سەمەي قالاسىندا باقىتجان ساعىنتاەۆتىڭ قالانىڭ اكتيۆىمەن جانە جۇرتشىلىق وكىلدەرىمەن كەزدەسۋ بارىسىندا «فيرما «ازيا» جشس قۇرىلىس كومپانياسى پرەزيدەنت جولداۋىنا قولداۋ كورسەتۋ اياسىندا قىزمەتكەرلەرگە ەڭ تومەنگى جالاقى مولشەرىن 50%-عا دەيىن كوتەرۋ تۋرالى شەشىم قابىلدانعانىن جەتكىزدى.
ء«بىز پرەزيدەنت جولداۋىندا العا قويىلعان مىندەتتەردى ىسكە اسىرۋعا ءازىرمىز. كەلەسى جىلدان باستاپ ءبىز كاسىپورىندا ەڭبەكاقىنى 50%-عا كوتەرەمىز», — دەدى قۇرىلىس كومپانياسىنىڭ قۇرىلتايشىسى ءا. دوسقوجانوۆ.
جارما اۋدانىندا كەن بايىتۋ فابريكاسىن ارالاعاننان كەيىن, پرەمەر-مينيستر باقىتجان ساعىنتاەۆ «باقىرشىق تاۋ-كەن ءوندىرۋ كاسىپورنى» جشس باسشىلىعىمەن كەزدەسۋ وتكىزدى. ەلباسى جولداۋىنىڭ ماڭىزدى باعىتتارى تالقىلاندى. باس ديرەكتور يۋ. وۆچيننيكوۆ كاسىپورىن جۇمىسكەرلەرىنىڭ ەڭبەكاقىسىن ارتتىرۋ ماسەلەسىن قاراپ جاتقانىن جەتكىزدى.
ايتا كەتۋ كەرەك, بۇگىنگى تاڭدا كاسىپورىندا 1097 قىزمەتكەر جۇمىس ىستەيدى. ونىڭ ىشىندە 97,2%-ى — قازاقستان ازاماتتارى. بۇدان وزگە, كاسىپورىنعا مەردىگەر ۇيىمداردىڭ 700-گە جۋىق قىزمەتكەرى تارتىلعان. سونداي-اق, بىلىكتى كادرلاردى دايارلاۋ ماقساتىندا قۇزىرەتتىلىك ورتالىعىن قۇرۋ كوزدەلگەن.
بۇل نىساندا باقىتجان ساعىنتاەۆ كەن بايىتۋ فابريكاسى جۇمىسىنىڭ اعىمداعى ناتيجەلەرىمەن تانىستى. باقىرشىق تاۋ-كەن ءوندىرىسى كاسىپورنى قازاقستاننىڭ ءىرى كەن ورنى — جارما اۋدانىنداعى باقىرشىقتا كەن وندىرەدى, بۇل جەردىڭ قورى ءبىر تونناعا شاققاندا ورتا ەسەپپەن قۇرامىندا 7,7 گرامم بولعاندا 280 توننا التىنعا باعالانادى. قازىرگى كەزدە «جىلىنا 2 ملن توننا كەن وندىرەتىن تاۋ-كەن بايىتۋ كومبيناتىن سالۋ» جوباسى ىسكە اسىرىلىپ جاتىر, جوبا وبلىستىڭ يندۋستريالىق-يننوۆاتسيالىق دامۋ باعدارلاماسىنا ەنگەن. كاسىپورىنعا سالىنعان ينۆەستيتسيالاردىڭ جالپى كولەمى 133 ملرد تەڭگەدەن اسادى. نىسان 2018 جىلعى ماۋسىم ايىندا پايدالانۋعا بەرىلگەن. تولىق جوبالىق ونىمدىلىگىنە 2019 جىلى شىعارۋ جوسپارلانعان.
وسى جەردە پرەمەر-مينيسترگە جاڭا «قىزىل» جوباسىن تانىستىرىپ, ونىڭ ونىمدەرىن وتكىزۋ پەرسپەكتيۆالارى كورسەتىلدى. كاسىپورىننىڭ باس ديرەكتورى يۋ. وۆچيننيكوۆ «قىزىلداعى» التىن قورىنىڭ دەڭگەيى 280 ت قۇرايتىنىن ايتتى, التىننىڭ ۇلەسى جوعارى. 2018 جىلدىڭ توعىز ايىنىڭ ىشىندە 311,5 مىڭ ت كەن وڭدەلگەن, دايىن ءونىم — قۇرامىندا التىن بار 12 569 ت كوندەنسات وندىرىلگەن. بولاشاقتا جوبا التىن مەن باسقا دا پايدالى قازبالاردى بارلاۋ, ءوندىرۋ, قايتا وڭدەۋ, وڭدەۋ, تاسىمالداۋ جانە ساتۋ ءىسىن قاراستىرماق. بۇل ەلىمىزدىڭ ەكسپورتتىق الەۋەتىن ارتتىرۋ ءۇشىن قوسىمشا سەرپىن بولادى.
«يندۋستريا 4.0» اياسىندا زاماناۋي تەحنولوگيالاردى وندىرۋگە كوبىرەك كوڭىل ءبولىنىپ جاتىر. فابريكادا فينليانديا, وار, گەرمانيا جانە باسقا دا وندىرىستەردىڭ بىرەگەي تەحنيكالىق جوبالارى ىسكە اسىرىلعان. مۇندا قولدانىلاتىن اۆتوماتتاندىرىلعان جۇيەلەر ادام فاكتورىنىڭ وندىرىسكە ىقپالىن ازايتىپ, جۇمىستى قاۋىپسىزدەندىرىپ, جاراقات الۋ قاۋپىن تومەندەتەدى.
جالپى, يدمب نەگىزگى ماقساتتى ينديكاتورلارى بويىنشا وڭدەۋ ونەركاسىبىندە وڭىردە 2018 جىلدىڭ قاڭتار–اقپان ايلارىندا ەكسپورت كولەمى $252,1 ملن قۇرادى. ەڭبەك ونىمدىلىگى $6,8 مىڭ/ادامدى قۇرايدى. 2018 جىلى جالپى سوماسى 167,1 ملرد تەڭگەگە تاعى توعىز جوبانى ىسكە قوسۋ جوسپارلانىپ وتىر, 1,4 مىڭ تۇراقتى جۇمىس ورىندارى قۇرىلادى. بيىل تامىز ايىندا نەگىزگى كاپيتالعا 25,3 ملرد تەڭگە ينۆەستيتسيا سالىندى.
