سونىڭ ىشىندە ينۆەستيتسيالار جانە دامۋ ءمينيسترىنىڭ مىندەتىن اتقارۋشى رومان سكليار دەپۋتاتتارعا اۋە كەمەلەرىنىڭ بورتىندا جاسالاتىن قىلمىستار جانە كەيبىر باسقا دا اكتىلەر تۋرالى كونۆەنتسيانى جانە وسى كونۆەنتسيانى وزگەرتەتىن حاتتامانى راتيفيكاتسيالاۋ تۋرالى قازاقستان رەسپۋبليكاسى زاڭىنىڭ جوباسىن تانىستىردى. حالىقارالىق كونۆەنتسيانىڭ ءوزى 1963 جىلى توكيودا قابىلدانعان ەكەن. قازىر وعان الەمنىڭ 186 مەملەكەتى قوسىلعان كورىنەدى.
ر.سكلياردىڭ بايانداماسىنان زاڭ جوباسى اۋە كەمەلەرىنىڭ بورتىنداعى ءتارتىپ بۇزۋشىلىقتاردىڭ جولىن كەسۋگە باعىتتالعانى بەلگىلى بولدى. مۇندا اۋە كەمەسى كومانديرىنىڭ ءتارتىپ بۇزۋشىلارعا قارسى ارەكەت ەتۋ وكىلدىكتەرى انىقتالعان. سونداي-اق ەكيپاج مۇشەلەرىنە دە وسى تاراپتا بەرىلەتىن قۇقىقتىق نورمالار قامتىلعان. كونۆەنتسيا مەن حاتتامانى راتيفيكاتسيالاۋ قازاقستان تاراپىنان قوسىمشا شىعىندار تالاپ ەتپەيدى, دەدى ول.
بايانداما اياقتالىسىمەن دەپۋتاتتار بىرنەشە سۇراق قويدى. ولارعا جاۋاپ بەرىلگەن سوڭ, كەيبىر تۇسىنبەستىك تۋعىزعان تۇستاردى وتىرىسقا قاتىسىپ وتىرعان ادىلەت ءمينيسترىنىڭ ورىنباسارى ەلۆيرا ءازىموۆا تارقاتا ايتىپ بەردى. وسىدان كەيىن تالقىلاۋعا قاتىسقان دەپۋتات اباي تاسبولاتوۆتىڭ ۇسىنىسىمەن زاڭ جوباسى ماقۇلداندى.
جالپى وتىرىستا اۋە كەمەلەرىن زاڭسىز باسىپ الۋعا قارسى كۇرەس تۋرالى كونۆەنتسيا مەن ونى تولىقتىراتىن حاتتامانى راتيفيكاتسيالاۋ تۋرالى زاڭ جوباسى دا كوپتەگەن سۇراقتار بەرىلىپ, ءبىرشاما ماسەلەلەرى تۇسىندىرىلگەن سوڭ ماقۇلداندى.
سونداي-اق كەشەگى وتىرىستا «قازاقستان رەسپۋبليكاسىنىڭ كەيبىر كونستيتۋتسيالىق زاڭدارىنا قازاقستان رەسپۋبليكاسىنىڭ اكىمشىلىك-اۋماقتىق قۇرىلىسى ماسەلەلەرى بويىنشا وزگەرىستەر ەنگىزۋ تۋرالى» كونستيتۋتسيالىق زاڭ جوباسىنا, «قازاقستان رەسپۋبليكاسىنىڭ كەيبىر زاڭنامالىق اكتىلەرىنە قازاقستان رەسپۋبليكاسىنىڭ اكىمشىلىك-اۋماقتىق قۇرىلىسى ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» زاڭ جوباسىنا, «2018-2020 جىلدارعا ارنالعان رەسپۋبليكالىق بيۋدجەت تۋرالى» قازاقستان رەسپۋبليكاسىنىڭ زاڭىنا وزگەرىستەر مەن تولىقتىرۋلار ەنگىزۋ تۋرالى» زاڭ جوباسىنا, «قازاقستان رەسپۋبليكاسىنىڭ كەيبىر زاڭنامالىق اكتىلەرىنە دەنە شىنىقتىرۋ جانە سپورت ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» زاڭ جوباسىنا جانە «قازاقستان رەسپۋبليكاسىنىڭ ۇكىمەتى مەن ءۇندىستان رەسپۋبليكاسىنىڭ ۇكىمەتى اراسىنداعى بىرىككەن ۇلتتار ۇيىمىنىڭ ليۆانداعى ۋاقىتشا كۇشتەرىندەگى (بۇۇلۋك) ۇندىستاندىق باتالون قۇرامىندا قازاقستاندىق بىتىمگەرشىلىك كونتينگەنتتى بىرلەسىپ ورىستەتۋ ءتارتىبى تۋرالى ءوزارا تۇسىنىستىك تۋرالى مەموراندۋمدى راتيفيكاتسيالاۋ تۋرالى» زاڭ جوباسىنا قورىتىندى ازىرلەۋ مەرزىمدەرى بەلگىلەندى.
كۇن تارتىبىندەگى ماسەلەلەر قارالىپ بولعان سوڭ دەپۋتاتتاردىڭ ورتالىق اتقارۋشى ورگاندارعا جولدايتىن ساۋالدارى جاريالاندى.
جاقسىباي سامرات,
«ەگەمەن قازاقستان»
