ەڭ الدىمەن, قازاقستاننىڭ ءار ازاماتىنىڭ مۇددەسىنە ءمان بەرىلگەنى ەرەكشە اسەر ەتكەنىن ايتقىم كەلەدى. وزدەرىڭىز بىلەتىندەي, ەلدىڭ ۇلىلىعى ونىڭ حالقىنىڭ ۇلىلىعىندا جاتىر. جەكە دامۋعا نازاردىڭ ءدال وسىلاي باعىتتالۋى قازاقستان رەسپۋبليكاسى باسشىلىعىنىڭ بۇل فاكتىنى جاقسى تۇسىنەتىنىن كورسەتەدى. ەگەر بولاشاق ۇرپاقتىڭ ودان ءارى دامۋىنا نەگىز بولماسا, پروگرەسس تە بولماس ەدى. حالىقتىڭ دەنساۋلىعىنا,ءبىلىم الۋىنا, باقىتتى ءومىر سۇرۋىنە ءمان بەرىلۋى – ەلدەرىڭىزدىڭ ۇزدىكسىز دامۋىنا سالىنعان ماڭىزدى ينۆەستيتسيا.
ەكىنشىدەن, ءاربىر ازاماتقا نازار اۋدارۋمەن عانا شەكتەلمەي, ازاماتتار مەن ۇكىمەت اراسىنداعى قارىم-قاتىناستى نىعايتۋ دا قامتىلعان. اشىقتىق پەن جۇمىلۋ دەموكراتيالىق قوعامدا شەشۋشى ءرول اتقارادى. بۇل ۇزدىكسىز باسقارۋ كەپىلدىگىن عانا ەمەس, سونىمەن قاتار ءاربىر ازاماتتىڭ ءوز مۇددەلەرىنىڭ ۇكىمەتتە كوزدەلەتىنىن, ءوز پىكىرىنىڭ ەسكەرىلەتىنىن ءبىلىپ, ەڭ باستىسى ۇكىمەتكە سەنىم ارتۋىن قامتاماسىز ەتەدى. وسىلايشا, ءاربىر ادام ۇلت دامۋى جولىنداعى بىرلەسكەن ءىستىڭ ماڭىزدىلىعىن سەزىنەدى.
اتاپ ايتاتىن تاعى ءبىر ماڭىزدى ماسەلە, مەنىڭ ويىمشا پرەزيدەنتتەرىڭىزدىڭ زاڭ ۇستەمدىگىن نىعايتۋعا دەگەن نيەتى. ەل ۇكىمەتىنىڭ ازاماتتاردىڭ عانا ەمەس, قازاقستانمەن ارىپتەستىك ورناتقىسى كەلەتىن, قازىردىڭ وزىندە ارىپتەس شەتەلدىك ينۆەستورلار تاراپىنان دا سەنىمگە يە بولۋى ءۇشىن قۋاتتى, تاۋەلسىز ءارى اشىق ينستيتۋتتار قاجەت. سىبايلاس جەمقورلىققا قارسى قارقىندى كۇرەس وسى سەنىمدىلىكتى نىعايتۋدا ۇلكەن ماڭىزعا يە.
سونداي-اق مەن قازاقستاننىڭ جاھاندىق ساياساتتاعى رولىنە ەكپىن بەرۋدىڭ ماڭىزدىلىعىن اتاپ ايتقىم كەلەدى. پرەزيدەنتتەرىڭىزدىڭ قازاقستاندى الەمدىك ساياساتتا رەسەي, قىتاي جانە تاياۋ شىعىس اراسىنداعى ستراتەگيالىق تۇرعىدا ورنالاسقان جىلدام دامۋشى, بەيبىتسۇيگىش ەل رەتىندە ىلگەرىلەتۋى ۇلكەن ءۇمىت بەرەدى. بۇگىندە الەمدىك قوعامداستىققا بەيبىتشىلىككە ۇمتىلعان سەرىكتەستەر كەرەك. ەلدەرىڭىزدىڭ دامۋىمەن بىرگە قازاقستاننىڭ سەرىكتەس, بىتىمگەر جانە الەمنىڭ پروموۋتەرى رەتىندەگى ءرولىنىڭ ماڭىزدىلىعى دا وسە بەرەتىن بولادى. سونىمەن بىرگە قازاقستان وزىمەن كورشى ەلدەردەن, اقش پەن ەۋروپادان باسقا, اسەان (وڭتۇستىك شىعىس ازيا مەملەكەتتەرىنىڭ اسسوتسياتسياسى) قۇرىلىمىندا دا ىنتىماقتاسۋعا دايىن سەرىكتەستەرى بار ەكەنىن دە ەستە ۇستاعانى ءجون.
مەنىڭ ويىمشا, قازاقستان باي مادەنيەتى مەن رەسۋرستارىن جۇمساق كۇشىمەن ۇشتاستىرا وتىرىپ, قولجەتىمدى مۇمكىندىكتەردى پايدالانۋ ارقىلى ءتۋريزمدى ناسيحاتتاۋدا ۇلكەن جۇمىس ىستەۋگە ءتيىس. مەن بۇل ايماققا ۇلەسىمدى قوسسام دەيمىن.
سوڭىندا, قازاقستاننىڭ جاقتاسى, كوپتەن بەرگى جانكۇيەرى رەتىندە وسىناۋ تاماشا ەلدەرىڭىزدىڭ دامۋىنا مەن دە ەلەۋلى ۇلەس قوسامىن دەپ ۇمىتتەنەتىنىمدى جەتكىزگىم كەلەدى. پرەزيدەنتتەرىڭىزدىڭ وسى ماڭىزدى جولداۋىندا ايتقان ماقساتتاردىڭ 2050 جىلدان دا ەرتەرەك ورىندالارىنا كۇمانىم جوق.
ەدۋاردو راموس-گومەز,
«Duane Morris and Selvam LLP» زاڭ كومپانياسىنىڭ ارىپتەسى (سينگاپۋر)
