ورتالىقتىڭ, جەرگىلىكتى ەكونوميكا جوعارى مەكتەبى مەن ق.جۇبانوۆ اتىنداعى اقتوبە وڭىرلىك مەملەكەتتىك ۋنيۆەرسيتەتىنىڭ اراسىندا ورناعان تىعىز ىنتىماقتاستىقتىڭ بارىسىندا, قازاقستان تاراپىنىڭ باستاماسىمەن اشىلعاندىعىن ايتۋ قاجەت.
ايدىنى كۇمىستەي جارقىراعان كوپتەگەن كانالدار كەلبەتىنە وزىندىك ەرەكشە سيپات بەرگەن ءوسىبىر جاسىل شاھاردىڭ كورىكتى جەرلەرىنىڭ بىرىندە ورىن تەپكەن وقۋ ورداسىنداعى شاراعا قالا باسشىسى رافال برۋسكي, قازاقستاننىڭ پولشاداعى ەلشىلىگىنىڭ كونسۋلى ازامات بالابەكوۆ, پولشانىڭ كۋياۆ – پومور ۆوەۆودتىعى شۋبين قالاسىنىڭ باسشىسى ارتۋر ميحالاك, ق.جۇبانوۆ اتىنداعى اقتوبە وڭىرلىك مەملەكەتتىك ۋنيۆەرسيتەتىنىڭ رەكتورى باۋىرجان ەردەمبەكوۆ, قاپشاعاي قالاسى اكىمدىگىنىڭ وكىلى ناتاليا نوسوۆا, سونىمەن قاتار قالا جوعارى وقۋ ورىندارىنىڭ پروفەسسورلىق-وقىتۋشىلىق قۇرامى, قازاقستاندىق جانە جەرگىلىكتى ستۋدەنتتەر قاتىستى.
العاشقى ءسوز الىپ, جيىندى اشقان ەكونوميكا جوعارى مەكتەبىنىڭ پرەزيدەنتى كشيشتوف سيكورا مىرزا ورتالىقتىڭ قازاق مادەنيەتىن ناسيحاتتايتىنىن تىلگە تيەك ەتىپ, قازاق-پولياك بايلانىستارىنىڭ ودان ءارى قارقىندى دامي بەرۋىنە تىلەكتەستىك بىلدىرسە, كەزەكتى بولىپ ءسوز سويلەگەن ەلىمىزدىڭ پولشاداعى كونسۋلى بۇگىنگى كۇنى قوس مەملەكەت اراسىنداعى قاتىناستاردى نىعايتۋعا قاجەتتى بارلىق جاعدايدىڭ جاسالعاندىعىن ايتا كەلىپ, تۇساۋكەسەرى وتكىزىلگەن «قازاق ەلى» مادەنيەت ورتالىعىنا مەملەكەتىمىز تۋرالى اقپاراتتىق سيپاتتاعى ەڭبەكتەردى, سونىمەن بىرگە اقىن-جازۋشىلارىمىزدىڭ كوركەم تۋىندىلارىن سىيعا تارتتى.
ەلىمىزدىڭ پاۆلودار قالاسىمەن باۋىرلاس قالا ستاتۋسىنداعى بىدگوشش شاھارىنىڭ باسشىسى بولسا گەوگرافيالىق تۇرعىدان ەكى مەملەكەتتىڭ الشاق ورنالاسقاندىعىنا قاراماستان, قازاق-پولياك بايلانىستارىنىڭ ۇزاق ءداستۇرى بار ەكەندىگىن ايتا كەلىپ, ورتالىقتىڭ سول بايلانىستاردى نىعايتا تۇسەتىندىگىنە سەنىم ءبىلدىردى. تانىمال ساياساتكەر ءوز ءسوزىنىڭ سوڭىن: «بايلانىستارىمىزدىڭ ەڭ ماڭىزدى قۇرامداسى – جاستار. ولار ءوز مادەنيەتىنىڭ وكىلى, شىنايى ەلشىسى قىزمەتىن اتقارادى» دەپ قورىتىندىلادى.
ال ق.جۇبانوۆ اتىنداعى اقتوبە وڭىرلىك مەملەكەتتىك ۋنيۆەرسيتەتىنىڭ رەكتورى باۋىرجان ەردەمبەكوۆ كەلەر جىلى اقتوبە وڭىرلىك ۋنيۆەرسيتەتىنىڭ بازاسىندا «پولياك مادەنيەت ورتالىعىن» اشۋ جوسپارلانعانىنان حاباردار ەتتى. سونىمەن بىرگە ول ءوزى باسقاراتىن وقۋ ورداسى مەن بىدگوشش ەكونوميكا جوعارى مەكتەبىنىڭ اراسىنداعى تىعىز ىنتىماقتاستىقتى ءسوز ەتىپ, سوڭعى بەس جىلدا «ەرازمۋس +» جانە «اكادەميالىق ۇتقىرلىق» باعدارلامالارىنىڭ اياسىندا ەلۋ شاقتى اقتوبەلىك ستۋدەنتتىڭ اتالعان ارىپتەس وقۋ ورنىندا ءبىلىم العاندىعىن ءمالىم ەتتى.
سالتاناتتى ءراسىمنىڭ سوڭىن الا مىنبەرگە كوتەرىلگەن شۋبين قالاسىنىڭ ءبۋرميسترى ارتۋر ميحالاك ءوزى باسقاراتىن شاعىن قالانىڭ قاپشاعاي قالاسىمەن ىنتىماقتاستىقتا ەكەندىگىن ايتا كەلىپ, ءوزى كۋا بولعان قازاق حالقىنا ءتان وزگە ءدىن جانە مادەنيەت وكىلدەرىنە دەگەن تولەرانتتىلىقتى, اتا-باباسىن جادىنان شىعارماۋ جانە شىققان تەگىن ءبىلۋ, قوناقجايلىلىق سىندى قاسيەتتەردى ەرەكشە ىجداھاتتىلىقپەن ءسوز ەتتى.
سالتاناتتى شارانىڭ سوڭى قاپشاعاي قالاسىنان ارنايى كەلگەن ءداستۇرلى ءانشى ءارى كۇيشى گۇلسىم بەكبوسىنوۆا مەن ق.جۇبانوۆ اتىنداعى اقتوبە وڭىرلىك مەملەكەتتىك ۋنيۆەرسيتەتى ونەرپازدارىنىڭ كونتسەرتتىك باعدارلاماسىنا ۇلاستى.
جاندوس اۋەلبەك ۇلى,
ارنايى «ەگەمەن قازاقستان» ءۇشىن
پولشا
بىدگوشش قالاسى
