حالقى شەراعا دەپ قاستەرلەگەن, قۇرمەت تۇتقان تۇلعامەن قوشتاسۋ وڭاي ەمەس. اتىراۋ مەن التاي, الاتاۋ مەن ارقا اراسىنداعى قاراورمان قازاقپەن بىرگە اۋليەاتا حالقى دا ارداقتى ازاماتىن ازالادى. قايراتكەر تۇلعامەن تاراز قالاسىنداعى «جەڭىس» ساياباعىندا جامبىل جۇرتشىلىعى قيماي قوشتاستى. ساياباقتاعى شەرحان مۇرتازانىڭ ۇلكەن پورترەتى سالىنعان باننەرگە اۋليەاتالىقتار گۇل شوقتارىن قويىپ, مارقۇمنىڭ رۋحىنا تاعزىم ەتتى. سونىمەن قاتار, وسىندا جازىلعان ەلباسىنىڭ «شەرحان مۇرتازا بۇكىل عۇمىرىن ءتول ادەبيەتىمىز بەن مادەنيەتىمىزدىڭ دامۋىنا ارناعان ءبىرتۋار ازامات, قازاقتىڭ مۇڭىن مۇڭداپ, جوعىن جوقتاعان نار تۇلعالى قالامگەر, قارىمدى قوعام قايراتكەرى بولدى. ۇلت رۋحانياتىندا وزىندىك قولتاڭباسى بار زاڭعار جازۋشى سوڭىنا مول مۇرا, ءورىستى ونەگە قالدىردى» دەگەن ءسوزى شەرحان رۋحىن اسقاقتاتىپ تۇردى.
اۋەلى جامبىل وبلىستىق ارداگەرلەر كەڭەسى توراعاسىنىڭ ورىنباسارى سانسىزباي جورابەكوۆ ءسوز الىپ, اڭىز تۇلعانىڭ قايراتكەرلىك جولىنا توقتالدى. ءار جىلدارى ەلىمىزدىڭ باس باسىلىمدارىن باسقارىپ, ودان كەيىن دەپۋتات بولعان شەرحان مۇرتازانىڭ ۇلتى ءۇشىن ۇلى ىستەر اتقارعانىن اتاپ ءوتتى. ال ءوز سوزىندە «نۇر وتان» پارتياسى جامبىل وبلىستىق فيليالى توراعاسىنىڭ ورىنباسارى شابدەن تىلەۋمۇرات شەراعاڭنىڭ اقيقات پەن شىندىق جولىندا ايانباي كۇرەسكەن ءبىرتۋار تۇلعا ەكەنىن ەسكە الدى. بۇدان كەيىن جامبىل وبلىستىق قازاق دراما تەاترىنىڭ ديرەكتورى بولات بەكجانوۆ, تالاس اۋدانىنىڭ قۇرمەتتى ازاماتى ءۇمىت بيتەنوۆا, قازاقستان جازۋشىلار وداعىنىڭ مۇشەسى بايماحانبەت احمەت ارامىزدان الىستاپ بارا جاتقان اياۋلى تۇلعا جايىندا جۇرەكجاردى سىرلارىمەن ءبولىستى. سونىمەن قاتار, شەرحان مۇرتازانىڭ جازۋشىلىق, قايراتكەرلىك تاعدىرى تۋرالى ايتىلدى.
«مەنى ادام قاتارىنا قوسايىن دەگەن ەشكىم بولعان جوق. كوپ شەتقاقپاي كوردىم. مەنى تاعدىر جەتەلەدى» دەپ تولعانىپتى كەزىندە شەرحان مۇرتازا. تاعدىرى بولەك, ءبىتىمى ەرەك تۇلعانى تاعدىردىڭ ءوزى سىنادى, ءوزى قالىپتاستىردى. «شىندىق ەشقاشان شىرىمەيدى» دەيدى تاعى بىردە. شىندىقتى شىرقىراتىپ ايتىپ, ارىستانداي ارقىراعان الىپ تۇلعانىڭ ەسىمى ەشقاشان ۇمىتىلمايدى. قازاقتىڭ ماڭگى جۇرەگىندە بولا بەرمەك.
حاميت ەسامان,
«ەگەمەن قازاقستان»
جامبىل وبلىسى
