قازاقستان رەسپۋبليكاسى پرەزيدەنتىنىڭ 2018 جىلعى 9 تامىزداعى № 731 جارلىعىنا سايكەس, 2018 جىلدىڭ 5 قازانىندا شىمكەنت قالاسىندا قازاقستان پارلامەنتى سەناتىنىڭ دەپۋتاتتارىن سايلاۋ وتكەنى بەلگىلى.
ورتالىق سايلاۋ كوميسسياسىنىڭ مالىمەتىنشە, سايلاۋعا بارلىعى 6 ۇمىتكەر قاتىستى, ونىڭ ىشىندە 2 ادامدى قالا ءماسليحاتى ۇسىنسا, 4 ادام ءوزىن-ءوزى ۇسىنۋ تارتىبىمەن سايلاۋعا ءتۇستى. سايلاۋ قورىتىندىسى بويىنشا 2014 جىلعى 1 قازاندا سايلانعان پارلامەنت سەناتى دەپۋتاتتارىنىڭ وكىلەتتىك مەرزىمىنە دارحان امانگەلدى ۇلى ساتىبالدى, 2017 جىلعى 28 ماۋسىمدا سايلانعان پارلامەنت سەناتى دەپۋتاتتارىنىڭ وكىلەتتىك مەرزىمىنە نۇرلان قۇديار ۇلى بەكنازاروۆ سايلاندى.
سونىمەن قاتار قازاقستان رەسپۋبليكاسىنىڭ كونستيتۋتسيالىق زاڭىنىڭ 101-بابى «قازاقستان رەسپۋبليكاسىنداعى سايلاۋ تۋرالى» زاڭىنا سايكەس اعىمداعى جىلدىڭ 28 قازانىندا 83 وكرۋگ بويىنشا شىعىپ قالعان ءماسليحات دەپۋتاتتارىنىڭ ورنىنا سايلاۋ وتەدى. 12 وبلىستىق, 9 قالالىق, 62 اۋداندىق ءماسليحات دەپۋتاتى سايلانادى.
وسك حابارلاۋىنشا, ءماسليحات سايلاۋىنا بارلىعى 284 كانديدات ۇسىنىلىپ, 249 كانديدات تىركەلگەن. تىركەلگەن كانديداتتاردىڭ 177-ءى (71,1%) ەرلەر, 72-ءى (28,9%) ايەلدەر. ۇمىتكەرلەر اراسىندا بارلىعى 8 ۇلت وكىلدەرى بار. كانديداتتاردىڭ ورتاشا جاسى – 41,8 جاس. 219 ۇمىتكەردىڭ (88%) جوعارى ءبىلىمى, 24-ءنىڭ (9,6%) ارناۋلى ورتا جانە 6-ۋىنىڭ (2,4%) ورتا ءبىلىمى بار. 13-ءى (5,2%) – مەملەكەتتىك قىزمەتشى, 97-ءسى (39%) – مەملەكەتتىك كاسىپورىنداردىڭ قىزمەتكەرلەرى, 127-ءسى (51%) – كوممەرتسيالىق قۇرىلىمداردىڭ قىزمەتكەرلەرى, 10 ادام (4%) ساياسي پارتيالاردىڭ جانە ۇەۇ قىزمەتكەرى, 1 ادام (0,4 %) ۋاقىتشا جۇمىس ىستەمەيدى, 1 ۇمىتكەر (0,4%) – زەينەتكەر.
تىركەۋ مەرزىمى اياقتالعاننان كەيىن كانديداتتاردىڭ بارلىعى قازاننىڭ 26 كۇنىنىڭ سوڭىنا دەيىن جالعاساتىن سايلاۋالدى ۇگىت-ناسيحاتقا كىرىستى. سايلاۋ كۇنى الدىنداعى جانە داۋىس بەرۋ كۇنى سايلاۋ الدىنداعى ۇگىت-ناسيحات جۇرگىزۋگە تىيىم سالىنادى. سايلاۋ كامپانياسى سايلاۋ زاڭناماسى نورمالارىنىڭ تالاپتارىنا سايكەس ءوتۋى ءتيىس, دەپ حابارلادى ورتالىق سايلاۋ كوميسسياسىنىڭ ءباسپاسوز قىزمەتى.
