فەستيۆالگە الىس-جاقىن شەتەل تەاترلارىنان 150 سپەكتاكل قاتىسقان. ۇيىمداستىرۋ القاسى ءۇش ىرىكتەۋ كەزەڭىن وتكىزىپ, سوڭعى سىناقتا تەك سەگىز تەاتردىڭ قويىلىمىن ساراپقا سالعان. ازاماتتىڭ ايتۋىنشا, يدەياسى دا, تاقىرىبى دا ءار الۋان, ءار ءتۇرلى رەجيسسەرلىك قولتاڭبامەن قويىلعان ءار باعىتتاعى سەگىز سپەكتاكلدىڭ وزىعىن تانۋ قازىلار القاسىنا وڭايعا سوقپاعان. قازاق ەلى اتىنان «28 تەاترى» نەمىس دراماتۋرگى گەورگ بيۋحنەردىڭ «ۆويتسەك» سپەكتاكلىمەن قاتىستى. سپەكتاكلدى جاس رەجيسسەر دينا جۇماباي ساحنالاعان. ازاماتتىڭ تەاترى بۇل بايگەدە باس جۇلدەمەن بىرگە «ەڭ ۇزدىك اكتەرلىك انسامبل» دەگەن اتالىمدى دا جەڭىپ الدى.
«ۆويتسەك» سپەكتاكلىندە ۆويتسەك – ازامات ساتىبالدى, ماريا – اجارلىم باقىتجانوۆا, تامبۋرماجور – اسان ءماجيت, دارىگەر – دانيار بازارقۇلوۆ, كاپيتان – ءالي مارات, نۇرجان ابۋباكىر سەكىلدى تانىمال تەاتر اكتەرلەرى وينايدى. قازىلار قۇرامىندا بولعان كسرو حالىق ءارتيسى, «لەنكومنىڭ» بايىرعى اكتريساسى ليۋدميلا شاشكينا جانە وزگە ەلدەردىڭ بەلگىلى تەاتر سىنشىلارى دا قازاقستاننان كەلگەن تالانتتى جاستاردىڭ جۇمىسىنا جوعارى باعا بەردى. «بۇل قازاقستانداعى تەاتر ونەرىنىڭ جوعارى دەڭگەيدە دامىپ كەلە جاتقانىنىڭ ايقىن كورىنىسى», دەستى ولار.
«ۆويتسەك» – ءالى كۇنگە وزەكتىلىگىن جويماعان الەم دراماتۋرگياسىنىڭ جاۋھارى. قاتىگەز ومىردەگى قاراپايىم كەيىپكەردىڭ باسىنان وتكەن قاسىرەتكە تولى تاعدىرىن عاسىردان استام ۋاقىت بويى جۇزدەگەن رەجيسسەر وزىنشە جىرلاپ كەلەدى. اناسىنان ادال تۋعان, پەرىشتەدەي پاك ۇلدى اينالاسىنىڭ ءبارى الدادى, ماڭايى مازاق قىلدى, بىرتىندەپ ساتتى, ەڭ اقىرى تۇتاستاي تەرىس اينالدى. اشىنۋ, جاۋىعۋ, قىزعانىش سەزىمدەرى اقىرى ۆويتسەكتى ءوزىن قورلاعانداردان كەك الۋعا جەتەلەدى. ءبىر كەزدە ءوزى جاقسى كورگەن, سەنگەن, قۇدايداي تابىنعان جاقىن ادامدارىنا قىزعانىشتىڭ قارا قانجارىن سۇعىپ العانىمەن قويماي, جايباراقات جۇرە بەرەتىن سەزىمسىز, جۇرەكسىز تاسمۇسىنگە اينالدى...
قاسىرەتتى درامانىڭ قازاق تەاترى ساحنالاعان نۇسقاسىنىڭ قازىلار القاسىنىڭ نازارىن اۋدارۋىنا جاس رەجيسسەردىڭ جاڭاشىل باعىتتى, وزگەشە وي جۇيەسىمەن قۇرعان سونى ءپىشىندى تاڭداعانى سەبەپ بولعانى انىق.
ايگۇل احانبايقىزى,
«ەگەمەن قازاقستان»
الماتى
