مەرەكەلىك ماركالاردا قازاقستاننىڭ تۇڭعىش ماركاسى – «التىن سارباز», قازاقستانداعى ءبىرىنشى پوشتا تەلەگراف-كەڭسەسى جانە «قازپوشتانىڭ» جەتىستىكتەرى مەن «بولاشاقتاعى پوشتا بالالار كوزىمەن» سۋرەتتەرى بەينەلەنگەن.
اقپارات جانە كوممۋنيكاتسيالار ءمينيسترى داۋرەن اباەۆ پوشتا قىزمەتكەرلەرىن ءتول مەرەكەلەرىمەن قۇتتىقتاپ, تولاعاي تابىس تىلەدى. «بارشاڭىزدى بۇگىنگى پوشتا كۇنىمەن جانە مەرەيتويلارىڭىزبەن شىن جۇرەكتەن قۇتتىقتايمىن. سىزدەر تاريحى مەن وزىنە ساي ءداستۇرى قالىپتاسقان ۇيىم قۇرا بىلدىڭىزدەر. 25 جىلدا ۇلكەن بەلەستى باعىندىرىپ, زامان تالابىنا ساي وزگەردىڭىزدەر. تسيفرلاندىرۋ داۋىرىندە تسيفرلى پوشتانى ىسكە قوستىڭىزدار», دەدى مينيستر.
«قازپوشتا» اق باسقارما توراعاسى ساكەن سارسەنوۆ ماركالاردىڭ بەلگى عانا ەمەس, ەلىمىزدىڭ ماقتانىش ەتەتىن نىشاندارى ەكەنىن اتاپ ءوتتى. «بۇگىن دۇنيەجۇزىلىك پوشتا كۇنىندە اقپارات جانە كوممۋنيكاتسيالار مينيسترلىگى مەن «قازپوشتا» بىرلەسىپ قازاقستان پوشتاسىنىڭ 25 جىلدىق مەرەيتويىنا ارنالعان پوشتا ماركالار بلوگىن اينالىمعا شىعارۋعا دايىن. ءتورت ماركادا قازاقستاندىق پوشتانىڭ جارقىن بەتتەرى بەينەلەنگەن», دەي كەلە 23 مىڭنان اسا پوشتا قىزمەتكەرلەرىن قۇتتىقتادى. سونداي-اق بولاشاقتا اتقارار شارۋا كوپ ەكەنىن ناقتىلاي كەتتى.
قۇتتىقتاۋ سوزدەردەن كەيىن داۋرەن اباەۆ پەن ساكەن سارسەنوۆ ەكى ماركاعا شتەمپەلدىك بەلگى باسىپ, قول قويدى. ءۇشىنشى جانە ءتورتىنشى ماركالارعا بەلگىنى 1977 جىلدان باستاپ 2018 جىلعا دەيىن پوشتا سالاسىندا ۇزاق جىلدار بويى ەڭبەك ەتىپ, «قۇرمەتتى بايلانىسشى» دەگەن توسبەلگىمەن ماراپاتتالعان سۆەتلانا تسۆەتوۆا مەن پوشتا سالاسىنداعى ەڭبەك جولىن باستاعانىنا ءۇش اي بولعان جاس مامان الىشەر ساتىبالدين باستى. قازاق پوشتاسىنىڭ 25 جىلدىعىنا ارنالعان بەلگى – بۇگىنگى كۇنگە دەيىن شىعارىلعان 1128-ءىنشى ماركا.
اقمارال اعزامقىزى,
«ەگەمەن قازاقستان»
