ەلباسى حالىققا ارناعان جولداۋىندا اگروونەركاسىپتىك كەشەنگە ارنايى توقتالىپ, وسى سالانىڭ بۇكىل الەۋەتىن تولىعىمەن پايدالانۋ كەرەكتىگىن ايتتى. وتە ورىندى ماسەلەلەر قامتىلدى. سەبەبى ەلىمىزدىڭ اوك الەۋەتى وتە زور. ونى تولىق پايدالانۋ ءۇشىن ەلباسى ايتىپ وتكەندەي, ءتيىستى اگروتەحنولوگيالاردىڭ بارلىعىن قولدانۋىمىز كەرەك, سوندا مول ونىمگە قول جەتكىزەمىز. استىقتىڭ ونىمدىلىگىن, شىعىمدىلىعىن ارتتىرا الامىز.
مەملەكەت باسشىسى مىسال رەتىندە «اتامەكەن اگرو» اياسىندا جۇزەگە اسىرىلىپ جاتقان شارۋالاردى ايتىپ ءوتتى. ءبىز باراەۆ ورتالىعى «اتامەكەن اگرو» شارۋا قوجالىعىمەن بىرلەسىپ, 500 گەكتار جەرگە باراەۆ ورتالىعىنىڭ بيداي سورتىن ەكتىك. ناتيجەسىندە قوجالىق جوعارى ونىمگە قول جەتكىزدى. بۇگىندە ولار 40-60 تسەنتنەردەن استىق الىپ وتىر.
بيىلدان باستاپ ا.باراەۆ اتىنداعى استىق شارۋاشىلىعى عىلىمي وندىرىستىك ورتالىعىندا 3 مىڭ گەكتار جەردە دالمە-ءدال ەگىنشىلىك جوباسى جۇزەگە اسىرىلۋدا. العاشقى ءونىمدى دە الدىق. دالمە-ءدال ەگىنشىلىك جوباسىنىڭ ءمانىسى – تسيفرلى تەحنولوگيالاردى قولدانۋ, جۇيەنى اۆتوماتتاندىرۋ, سول ارقىلى مول ونىمگە قول جەتكىزۋ. العاشقى قورىتىندىسى بويىنشا دالمە-ءدال ەگىنشىلىك تەحنولوگياسىنىڭ ۇلكەن پايدا بەرەتىنىنە كوز جەتكىزدىك. بىرىنشىدەن, جىل سايىن تىڭايتقىشقا جۇمسالاتىن شىعىن 20 پروتسەنتكە ازايدى, حيميكاتتارعا جۇمسالاتىن شىعىن كولەمى دە 40 پروتسەنتكە كەمىدى. ونىمدىلىك بىلتىر 10-11 تسەنتنەر شاماسىندا بولسا, بيىل گەكتارىنا ورتاشا ەسەپپەن 26,6 تسەنتنەردەن شىقتى. ياعني 1-1,5 ەسەگە جۋىق ارتىق ءونىم الىپ وتىرمىز. مۇنىڭ بارلىعى دالمە-ءدال ەگىنشىلىك جوباسىنىڭ, زاماناۋي اگروتەحنولوگيانىڭ ارقاسى. ەلباسى بۇل ماسەلەگە دەر كەزىندە ءمان بەرىپ وتىر. ەلىمىزدىڭ اۋىلشارۋاشىلىق تاۋارىن وندىرۋشىلەر وسى ماسەلەگە ءمان بەرسە, اگروونەركاسىپتىك كەشەننىڭ الەۋەتى قۋاتتى بولارى ءسوزسىز.
كەنجە ابدۋللاەۆ,
ا.باراەۆ اتىنداعى استىق شارۋاشىلىعى عىلىمي-وندىرىستىك ورتالىعىنىڭ باس ديرەكتورى, اۋىل شارۋاشىلىعى عىلىمدارىنىڭ دوكتورى, پروفەسسور
