وسىدان الپىس جىلعا جۋىق ۋاقىت بۇرىن العاشقى قوناقتارىن قابىلداعان قوناقۇيگە ءار جىلدارى قازاقتىڭ مايتالمان ونەر شەبەرلەرى, مەملەكەت جانە قوعام قايراتكەرلەرى سىندى كورنەكتى تۇلعالار ايالداعان. وتكەن كۇندەردىڭ ەستەلىگى رەتىندە «جامبىل» قوناقۇيىندە «كەڭەس كەزەڭىندەگى «جامبىل» قوناقۇيى» اتتى شاعىن مۋزەي اشىلدى. كوپتىڭ قىزىعۋشىلىعىن تۋدىرىپ وتىرعان بۇل مۋزەي – اۋليەاتا وڭىرىندەگى قوناقۇيلەردەگى العاشقى باستاما.
شاعىن مۋزەيدىڭ اشىلۋ سالتاناتىندا ءسوز العان جامبىل وبلىستىق تۋريزم باسقارماسىنىڭ باسشىسى قارلىعاش ارالبەكوۆا سوڭعى جىلدارى كوپتەگەن تۋريستەردىڭ مۋزەيلىك تۋريزم سالاسىنا قىزىعۋشىلىق تانىتىپ وتىرعاندىعىن اتاپ ءوتتى. «تالاي تاريحي ساتتەردى ەستە قالدىرۋ ماقساتىندا قوناقۇي جانىنان شاعىن مۋزەيدىڭ اشىلۋى قۇپتارلىق ءىس. قازىرگى تۋريستەر قاي وڭىرگە كەلسە دە, سول جەردەگى تاريحي ورىندارمەن تانىسۋعا قۇشتار. ەندى اۋليەاتا وڭىرىنە كەلگەن تۋريستەر «جامبىل» قوناقۇيىنە ايالداپ قانا قويماي, ءوڭىر تاريحىمەن دە جاقسى تانىسا الادى», دەدى ول.
سونىمەن قاتار شارا بارىسىندا «قاراحان» جۋرنالىنىڭ باس رەداكتورى ساتىبالدى دوسىمبەكوۆ تاريحي دەرەكتەر نەگىزىندە ءسوز سويلەپ, «جامبىل» قوناقۇيى مەن تاراز قالاسى تولە بي كوشەسىنىڭ بويىنداعى جامبىل جاباەۆ ەسكەرتكىشىنىڭ جىر الىبىنىڭ 115 جىلدىعىنا وراي ءبىر كۇندە اشىلعانىن ايتتى.
جۋىردا اشىلعان شاعىن مۋزەي كەڭەستىك ۇلگىدە جابدىقتالعان قوناقۇي بولمەسىندە ۇيىمداستىرىلعان. بولمەدەگى اسپالى شامدار, توسەك ورىندارى مەن جازۋ ۇستەلىنىڭ ءوزى وتكەن كۇننىڭ ەستەلىگىندەي بولىپ تۇر. ءبىر سوزبەن ايتقاندا, كونە شاھاردىڭ كەشەگى كەلبەتى بەينەلەنگەن شاعىن مۋزەي ەندىگى جەردە كوپتەگەن تۋريستەردىڭ قىزىعۋشىلىعىن وياتىپ, كونە تاراز تۋرالى ماعلۇمات الاتىن ورنىنا اينالاتىن بولادى.
حاميت ەسامان,
«ەگەمەن قازاقستان»
جامبىل وبلىسى
