ول ءوزىنىڭ ونەر جولىندا قازاقتىڭ نەبىر كۇمىس كومەي, جەزتاڭداي انشىلەرىمەن ارىپتەس بولدى. 1936 جىلى قازاق ونەرى مەن ادەبيەتىنىڭ ماسكەۋدە وتكەن ونكۇندىگىنە قاتىسىپ, ۇكىمەت ادامدارىنىڭ نازارىنا ىلىكتى. جابايدىڭ رەپەرتۋارىندا جالپى توقسانعا جۋىق ءان بولعان ەكەن. ونىڭ كوپشىلىگى ءبىرجاننىڭ, اقان سەرىنىڭ, جارىلعاپبەردىنىڭ, جاياۋ مۇسانىڭ اندەرى ەدى.
جابايدىڭ جاستىق شاعى وتە اۋىر جاعدايدا ءوتتى. اكە-شەشەدەن ءۇش جاسقا جەتپەي جەتىم قالعان جاس, بەسىكتەن بەلى شىقپاي جاتىپ كۇنكورىس قامىمەن بايدىڭ قوزىسىن باقتى. ون بەس جاسقا تولعاندا بويى ەكى جارىم كەز, ەكى يىعىنا ەكى كىسى مىنگەندەي جيىرما بەس جاستاعى جىگىت ءتارىزدى كورىندى. ەرجەتە كەلە ەرەن كۇش اتاسى جاباي سان رەت كۇرەسكە ءتۇسىپ جۇلدەلى ورىنداردى يەلەندى. ەكىباستۇز, قاراعاندى قالالارىنداعى شاحتالاردا جۇمىس ىستەدى. كەمەدە جۇكشى بولدى. ونىڭ:
ءبىر كەزدە تۇرمىس مەنى بيلەگەندى,
جوقشىلىق, مۇشكىل ءومىر يلەگەندى.
جۇرگەندە پاراحودتا قاپ ارقالاپ,
قابىرعام اۋىر جۇكتەن كۇيرەگەندى.
تالاي جىل جۇك كوتەرىپ ءجۇردىم قاجىپ,
وتىردىم تابىس جەتپەي جۇدەپ, ازىپ.
جۇباتقان وڭاشادا جان سەرىگىم,
دومبىرام, ولەڭىممەن بولعان ازىق, – دەگەن ولەڭ جولدارى مۇنى ايعاقتاي تۇسكەندەي. سودان 1916 جىلى مايداننىڭ قارا جۇمىسىنا الىنىپ ريگا قالاسىنىڭ تۇبىنەن ءبىر-اق شىقتى. اشتىق, اۋىر جۇمىس ەر جىگىتتى مويىتا المادى. ول امان-ەسەن ەلگە ورالىپ كوزدەگەن ماقساتىنا جەتتى. ۇكىمەت ونىڭ ەڭبەگىن جوعارى باعالاپ رەسپۋبليكالىق دارەجەدەگى زەينەتاقى تاعايىندادى. اندەرىن جەكە ديسك ەتىپ شىعارتتى. ءانشى, كومپوزيتور جاباي نۇرجان ۇلى توقسانعا قاراعان شاعىندا 1978 جىلى باياناۋىل اۋدانىنىڭ جاڭاتىلەك ەلدى مەكەنىندە دۇنيەدەن وزدى. قازاقستاننىڭ ەڭبەك سىڭىرگەن ءارتىسى جاباي نۇرجان ۇلىنىڭ تۋعانىنا كەلەر جىلى 130 جىل. ونىڭ سوڭىندا وشپەس ونەرى قالدى.
مۇحامەت-قايىر ءشارىپوۆ
پاۆلودار وبلىسى,
باياناۋىل اۋدانى
