جولداۋدا قازاقستاندىقتاردىڭ الەۋمەتتىك جاعدايلارىن جاقسارتا وتىرىپ, ءومىر ءسۇرۋ ساپاسىن جوعارى دەڭگەيگە كوتەرۋگە باسىمدىق بەرىلگەن. ول ءۇشىن ءاربىر ازامات تۇراقتى جۇمىسپەن قامتاماسىز ەتىلىپ, وتباسىلىق كىرىس كوزدەرىنىڭ بىركەلكىلىگى ساقتالۋى قاجەت. سوندا ەلدىڭ ىشكى الەۋمەتتىك دامۋ كورسەتكىشى تۇراقتالىپ, مەملەكەتتىك تۇرعىداعى الەۋەتىمىز ارتا تۇسەدى.
ەلباسىنىڭ سوڭعى جولداۋىندا ايقىندالعان باعىت-باعدارلار بويىنشا جۇمىستار ءتيىستى دەڭگەيدە جۇزەگە اسىرىلسا, قازاقستان ازاماتتارىنىڭ تۇرمىسى تۇزەلۋى جالعاسىن تابا تۇسەدى. الايدا, مۇنداي تاپسىرمالاردى تياناقتى ورىنداۋ وڭاي شارۋا بولماسى تاعى بار. بۇل رەتتە قوعامدىق ءتارتىپتى قامتاماسىز ەتۋ ىسىندە قۇقىقتىق ءتارتىپ اسكەرلەرىنىڭ ءاربىر ءىس-ارەكەتى ايرىقشا ماڭىزعا يە. وعان پرەزيدەنت ن.نازارباەۆتىڭ ءوزى ءجىتى كوڭىل ءبولىپ, اسكەريلەردىڭ الەۋمەتتىك جاعدايلارىنىڭ وڭ شەشىلۋىنە مەملەكەتتىك تۇرعىدان زور قولداۋ كورسەتىلىپ كەلەدى. ەڭ باستىسى, «تۇرعىن ءۇي قاتىناستارى تۋرالى» زاڭعا وزگەرىستەر مەن تولىقتىرۋلار ەنگىزىلىپ, تۇرعىن ۇيمەن قامتاماسىز ەتۋ ماسەلەسى ءتۇيىنىن تارقاتۋدا. سونداي-اق اسكەريلەردىڭ بىلىكتىلىك ساناتى ءۇشىن دە قوسىمشا قارجى ءبولىندى. مۇنى اسكەري ماماننىڭ جاۋىنگەرلىك قىزمەتتى اتقارۋ بارىسىندا ىنتالاندىرۋ تەتىگى رەتىندە قاراستىرعان ءجون.
ويتكەنى, «قازاقستاندىقتاردىڭ ءال-اۋقاتىنىڭ ءوسۋى: تابىس پەن تۇرمىس ساپاسىن ارتتىرۋ» جولداۋىندا مەملەكەت باسشىسى قوعام تاراپىنان بىلدىرىلگەن سەنىم دەڭگەيى جانە حالىقتىڭ ءوزىن قاۋىپسىز سەزىنۋى پوليتسيا جۇمىسىن باعالاۋدىڭ نەگىزگى ولشەمدەرى بولۋعا ءتيىس ەكەندىگىن ايرىقشا اتاپ ءوتتى. سول ماقساتتا «قازاقستاننىڭ بۇكىل قالالارىن قوعامدىق قاۋىپسىزدىككە مونيتورينگ جۇرگىزۋ جۇيەلەرىمەن جابدىقتاۋ كەرەك» دەدى ن.نازارباەۆ.
سونىمەن قاتار, بيىلعى جولداۋدا پرەزيدەنت ەلىمىزدىڭ الەمدىك قاۋىمداستىق الدىنداعى ابىروي-بەدەلى مەن باعىندىرعان بەلەستەرىن دە تىلگە تيەك ەتتى. وسىعان وراي, قازاقستاننىڭ ىشكى قاۋىپسىزدىگىن قامتاماسىز ەتۋدەگى نەگىزگى كۇشتىك قۇرىلىم رەتىندە ۇلتتىق ۇلان الىس-جاقىن ەلدەرمەن ارىپتەستىگىن تەرەڭدەتىپ, حالىقارالىق شەڭبەردە تاجىريبە الماسۋ ءىسىن ىلگەرىلەتىپ كەلەدى.
ايتالىق, وسى جىلدىڭ وزىندە-اق, ۇلتتىق ۇلان باس قولباسشىلىعىنىڭ قولباسشىلىعى تۇركيا رەسپۋبليكاسىنىڭ جاندارمەرياسىنىڭ باسشىلىعىمەن رەسمي كەزدەسۋ وتكىزىپ, ءوزارا ىنتىماقتاستىقتىڭ جاي-كۇيىن تالقىلادى. سول سياقتى اسكەري باعىتتا ءبىلىم بەرۋ ءىسى مەن مامانداردى وقىتۋ ماسەلەسىن دە ورتاق شەشىم تاۋىپ, ءتىپتى, جاندارمەريا مەن اسكەري دارەجەلى قۇقىق قورعاۋ ورگاندارىنىڭ جەرورتا تەڭىزى مەن ەۋروپالىق قاۋىمداستىعى (FIEP) ۇيىمىمەن ارىپتەستىكتى نىعايتۋ تۋرالى دا مامىلەس جاساستى. وعان قوسا, رەسەي فەدەراتسياسىنىڭ ۇلتتىق ۇلانى, قىتاي حالىق رەسپۋبليكاسىنىڭ حالىقتىق قارۋلانعان پوليتسياسى, ازەربايجان مەن بەلارۋس رەسپۋبليكالارىنىڭ ءىىم ىشكى اسكەرلەرى ۆەدومستۆولارىمەن ەكىجاقتى ىنتىماقتاستىق جۇيەلى تۇردە نىعايىپ كەلەدى.
جالپى, بيىلعى جولداۋدا ەلىمىزدىڭ ەكونوميكالىق دامۋى مەن قوعامدىق-الەۋمەتتىك الەۋەتىمىزدىڭ ارتۋى ءۇشىن كەز-كەلگەن سالادا كاسىبي بىلىكتىلىككە باسىمدىق بەرىلگەنىن ەسكەرسەك, ۇلتتىق ۇلاننىڭ اسكەري يدەولوگيالىق باعىتى پرەزيدەنت جولداۋىندا كورسەتىلگەن باعىت-باعدارلارمەن ءوزارا ۇشتاستىرىلعان. ۇلتتىق ۇلاننىڭ 2017-2019 جىلدارعا ارنالعان دامۋ باعدارلاماسىنا ساي, قولباسشىلىقتىڭ بارلىق قۇرامىندا «2018 جىل – كاسىبي بىلىكتىلىك جىلى» رەتىندە بەكىتىلىپ, اسكەريلەردىڭ كاسىبي-بىلىكتىلىك دايىندىعىن ارتتىرۋعا باسا كوڭىل بولىنۋدە. سەبەبى, دايىندىعى مىعىم, بىلىكتىلىگى جوعارى مامان كەز-كەلگەن ساتتە تۋىنداعان ماسەلەنىڭ شەشىمىن وڭاي تاۋىپ, تۇيىندە تەز تارقاتاتىنى بەلگىلى.
رۋسلان جاقسىلىقوۆ,
ۇلتتىق ۇلانىنىڭ باس قولباسشىسى
