تەرەكتى اۋدانىنىڭ اكىمى قىزمەتىنە بۇعان دەيىن اقجايىق اۋدانىن باسقارىپ كەلگەن ءادىل تاۋفيق ۇلى جولامانوۆ تاعايىندالدى. ول 1968 جىلى تۋعان, «ەۆرازيا» باتىس قازاقستان مەنەدجمەنت جانە تىلدەر ينستيتۋتىن «ەكونوميست-بۋحگالتەر», ەۆرازيا اكادەمياسىن «قۇقىقتانۋ باكالاۆرى» ماماندىعى بويىنشا بىتىرگەن. ەڭبەك جولىن 1989 جىلى ساۋلەت جوسپارلاۋ تەحنيگى بولىپ باستاعان. ءار جىلدارى سىرىم اۋداندىق سالىق كوميتەتىنىڭ سالىق ينسپەكتورى, باس سالىق ينسپەكتورى, توراعا ورىنباسارى, توراعاسى بولسا, 2007-2011 جىلدار ارالىعىندا تەرەكتى اۋدانى بويىنشا سالىق باسقارماسىنىڭ باستىعى قىزمەتىن اتقارعان. تەرەكتى اۋداندىق ەكونوميكا جانە قارجى ءبولىمىنىڭ باستىعى, سىرىم اۋدانى اكىمىنىڭ ورىنباسارى, باتىس قازاقستان وبلىستىق اۋىل شارۋاشىلىعى باسقارماسى باسشىسىنىڭ ورىنباسارى بولىپ جۇمىس ىستەدى. 2015 جىلدىڭ ماۋسىم ايىنان بۇگىنگە دەيىن اقجايىق اۋدانىنىڭ اكىمى بولدى.
بۇعان دەيىن تەرەكتى اۋدانىنىڭ اكىمى بولعان كارىم جاقىپوۆ دەنساۋلىعىنا بايلانىستى ءوز ەركىمەن قىزمەتىنەن كەتتى. وبلىس اكىمى التاي كولگىنوۆ وعان اتقارعان جۇمىستارى ءۇشىن العىس ايتىپ, ساتتىلىك تىلەدى.
ال اقجايىق اۋدانىنا اكىم بولىپ ايتمۇحامبەتوۆ قاليار شاديار ۇلى تاعايىندالدى. ول 1969 جىلى تۋعان, ءبىلىمى جوعارى, باتىس قازاقستان اۋىل شارۋاشىلىق ينستيتۋتىن «اگرونوم», باتىس قازاقستان ينجەنەرلىك-گۋمانيتارلىق ۋنيۆەرسيتەتىن «قۇقىقتانۋ» ماماندىقتارى بويىنشا بىتىرگەن. ءار جىلدارى شىڭعىرلاۋ اۋدانىندا سوۆحوز ديرەكتورىنىڭ جاستار ءىسى جونىندەگى ورىنباسارى, اگرونومى, اۋدان اكىمى اپپاراتىنىڭ ىشكى ساياسات جانە الەۋمەتتىك ءبولىمىنىڭ باس مامانى, جۇمىسپەن قامتۋ جانە الەۋمەتتىك باعدارلامالار ءبولىمىنىڭ باستىعى, اۋدان اكىمى اپپاراتىنىڭ باسشىسى, شىڭعىرلاۋ اۋدانى اكىمىنىڭ ورىنباسارى بولىپ قىزمەت ەتكەن. 2017 جىلدىڭ تامىز ايىنان باتىس قازاقستان وبلىستىق جۇمىسپەن قامتۋدى ۇيلەستىرۋ جانە الەۋمەتتىك باعدارلامالار باسقارماسىنىڭ باسشىسى بولدى.
قازبەك قۇتتىمۇرات ۇلى,
«ەگەمەن قازاقستان»
باتىس قازاقستان
