باقىتجان ساعىنتاەۆ ارنايى تەحنيكامەن جابدىقتالعان فيزيكا, بيولوگيا جانە حيميا كابينەتتەرىن ارالاپ, اT-سىنىپتارىندا روبوتتى تەحنيكا جانە تەحنيكالىق جۇيەلەردى اۆتوماتتاندىرۋ بويىنشا وقۋشىلاردىڭ ازىرلەمەلەرىمەن تانىستى.
№ 46 ورتا مەكتەپتىڭ ديرەكتورى گ. اۋعانباەۆا جاڭا موديفيكاتسياداعى سىنىپتار ينتەراكتيۆتى سەنسورلىق تاقتامەن, ميكروسكوپتارمەن, حيميالىق تاجىريبەلەرگە, بيولوگيا جۇمىستارىنا ارنالعان ارنايى جابدىقتارمەن جاراقتاندىرىلعانىن ايتتى. فيزيكا سىنىبىنا دا كومپيۋتەرلىك ولشەۋ قۇرىلعىلارى, ەلەكتروستاتيكا, راديوتەحنيكا, مۋلتيمەديالىق نۇسقاۋلىقتار ورناتىلعان. اT-سىنىبىندا قاجەتتى كومپيۋتەرلىك تەحنيكادان باسقا, Robotis Mini گۋمانويدتى روبوتى, روبوتتار جارىستارىنا ارنالعان الاڭ, «اقىلدى جىلىجاي» (Smart Agriculture) Arduino ءبىلىم بەرۋ جيناعى, 3D Printer Tarantula جانە باسقا جابدىقتار بار. ءبىلىم بەرۋ پروتسەسىندە تەحنولوگيالاردى قولدانۋ تسيفرلىق ەكونوميكاعا بىلىكتى كادرلاردى دايارلاۋعا مۇمكىندىك بەرەدى.
مەملەكەت باسشىسى «قازاقستاندىقتاردىڭ ءال-اۋقاتىنىڭ ءوسۋى: تابىس پەن تۇرمىس ساپاسىن ارتتىرۋ» اتتى جولداۋىندا «نازارباەۆ زياتكەرلىك مەكتەپتەرىنىڭ» جۇيەسى مەن وقىتۋ ادىستەمەسى باسقا مەملەكەتتىك مەكتەپتەر ءۇشىن بىرىڭعاي ستاندارتقا اينالۋى ءتيىس» دەپ اتاپ ءوتتى. بۇل مەكتەپتەگى ءبىلىم بەرۋدى رەفورمالاۋدىڭ سوڭعى كەزەڭى بولماق.
شىعىس قازاقستان وبلىسى اكىمدىگىنىڭ دەرەكتەرىنە سايكەس, بۇگىندە «نازارباەۆ زياتكەرلىك مەكتەبىنىڭ» ستاندارتتارىنا سايكەس 277 ورتا مەكتەپتى جاڭا موديفيكاتسيالاۋ جانە روبوتتى تەحنيكا سىنىپتارىمەن جابدىقتاۋ جۇمىستارى جۇرگىزىلىپ جاتىر. 1 قىركۇيەكتەن باستاپ 277 جالپى ءبىلىم بەرۋ مەكتەبىندە تۇگەلدەي اT-سىنىپتارى اشىلدى.
ءوز كەزەگىندە وبلىس اكىمىنىڭ ورىنباسارى ا. ءنۇسىپوۆا ەلباسى العا قويعان مىندەتتەردى ەسكەرە وتىرىپ, ءبىلىم بەرۋ ساپاسىن ارتتىرۋ بويىنشا قابىلدانىپ جاتقان شارالار تۋرالى باياندادى. ماسەلەن, مەكتەپتەردە كەدەرگىسىز ينتەرنەتكە كىرۋگە مۇمكىندىك بار, بارلىق مەكتەپتەر «كۇندەلىك» ەلەكتروندى جۋرنالى مەن كۇندەلىكتەر جۇيەسىنە قوسىلعان. وبلىستا بارلىعى 187 245 بالا ءبىلىم الاتىن 691 ورتا مەكتەپ جۇمىس ىستەيدى. 70% مەكتەپ سىنىپتارى كومپيۋتەرلىك جانە مۋلتيمەديالىق جابدىقتارمەن قامتىلعان.
ايتا كەتۋ كەرەك, پرەزيدەنت جولداۋىن ىسكە اسىرۋ اياسىندا ءبىلىم بەرۋ جانە دەنساۋلىق ساقتاۋ سالالارىندا تيىمدىلىكتى ارتتىرۋعا باسىمدىق بەرە وتىرىپ, اتالعان سالالاردى مەملەكەتتىك قولداۋدى ارتتىرۋ جۇمىستارى جۇرگىزىلىپ جاتىر. ەلباسى بەس جىل ىشىندە ءبىلىم, عىلىم, دەنساۋلىق ساقتاۋ سالالارىنا بارلىق كوزدەردەن جۇمسالاتىن قاراجاتتى جالپى ىشكى ءونىمنىڭ 7,4%-دان 10%-عا دەيىن جەتكىزۋ تۋرالى مىندەت قويدى. ءۇش جىلدىق بيۋدجەت اياسىندا بىلىمگە جۇمسالاتىن شىعىنداردى بيىل 456,3 ملرد تەڭگەدەن 2021 جىلى 752,1 ملرد تەڭگەگە دەيىن نەمەسە 65%-عا ارتتىرۋ كوزدەلگەن.
بيىل شىعىس قازاقستان وبلىسىنىڭ دەنساۋلىق ساقتاۋ جۇيەسىن قارجىلاندىرۋعا 16,5 ملرد تەڭگە قاراستىرىلعان. دەنساۋلىق ساقتاۋ نىساندارىن دامىتۋعا 9,4 ملرد تەڭگە (سونىڭ ىشىندە رب-تەن — 1,2 ملرد تگ), ماتەريالدىق-تەحنيكالىق بازانى نىعايتۋعا — 3,6 ملرد تگ, كۇردەلى جوندەۋ جۇمىستارىنا — 0,3 ملرد تگ قاراستىرىلعان.
