سەنات باسشىسى ەلباسىنىڭ تاريحي ماڭىزى زور, ستراتەگيالىق جولداۋىندا ەلىمىزدىڭ تىنىس-تىرشىلىگىنىڭ بارلىق سالالارى بويىنشا بۇگىنگى كۇننىڭ وتكىر ماسەلەلەرىنە تەرەڭ تالداۋ جاسالعانىن اتاپ ءوتتى.
«پرەزيدەنت جولداۋىندا حالىقتىڭ ءال-اۋقاتىن جاقسارتۋ, دەنساۋلىعىن ساقتاۋ بويىنشا جۇمىستى جالعاستىرۋدىڭ قاجەتتىلىگىنە باسا نازار اۋدارىلدى. ەڭ اۋقىمدى ماسەلەلەردىڭ شەشۋ جولدارى ناقتى ايقىندالىپ, مەملەكەتتىك بيلىكتىڭ بارلىق تارماقتارىنا ماڭىزدى مىندەتتەر جۇكتەلدى», - دەدى ق.توقاەۆ.
مەملەكەتىمىزدىڭ ءوسىپ-وركەندەۋى مەن تىنىس-تىرشىلىگى ەلباسىنىڭ تۇراقتى نازارىندا ەكەنىن ايتا كەلىپ, سەنات توراعاسى جولداۋدا حالىقتىڭ ءاربىر قاجەتتىلىگى انىق كورسەتىلگەنىن جانە ونى شەشۋ تاسىلدەرى ايقىندالعانىنا توقتالدى.
جوعارعى پالاتا باسشىسى زاڭ ۇستەمدىگىن قامتاماسىز ەتۋ جانە قۇقىقتىق رەفورمانى بەلسەندى ىسكە اسىرۋعا ايرىقشا ءمان بەرىلگەنىن اتاپ ءوتتى. وسىعان بايلانىستى پالاتا دەپۋتاتتارىنا ناقتى تاپسىرمالار بەرىلدى.
«ەلباسىنىڭ العا قويعان اۋقىمدى مىندەتتەرىن ءتيىمدى جۇزەگە اسىرۋ – قابىلداناتىن زاڭداردىڭ ساپاسىنا تىكەلەي بايلانىستى. وسى باعىتتا سەنات بەلسەندى تۇردە قىزمەت اتقارۋى ءتيىس. جولداۋدى ىسكە اسىرۋ بويىنشا بەكىتىلەتىن جالپى ۇلتتىق جوسپار نەگىزىندە سەناتتىڭ ءتيىستى جوسپارى قابىلداناتىن بولادى», - دەدى ق.توقاەۆ.
ەلباسىنىڭ جولداۋىن وڭىرلەردە جۇرتشىلىقپەن تالقىلاۋ ماقساتىندا 13-21 قازان ارالىعىندا ەلىمىزدىڭ ايماقتارىنا ءىس-ساپارعا شىعۋ تۋرالى دەپۋتاتتارعا تاپسىرما بەرىلدى.
الداعى كەزەڭدە پالاتانىڭ جۇمىسى قىزا تۇسەتىن بولادى. بيۋدجەتتى ناقتىلاۋ جونىندەگى زاڭ جوباسى مەن 2019-2021 جىلدارعا ارنالعان بيۋدجەت جوباسى قارالادى. ودان باسقا, 10-11 قازاندا الەمدىك جانە ءداستۇرلى دىندەر ليدەرلەرىنىڭ VI سەزى وتەدى.
بيۋرو وتىرىسىندا ماجىلىستەن تۇسكەن زاڭ جوبالارى ءبولىنىپ بەرىلدى. الەۋمەتتىك-مادەني دامۋ جانە عىلىم كوميتەتى «قازاقستان رەسپۋبليكاسىنىڭ ۇكىمەتى مەن حالىقارالىق قىزىل كرەست كوميتەتىنىڭ اراسىنداعى قازاقستان رەسپۋبليكاسىنداعى حالىقارالىق قىزىل كرەست كوميتەتى وكىلدىگىنىڭ مارتەبەسى, ارتىقشىلىقتارى جانە يممۋنيتەتتەرى تۋرالى كەلىسىمدى راتيفيكاتسيالاۋ تۋرالى» زاڭ جوباسى بويىنشا باس كوميتەت بولىپ بەلگىلەندى.
