«كەلەسى جىلدىڭ 1 قاڭتارىنان باستاپ ەڭ تومەنگى ەڭبەكاقى 1,5 ەسەگە كوبەيەدى. بۇل وبلىستىڭ 32 مىڭ تۇرعىنىنا, بيۋدجەت سالاسىنداعى 25 مىڭ ادامعا قاتىسى بار. وسى ماقساتتارعا 2 ملرد تەڭگە بولىنەدى», دەدى وبلىس اكىمى ەرلان قوشانوۆ.
ە.قوشانوۆ «بيزنەستىڭ جول كارتاسى-2020» باعدارلاماسى بويىنشا قاراعاندى وبلىسىنىڭ وراسان زور تيىمدىلىكتى سەزىنىپ وتىرعانىن ايتتى. «بىرنەشە تسيفر كەلتىرەيىن: 8 جىل ىشىندە باعدارلامانى قارجىلاندىرۋعا 17 ملرد تەڭگە باعىتتالدى, 1,5 مىڭ كاسىپكەرگە قولداۋ كورسەتىلدى, بيۋدجەتكە 24 ملرد تەڭگە سالىق تولەمدەرى اۋدارىلدى, 20 مىڭ جاڭا جۇمىس ورنى اشىلدى, 168 ملرد تەڭگە ينۆەستيتسيا سالىندى», دەپ اتاپ ءوتتى وبلىس اكىمى.
بۇدان سوڭ جولداۋدا تۋريزم سالاسىن دامىتۋعا ەرەكشە كوڭىل ءبولىنىپ, ونىڭ ەكونوميكانىڭ جىلدام دامۋشى سەكتورلارىنىڭ ءبىرى رەتىندە اتالعانىن ايتا كەلىپ: «پرەزيدەنت ءبىرىنشى كەزەكتە ەلىمىزدىڭ توپ-10 تۋريستىك نىسان قاتارىنا كىرەتىن بالقاش ماڭى ايماعىندا ءتۋريزمدى دامىتۋ بويىنشا شارالار قابىلداۋدى تاپسىردى. ءبىزدىڭ ماقسات – 2023 جىلعا دەيىن بالقاشتاعى تۋريستەر اعىنىن 2 ەسەگە كوبەيتۋ», دەدى.
ءوڭىر باسشىسى ءبىلىم بەرۋ سالاسىنداعى نەگىزگى باعىتتاردىڭ انىقتالعانىن, ەندى تەك ولاردى ساپالى ورىنداۋعا كىرىسۋ كەرەكتىگىن ايتتى.
«بۇگىندە 3-تەن 6 جاسقا دەيىنگى بالالاردى وقۋمەن قامتۋ 98,9%-كە جەتتى. جىلدىڭ سوڭىنا دەيىن مەملەكەت باسشىسىنىڭ بۇل جاستاعى بالالاردى 100% قامتۋ جونىندەگى تاپسىرماسىن مەرزىمىنەن بۇرىن ورىندايمىز دەگەن جوسپارىمىز بار. بيىلعى وقۋ جىلىندا وقۋشىلاردىڭ 70 پروتسەنتى جاڭارعان مازمۇن بويىنشا ءبىلىم الىپ جاتىر. جاڭا باعدارلاما بويىنشا بىلىكتىلىكتى جەتىلدىرۋ كۋرسىنان جىلدىڭ باسىنان بەرى 5 مىڭ مۇعالىم ءوتتى. تاعى نە ىستەۋ كەرەك؟ جاڭا باعدارلامالار ەنگىزۋ كەرەك, بىلىكتى مامانداردى تارتىپ, ولارعا نازارباەۆ زياتكەرلىك مەكتەپتەرى ۇلگىسىندە جاعداي جاساۋ قاجەت», دەدى ە.قوشانوۆ.
ءوڭىر باسشىسى ەلباسىنىڭ «7-20-25» يپوتەكالىق باعدارلاماسىنىڭ ورىندالۋىنا ايرىقشا ءمان بەرىپ وتىرعانىنا توقتالدى. جىلدىڭ سوڭىنا دەيىن تۇرعىنداردى نەسيەلەندىرۋ ءۇشىن 324 پاتەر, ال 2019 جىلى 1 مىڭنان استام پاتەر بولىنەتىندىگىن ايتتى. سونداي-اق بۇگىندە العاشقى جارنانى سۋبسيديالاۋ ماسەلەسىنىڭ شەشىلىپ جاتقانىن دا ءمالىم ەتتى.
سونىمەن قاتار وبلىس اكىمى وڭىردە مەملەكەتتىك قىزمەتتەردىڭ 74% ەلەكتروندى تۇردە كورسەتىلەتىنىن, ال 2020 جىلى بۇل كورسەتكىش 90 پروتسەنت ەلەكتروندىق پىشىمدە بولاتىنىن جەتكىزدى. ەكسپورتتىق الەۋەتتى كۇشەيتۋ كەرەكتىگىنە دە باسا ءمان بەرىپ, بۇل سالاداعى ماسەلەلەرگە كەڭىنەن توقتالدى. اگرارلىق سەكتورداعى «ناقتى ەگىنشىلىك» – جوعارى تەحنولوگيالىق كەشەندى جۇيە جوبالارىن جۇزەگە اسىرۋ ءىسىنىڭ جالعاساتىنىن مالىمدەدى. ايماقتا كاسىپكەرلىكتى قولداۋ ءارى قاراي جالعاسىن تاباتىنىن ايتتى.
ە.قوشانوۆ وڭىردە بۇقارالىق سپورتتىڭ قولجەتىمدىلىگىن ارتتىرۋعا باسا كوڭىل ءبولۋ كەرەكتىگىن اتاپ ءوتتى. «بۇگىندە وبلىستا 17 دەنە شىنىقتىرۋ-ساۋىقتىرۋ كەشەنىن سالۋعا سۇرانىس بار. بيىل 3 كەشەن, كەلەر جىلى تاعى ۇشەۋىن سالامىز. جىل سايىن بيۋدجەت ەسەبىنەن قالالار مەن اۋدانداردا 15 سپورتتىق الاڭ مەن 20 حوككەي كورتىن ورناتامىز», دەدى ول.
جيىن بارىسىندا ە.قوشانوۆ جولداۋدا ايتىلعان نەگىزگى التى مىندەت بويىنشا ءتيىستى سالالاردىڭ باسشىلارىنا ناقتى تاپسىرمالار بەرىپ, ولاردىڭ ورىندالۋ بارىسىن تىكەلەي ءوزىنىڭ باقىلاۋىنا الاتىنىن مالىمدەدى.
سونداي-اق اكتيۆ جينالىسىندا ءسوز سويلەگەن وبلىستىق ءماسليحاتتىڭ دەپۋتاتى, قازاقستان حالقى اسسامبلەياسىنىڭ قاراعاندى وبلىستىق فيليالى جانىنداعى قوعامدىق كەلىسىم كەڭەسىنىڭ توراعاسى بەكزات التىنبەكوۆ, «شاحتەرسكوە» جشس-ءنىڭ ديرەكتورى گەورگي پروكوپ, №1 ء«بىلىم يننوۆاتسياسى» وبلىستىق ليتسەي-ينتەرناتىنداعى حيميا ءپانىنىڭ مۇعالىمى ابىلاي ساماتوۆ, وبلىستىق جاستار رەسۋرستىق ورتالىعىنىڭ ديرەكتورى اقجول قۇرمانسەيىتوۆ جولداۋدىڭ باسىم باعىتتارى تۋرالى ويلارىن ورتاعا سالدى.
«وبلىستا جۇمىستى بۇگىننەن باستاۋعا ءازىر اقپاراتتىق-ناسيحات توپتارى قۇرىلعان. ءبىزدىڭ ءبارىمىز, بۇگىنگى اكتيۆ جينالىسىنىڭ قاتىسۋشىلارى, ءماسليحات دەپۋتاتتارى, قوعام قايراتكەرلەرى بۇل ىسكە ءبىر كىسىدەي جۇمىلۋىمىز قاجەت. جولداۋدا ايتىلعان الەۋمەتتىك مىندەتتەردى وبلىستىڭ ءاربىر تۇرعىنىنا جەتكىزۋدىڭ ماڭىزى زور», دەپ قورىتتى جيىندى ە.قوشانوۆ.
قايرات ءابىلدا,
«ەگەمەن قازاقستان»
قاراعاندى
