«سىرتقى ىستەر مينيسترلىگىنىڭ الدىندا پراگماتيزم نەگىزىندە حالىقارالىق ارەنادا قازاقستاننىڭ سىرتقى ساياساتىن بەيىمدەۋ جانە ۇلتتىق مۇددەلەرىن ىلگەرىلەتۋ بويىنشا ناقتى مىندەتتەر قويىلدى. الەمدەگى احۋال اۋىسىپ كەلەدى, سوندىقتان بىزگە قازاقستاننىڭ دامۋى ءۇشىن, مەملەكەت باسشىسى الدىمىزعا قويعان بارلىق ماقساتتاردى ورىنداۋ ءۇشىن ءبىز جاعىمدى سىرتقى جاعدايدى قامتاماسىز ەتۋىمىز قاجەت», - دەدى مينيستر الماتى وبلىسىنداعى «قورعاس» شەكارا ماڭى ىنتىماقتاستىق حالىقارالىق ورتالىعىندا ديپلوماتيالىق كورپۋستىڭ الدىندا سويلەگەن سوزىندە.
«ساياسي تۇرعىدا ءبىز ايماقتىق ىنتىماقتاستىق, جاقسى تاتۋ كورشىلىكتى نىعايتۋ, قازاقستاننىڭ بىتىمگەرشىلىك ءرولى, شىعىس پەن باتىستىڭ اراسىنداعى كوپىر سالۋ, سونداي-اق ءبىزدىڭ ەلىمىزدىڭ كوپ جاقتى ديپلوماتياعا بەلسەندى قاتىسۋى تۋرالى ايتىپ وتىرمىز. مەملەكەت باسشىسى «ەكونوميكالىق ديپلوماتيا» سالاسىندا وداندا جوعارى مىندەتتەردى قويىپ وتىر. بۇل شيكىزاتتىق ەمەس ەكسپورتتى قولداۋ, بەلسەندى ساۋدا ساياساتى, قازاقستاندىق بيزنەستى شەتەلدە قورعاۋ جانە ىلگەرىلەتۋ, ينۆەستيتسيالار, تەحنولوگيالار مەن ۇزدىك الەمدىك تاجىريبەنى تارتۋ, ءتۋريزمدى دامىتۋ», - دەپ اتاپ ءوتتى ۆەدومستۆو باسشىسى.
ءمينيستردىڭ ايتۋىنشا, سىرتقى ىستەر مينيسترلىگى الدىنا قويىلعان مىندەتتەردى ورىنداۋ ءۇشىن ەلدەگى سالالىق اگەنتتىكتەر جانە وڭىرلەرمەن تىعىز ىنتىماقتاستىق ورناتىپ, قاجەتتى قولداۋ كورسەتەدى. شەتەلدىك ديپلوماتيالىق ميسسيالار باسشىلارىنىڭ الماتى وبلىسىنا جاساعان ساپارى بارىسىندا وبلىس ءوزىنىڭ ەكونوميكالىق جانە ينۆەستيتسيالىق الەۋەتىن تانىستىرادى.
«مەملەكەت باسشىسى كولىك-لوگيستيكالىق سالانى بولەك اتاپ ءوتتى. ءبىز بۇل سالاعا اسا ماڭىزدى كوڭىل ءبولۋدى جالعاستىرامىز, اسىرەسە قىتايدىڭ «بەلدەۋ جانە جول» باستاماسىن بەلسەندى تۇردە ىسكە اسىرۋىن جانە ونىڭ قازاقستاندىق «نۇرلى جول» باعدارلاماسىمەن ءوزارا ارەكەتتەسۋىن نازارعا العاندا. ءبىزدىڭ بۇگىنگى قورعاسقا جاساعان ساپارىمىز وسى ماڭىزدى جۇمىس باعىتىمەن تىكەلەي بايلانىستى جانە ءبىزدىڭ ەلدەرىمىزدىڭ ءححى عاسىرداعى ۇلى جىبەك جولىن قايتا جاڭعىرتۋداعى ءوزارا ءتيىمدى ىنتىماقتاستىعىنا جاڭا سەرپىن بەرەتىنىن كۇتەمىز», - دەپ اتاپ ءوتتى ءسىم باسشىسى.
جولداۋدان شىعاتىن مىندەتتەر مەن ولاردى شەشۋ جولدارى تۋرالى الماتى وبلىسىنىڭ اكىمى اماندىق باتالوۆ پەن «قازاقستان تەمىر جولى» ۇك» اق-نىڭ پرەزيدەنتى قانات الپىسباەۆ تولىق بايانداپ, شەتەلدىك ديپلوماتتاردىڭ كوپتەگەن سۇراقتارىنا جاۋاپ بەردى.
