالارىمىز دا قىزىقتىرۋى ابدەن مۇمكىن, دەدى.
باسقوسۋدا ءسوز العان ايماقتىق كاسىپكەرلەر پالاتاسى جانىنداعى ماڭعىستاۋ وبلىسى ىسكەر ايەلدەر كەڭەسىنىڭ ءتورايىمى ساۋلە ساليحوۆا «2007 جىلدان بەرى ينتەرەر, جيھاز جاساۋشى 70-تەن استام يتالياندىق كاسىپكەرلەرمەن جۇمىس ىستەپ كەلەمىن. ميلاندا وتەتىن بارلىق كورمەلەرگە قاتىسامىن. ونداعى زاۋىتتاردىڭ يننوۆاتسيالىق قۇرالدارمەن جابدىقتالعانىنا كوزىم جەتتى. سوندىقتان دا ىسكەرلىك ارىپتەستىكتى ودان ءارى دامىتۋعا دايىنمىن» دەسە, وبلىستا قوناق ۇيلەر كەشەنىن دامىتۋشى كاسىپكەر تيمۋر ابدىكاريموۆتىڭ ايتۋىنشا, ماڭعىستاۋدىڭ تۋريستىك الەۋەتى جوعارى. قازىردىڭ وزىندە قوناقۇيلەرگە تاۋلىگىنە 500 ادام كەلەدى. الدا ۇلكەن كەشەن قۇرىلىسى اياقتالعاننان سوڭ مەديتسينالىق تۋريزم ىلگەرىلەپ, ەمدەۋ-ساۋىقتىرۋ شارالارىن جۇرگىزىپ, تاۋلىگىنە 800 ادام قابىلداۋ جوسپارلانعان. وسى سالادا يتالياندىق ارىپتەستەرىمەن تاجىريبە الماسۋعا دايىن.
بيزنەستى بىرلەسە دامىتۋدى ۇسىنعان كاسىپكەرلەر كەلەر جىلى ساۋىردە يتاليادا وتەتىن ەكونوميكالىق فورۋمعا شاقىرتۋ الدى. ماڭعىستاۋدا تەوريالىق تۇرعىدا ايتىلىپ, قاعاز جۇزىندە جاسالعان كەلىسىمدەر سول كەزدە ناقتى جۇزەگە اسادى. ينۆەستورلار ىسكەرلەرگە تەڭ دارەجەدە مۇمكىندىك جاسالادى دەپ سەندىرىپ وتىر.
گۇلايىم شىنتەمىرقىزى,
«ەگەمەن قازاقستان»
ماڭعىستاۋ وبلىس
