بايقاۋدىڭ رەسمي سايتىندا جاريالانعانداي, «ايكا» كينوتۋىندىسى رەسەيلىك كونستانتين حابەنسكيدىڭ دەبيۋتتىك جۇمىسى – «سوبيبور», بەلارۋس كينو ءونىمى – داريا جۋكتىڭ «حرۋستال», ۋكرايندىق سەرگەي لوزنيتسانىڭ «دونباسس» جانە قىتاي رەجيسسەرى تسزيان ۆەنيانىڭ «قۇپيا ادام» (Hidden Man) فيلمدەرىمەن بىرگە «ۇزدىك شەتەلدىك فيلم» اتالىمىندا سايىسقا تۇسەتىن بولادى. اتالعان نوميناتسيا بويىنشا باق سىنايتىن «وسكار» سىيلىعىنان ۇمىتكەر بەس كارتينانىڭ ىشىنەن سۋىرىلىپ شىققان ۇزدىكتىڭ ەسىمى كينوسۇيەر قاۋىمعا 2019 جىلدىڭ 24 اقپانىنداعى 91-ءشى «وسكار» سىيلىعىن تابىستاۋ راسىمىنە ارنالعان سالتاناتتى جيىندا جاريا ەتىلەدى.
«بۇل – الەمدىك وتە بەدەلدى سىيلىق جانە ونىڭ بىرقاتار تالاپتارى بار. قازاقستان اتىنان قاتىسۋعا تالاي شەتەلدىك بەدەلدى كينوبايقاۋلاردا جەڭىس تۇعىرىنان كورىنىپ جۇرگەن وتاندىق رەجيسسەر ءامىر بايعازين لايىقتى ۇمىتكەر بولار ەدى, بىراق ۋاقىت تالابىنا بايلانىستى ونىڭ ءفيلمىن كەلەسى جىلى عانا ۇسىنا الامىز. ال «ايكا» تۋىندىسى – ۋاقىتى, مارتەبەسى جاعىنان ەڭ قولايلى ءونىم بولىپ وتىر. اتالعان كارتينانىڭ «كانن كينوفەستيۆالىنىڭ جەڭىمپازى» دەگەن اتاعى بار جانە شىن مانىندە ناسيحاتتالۋى ءتيىس ساپالى فيلم. قازاقستان ءۇشىن «ايكا» ءفيلمىن «وسكارعا» ۇسىنۋ – ۇلكەن مارتەبە», دەدى مادەنيەت جانە سپورت ۆيتسە-ءمينيسترى اقتوتى رايىمقۇلوۆا حالىقارالىق كينوفەستيۆالدارعا ارنالىپ ۇيىمداستىرىلعان كەزەكتى ءباسپاسوز جيىنىندا.
نازەركە جۇماباي,
«ەگەمەن قازاقستان»
