– وڭىردە مۇنداي رەسۋرستىق ورتالىقتىڭ اشىلۋى – ءبىزدىڭ ۇستازدار قاۋىمى ءۇشىن ۇلكەن كومەك, زور مۇمكىندىك. ەندى ولار وزدەرىنىڭ تەوريالىق ءبىلىمىن ناقتى ءىس جۇزىندە پايدالانىپ, وقىتۋ ۇدەرىندە وزىق تەحنولوگيانى قولدانۋدى ۇيرەنەدى, عىلىم-ءبىلىمنىڭ جاڭا جەتىستىكتەرى مەكتەپ ومىرىنە ەنەدى. وسى جەردە ۇستازدار ءبىر بىرىمەن تاجىريبە الماسادى. سونداي-اق مۇندا ساباق بەرۋ ۇلگىلەرىن بەينەجازباعا ءتۇسىرىپ, اۋىل مەكتەپتەرىنە تاراتۋعا دا مۇمكىندىك بار. تسيفرلىق رەسۋرستاردى مەكتەپ ومىرىنە باتىل ەنگىزۋ – بۇگىنگى كۇننىڭ باستى تالابى بولىپ وتىر, - دەدى ورتالىقتىڭ اشىلۋ سالتاناتىنا ارنايى كەلگەن باتىس قازاقستان وبلىسى اكىمىنىڭ ورىنباسارى عابيدوللا وسپانقۇلوۆ.
ورالداعى رەسۋرستىق ورتالىق – ءبىلىم سالاسىن دامىتۋشى يننوۆاتسيالىق Bilim Media Group كومپانياسىنىڭ اق جايىق ۇستازدارىنا مەرەكەلىك تارتۋى بولدى. وسىلايشا ءوڭىر مۇعالىمدەرى bilimland.kz رەسپۋبليكالىق ءبىلىم جۇيەسىنە قوسىلدى.
2011 جىلى قۇرىلعان Bilim Media Group كومپانياسى بۇگىنگە دەيىن 40 مىڭنان استام بەينەساباق, 250 مىڭنان اسا ءبىلىم بەرۋدى جاڭارتۋ تەحنولوگياسىن تاراتقان. كومپانيانىڭ رەسۋرستىق ورتالىقتارى بۇعان دەيىن استانا, تالدىقورعان, شىمكەنت قالالارىندا اشىلعان ەكەن.
– جاڭا ورتالىقتا مۇعالىمدەر اقپاراتتاندىرۋ ورتالىعى مەن وبلىستىق ادىستەمەلىك كابينەت تۇزگەن كەستە بويىنشا ءبىلىم جەتىلدىرەتىن بولادى. وعان قوسا وسى جەردە مەكتەپ وقۋشىلارىنىڭ اتا-انالارىنا ارنالعان سەمينارلار دا وتكىزۋدى جوسپارلاپ وتىرمىز. جاڭا تەحنولوگيانىڭ كومەگىمەن ءبىزدىڭ مۇعالىمدەر ۇستازدىق شەبەرلىگىن بۇرىنعىدان دا ارتتىراتىنى ءسوزسىز, - دەيدى باتىس قازاقستان ءبىلىم باسقارماسىنىڭ باسشىسى شولپان قادىروۆا.
قازبەك قۇتتىمۇرات ۇلى,
«ەگەمەن قازاقستان»
باتىس قازاقستان
