سولاردىڭ قاتارىندا ءوزىمنىڭ نازارىمدى اۋدارعان بىرنەشە ماسەلە بار. ول ارينە ءوز سالاما بايلانىستى. پرەزيدەنتتىڭ اۋىل شارۋاشىلىعى سالاسىنداعى ەڭبەك ونىمدىلىگىن ارتتىرۋ ءۇشىن تەحنيكالىق جابدىقتاردى بارىنشا جاڭارتۋ, سوڭعى تەحنولوگيالاردى ۇنەمى قولدانىسقا ەنگىزىپ وتىرۋ, جىل سايىن قوسىمشا وسى سالاعا 100 ملرد دوللار كولەمىندە قارجى ءبولۋ تۋرالى ايتقاندارى كوڭىلىمە قوندى. سونداي-اق دايىن اۋىل شارۋاشىلىعى ونىمدەرىن ەكسپورتتاۋعا, اۋىل شارۋاشىلىعى عىلىمىن دامىتۋعا ەرەكشە كوڭىل اۋدارعانى قاتتى ۇنادى.
جالپى سوڭعى جىلدارى ەلىمىزدىڭ اۋىل شارۋاشىلىعىنىڭ اياقتانىپ كەتۋى ءۇشىن مەملەكەتتەن بولىنگەن قارجىنىڭ كولەمى ەكى ەسەگە ۇلعايعانىن ايتقىم كەلەدى. ماسەلەن, تەك عىلىمي جۇمىستاردى جۇرگىزىپ, سالانىڭ يننوۆاتسيالىق دامۋىنا 7 جارىم ملرد تەڭگە ءبولىندى. جاڭا تەحنولوگيالىق جابدىقتارمەن قامتۋعا مەملەكەتتەن 4 ملرد-تان استام, ال بازالىق قارجىلاندىرۋعا 2,5 ملرد تەڭگە ءبولىندى. جالپى العاندا, سالانىڭ عىلىمي دامۋى ءۇشىن زەرتتەۋ ورتالىقتارىنا, عىلىمي مەكەمەلەرگە 14 ملرد تەڭگەدەن استام قارجى قۇيىلماق.
ەلباسىنىڭ مەگاپوليستەر مەن ءىرى قالالار ماڭايىندا قايتا وڭدەۋ زاۋىتتارىنىڭ ءوندىرىسىن قولعا الۋ تۋرالى تاپسىرماسى اۋىل شارۋاشىلىعى سالاسىنىڭ وكىلدەرىنە, جالپى نارىقتا جاڭا جۇمىس ورىندارىن اشۋ مۇمكىندىگىن بەرەدى.
ەلىمىزدىڭ ەكسپورتقا شىعاراتىن دايىن ونىمدەردى جاساپ شىعارۋعا الەۋەتى مول. قولبايلاۋ – ەلباسىمىز ايتقانداي جاڭا كادرلار مەن جاڭا تەحنولوگيالار جەتىسپەۋشىلىگى. ەگەر ەكەۋىن نەعۇرلىم تەزىرەك قولعا الساق, ەلىمىزدىڭ اۋىل شارۋاشىلىعى سوعۇرلىم تەز داميدى دەگەن ويدامىن.
ءالجان ءشامشىدىن,
«مال شارۋاشىلىعى جانە ۆەتەريناريا عىلىمي-يننوۆاتسيالىق ورتالىعىنىڭ» ديرەكتورى
