ازيا قۇرلىعىندا تۇڭعىش رەت وتكىزىلگەن جيىندا اۋىز سۋ تاپشىلىعى ماسەلەسى جان-جاقتى ءسوز بولدى. شارانى بەينەجولداۋ ارقىلى قۇتتىقتاۋ سوزىمەن اشقان ەلباسى نۇرسۇلتان نازارباەۆ قاتىسۋشىلارعا سەسسيا ماڭىزدىلىعى تۋرالى ايتىپ, حالىقتى جانە حالىققا قاجەت الەۋمەتتىك-ەكونوميكالىق سالالاردى سۋمەن قامتۋ, اتالعان سالاعا تىڭ تەحنولوگيالاردى ەنگىزۋ, ينۆەستيتسيا تارتۋ, سۋ قورلارىن زياندى قالدىقتاردان تازارتۋ جانە بىلىكتى ماماندار دايىنداۋ سىندى تۇيىتكىلدى ماسەلەلەردى نازارعا الدى.
شاراعا قاتىسۋشى رەسمي دەلەگاتسيا قۇرامىندا الىس-جاقىن شەت مەملەكەتتەردىڭ مينيسترلىكتەرى مەن اگەنتتىكتەرىنىڭ باسشىلارى بولدى. بۇۇ ەۋروپالىق ەكونوميكالىق كوميسسياسىنىڭ اتقارۋشى حاتشىسى ولگا الگاەروۆا بايانداما جاساپ, ۇيىمنىڭ باس حاتشىسى انتونيۋ گۋتەرريش جولداعان قۇتتىقتاۋ ءسوزدى وقىپ بەردى. جيىندا ءسوز العان باسقا دا بايانداماشىلار جولداعان سۋ ماسەلەسىن شەشۋدەگى ءوزارا ىنتىماقتاستىقتىڭ ءمان-ماڭىزىن ەرەكشە اتاپ ءوتتى.
جالپى الەمدەگى 260 شەكاراارالىق سۋ باسسەينى جەر شارىنىڭ تەڭ جارتىسىن قۇراسا, بۇل اۋماقتىڭ 40 پروتسەنتىندە ادامدار ءومىر سۇرەدى. ياعني, جىل سايىن جەر-جاھاندى تازا اۋىز سۋمەن قامتۋ ماسەلەسى قوردالانىپ كەلەدى دەگەن ءسوز. جيىنعا قاتىسۋشىلار بۇل ماسەلەنى شەشۋ ءۇشىن جۇمىلا جۇمىس اتقارۋ قاجەتتىگىن ايتادى.
قازاقستان اتالعان كونۆەنتسياعا بيىل ءۇشىنشى مارتە توراعالىق ەتىپ وتىرعانىن اتاپ وتكەن ءجون. سەگىزىنشى سەسسيا بارىسىندا 2019-2021 جىلدارعا ارنالعان ستراتەگيا مەن باعدارلاما قابىلدانادى دەپ جوسپارلانعان.
اتالعان باعدارلاما نەگىزىندە ترانسشەكارالىق وزەندەردىڭ سۋ رەسۋرستارىن قورعاۋ جانە پايدالانۋ ماسەلەسى قاراستىرىلىپ, بۇل سالاعا ينۆەستيتسيا تارتۋ جولعا قويىلماق. سونداي-اق سۋ سەكتورىندا ەلدىڭ عىلىمي جانە ينستيتۋتسيونالدىق الەۋەتىن كۇشەيتۋگە باسىمدىق بەرىلمەك. شەكاراارالىق سۋلار تۋرالى كونۆەنتسيا 1996 جىلى قابىلداندى جانە وعان بۇۇ-عا مۇشە ەلدەر قاتىسا الادى.
ەركەجان ايتقازى,
«ەگەمەن قازاقستان»
