سۋرەت پرەزيدەنتتىڭ ءباسپاسوز قىزمەتىنەن الىندى
ءراسىم بارىسىندا ن.نازارباەۆقا قىتاي حالىق رەسپۋبليكاسىنىڭ توتەنشە جانە وكىلەتتى ەلشىسى چجان سياو, يسپانيا كورولدىگىنىڭ توتەنشە جانە وكىلەتتى ەلشىسى داۆيد ارتۋرو كارريەدو توماس, يزرايل مەملەكەتىنىڭ توتەنشە جانە وكىلەتتى ەلشىسى ليات ۆەكسەلمان, سلوۆاكيا رەسپۋبليكاسىنىڭ توتەنشە جانە وكىلەتتى ەلشىسى ميلان كوللار جانە ەۋروپا وداعىنىڭ توتەنشە جانە وكىلەتتى ەلشىسى سۆەن-ولوۆ كارلسسون سەنىم گراموتاسىن تاپسىردى.
«سىزدەردىڭ ميسسيالارىڭىزدىڭ باستالۋى ەل دامۋىنىڭ ماڭىزدى كەزەڭىمەن تۇسپا-تۇس كەلىپ وتىر. ءبىزدىڭ ستراتەگيالىق باعىتىمىز – الەمنىڭ وزىق دامىعان 30 ەلىنىڭ قاتارىنا قوسىلۋ. وسىعان وراي, قاجەتتى باعدارلامالاردىڭ ءبارىن قابىلداپ, كەشەندى رەفورمالاردى جۇزەگە اسىرىپ كەلەمىز», دەدى مەملەكەت باسشىسى.
بۇدان كەيىن ەلباسى قازاقستاندا اتقارىلىپ جاتقان جۇمىستارعا توقتالىپ, ەلشىلەرگە ماڭىزدى ماسەلەلەردى تانىستىرا كەتتى. سونداي-اق ساياسي-ەكونوميكالىق, رۋحاني جاڭعىرۋ ەلىمىزدىڭ جاھاندىق باسەكەگە قابىلەتتىلىگىن ارتتىرۋ ماقساتىندا حالىققا جولداۋ جاريالاعانىن جەتكىزدى.
پرەزيدەنت الەمدىك داعدارىس كۇشەيگەن جاعدايدا سەنىمدى مەملەكەتارالىق قاتىناستار ورناتۋدىڭ ماڭىزدى ەكەنىن ايتتى. «جاقىندا نيۋ-يوركتە وتكەن بىرىككەن ۇلتتار ۇيىمى باس اسسامبلەياسىنىڭ كەزەكتى سەسسياسىندا كەيبىر ەلدەر اراسىندا «سەنىم داعدارىسىنىڭ» ودان ءارى ءورشي تۇسكەنى انىق بايقالدى. ءوزارا سەنىم ورنىقپاسا, داعدارىسقا قارسى كەز كەلگەن ءىس-قيمىلدىڭ وڭ ناتيجەسى بولمايدى», دەدى.
مەملەكەت باسشىسى حالىقارالىق جانە وڭىرلىك قاقتىعىستاردى رەتتەۋ ءۇشىن قازاقستاننىڭ جۇرگىزىپ وتىرعان كوپۆەكتورلىق ساياساتى مەن كۇش-جىگەرىنىڭ تيىمدىلىگىن اتاپ ءوتتى. سونىمەن قاتار قازاقستان بۇۇ قاۋىپسىزدىك كەڭەسىنىڭ تۇراقتى ەمەس مۇشەسى رەتىندە الەمدەگى قاۋىپسىزدىكتى ساقتاۋعا ءوز ۇلەسىن قوسىپ وتىرعانىن باسا ايتتى.
ەلباسى قازاقستان مەن قىتاي اراسىنداعى قارىم-قاتىناستاردىڭ قازىرگى جاعدايى مەن دامۋ پەرسپەكتيۆالارىنا ارنايى توقتالدى.
«قازاقستان قىتايمەن جان-جاقتى ستراتەگيالىق ىنتىماقتاستىقتى دامىتۋعا ەرەكشە ءمان بەرەدى. ديپلوماتيالىق بايلانىس ورناعان ساتتەن باستاپ ءبىز تاتۋ كورشىلىك جانە ءوزارا تۇسىنىستىك رۋحىندا دامىپ كەلە جاتقان مەملەكەتارالىق قاتىناستاردىڭ ۇلگىلى مودەلىن قۇردىق. بۇگىندە ەكى ەلدىڭ ۇكىمەتتەرى ءوزارا كەلىسىمدەردى جۇزەگە اسىرۋ ءۇشىن بەلسەندى جۇمىس اتقارۋدا. «نۇرلى جول» جاڭا ەكونوميكالىق ساياساتىن «جىبەك جولىنىڭ ەكونوميكالىق بەلدەۋى» باستاماسىمەن ۇشتاستىرۋ جونىندەگى ىنتىماقتاستىققا ەرەكشە كوڭىل ءبولىنىپ وتىر», دەدى مەملەكەت باسشىسى.
سونداي-اق ن.نازارباەۆ بيىل ەلىمىزدىڭ ەۋروپا وداعىمەن ديپلوماتيالىق بايلانىس ورناتقانىنا 25 جىل تولعانىن اتاپ ءوتىپ, ءوزارا قارىم-قاتىناس سىندارلى ديالوگقا نەگىزدەلگەنىن جەتكىزدى.
«قازىرگى باستى مىندەتىمىز – 2015 جىلى قول قويىلعان قازاقستان مەن ەۋرووداق اراسىنداعى كەڭەيتىلگەن ارىپتەستىك پەن ىنتىماقتاستىق تۋرالى كەلىسىمدى جۇزەگە اسىرۋ. سونداي-اق بريۋسسەلدىڭ ورتالىق ازيا ەلدەرىنە قاتىستى جاڭا ستراتەگياسىن ازىرلەۋگە كۇش جۇمىلدىرۋ كەرەك. ءبىز قازاقستان مەن ەۋرووداق اراسىنداعى ۆيزالىق رەجىمدى جەڭىلدەتۋ ماسەلەسى دۇرىس شەشىمىن تابادى دەپ سەنەمىز», دەدى پرەزيدەنت.
راسىمگە قاتىسۋشىلار الدىندا سويلەگەن سوزىندە مەملەكەت باسشىسى قازاقستان مەن يسپانيا اراسىنداعى قاتىناستاردىڭ ستراتەگيالىق سيپاتىن اتاپ ءوتتى.
«2017 جىلى ماۋسىم ايىندا ۇلى مارتەبەلى يسپانيا كورولى VI فەليپە قازاقستانعا العاشقى رەسمي ساپارمەن كەلىپ, ەكسپو-2017 حالىقارالىق كورمەسىنىڭ اشىلۋىنا قاتىستى. ءوزارا كەلىسىمدى جۇزەگە اسىرۋعا ەكونوميكا جانە ونەركاسىپ سالاسىنداعى ىنتىماقتاستىق تۋرالى ۇكىمەتارالىق كوميسسيا مەن ىسكەرلىك كەڭەس زور ۇلەس قوسىپ كەلەدى», دەدى.
بۇدان كەيىن ەلباسى ەكونوميكانىڭ ءتۇرلى سەكتورىندا قازاقستان مەن يزرايل اراسىنداعى قاتىناستاردى ودان ءارى دامىتۋعا مۇددەلى ەكەنىن ءبىلدىردى. «2016 جىلى يزرايل پرەمەر-ءمينيسترى بينيامين نەتانياحۋدىڭ قازاقستانعا رەسمي ساپارى جانە سونىڭ بارىسىندا وتكەن بيزنەس-فورۋم ءوزارا ىقپالداستىعىمىزدىڭ اياسىن كەڭەيتۋگە تىڭ سەرپىن بەردى. ءبىز ءوزارا قاتىناستارىمىزدى, اسىرەسە اۋىل شارۋاشىلىعى, يننوۆاتسيالىق تەحنولوگيالار جانە دەنساۋلىق ساقتاۋ سالالارىن ودان ءارى دامىتۋعا مۇددەلىمىز», دەدى مەملەكەت باسشىسى.
سونداي-اق سلوۆاكيامەن ىنتىماقتاستىقتىڭ وڭ قارقىنىن اتاپ ءوتىپ, ەكى ەل اراسىنداعى ساۋدا اينالىمىن ارتتىرۋدىڭ جانە ەكونوميكالىق ىنتىماقتاستىقتىڭ جاڭا باعىتتارىن دامىتۋدىڭ ماڭىزدى ەكەنىن ايتتى.
«ساۋدا-ەكونوميكالىق بايلانىستاردى نىعايتۋعا ەكونوميكالىق جانە عىلىمي-تەحنيكالىق ىنتىماقتاستىق جونىندەگى ۇكىمەتارالىق كوميسسيا زور ۇلەس قوسىپ كەلەدى. بولاشاقتا بىزگە تاۋار اينالىمىن ۇلعايتىپ, ءوزارا ەكونوميكالىق قاتىناستاردى دامىتۋدىڭ جاڭا باعىتتارىن ايقىنداۋ قاجەت», دەدى ن.نازارباەۆ.
ءراسىم سوڭىندا مەملەكەت باسشىسى ديپلوماتتاردى قازاقستانداعى جاۋاپتى ميسسيالارىنىڭ باستالۋىمەن تاعى دا قۇتتىقتادى.
اباي اسانكەلدى ۇلى,
«ەگەمەن قازاقستان»
