مەرەكەلىك شارالار بۇگىن ەرتەمەن باستالدى. اشىق ۆەلوجارىسقا ەكى مىڭعا جۋىق ادام قاتىستى. جۇلدەگەرلەر بەس اتالىم بويىنشا ماراپاتتالدى.
-قالالىق ۆەلوجارىستار وتكەن سايىن قاتىسۋعا نيەتتىلەردىڭ كوبەيىپ كەلە جاتقانى جانە تەك اتىراۋلىقتار مەن ەلىمىزدىڭ باسقا وڭىرلەرىنەن عانا ەمەس, شەتەلدەردەن دە وسى شاراعا ارنايى كەلىپ قاتىسۋشىلاردىڭ بارى ءبىزدى قۋانتادى. مىسالى, بۇگىن ۆەلوجارىسقا ازەربايجاننان كەلگەن تۋريست قاتىستى, ول تمد, اقش, افريكا ەلدەرىن جاياۋ ارالاپ, 10 مىڭ شاقىرىمدى باعىندىرعان, - دەيدى قالالىق سپورت جانە دەنە تاربيەسى ءبولىمىنىڭ باسشىسى رينات يبراگيموۆ.
سۇلتان بەيبارىس الاڭىندا ساندىك-قولدانبالى بۇيىمدار كورمەسى, جەرگىلىكتى شىعارماشىلىق ۇجىمدار كونتسەرتى, ۇلتتىق سپورت تۇرلەرىنەن اشىق تۋرنير ۇيىمداستىرىلدى. وبلىستىق اكىمدىك الدىنداعى پيرس اۋماعىندا بايداركا مەن كانوەدە ەسكەك ەسۋدەن قالالىق تۋرنير ءوتتى. مەرەكەنى اتاپ ءوتۋ بارىسىندا اتىراۋدا قالا تۇرعىندارىنا ارنالىپ ۇزىندىعى 10 م, ەنى 80 سم تورت ءپىسىرىلدى.
-بۇگىن اتىراۋ كەزەكتى جاسىن تويلاپ جاتىر. شاھار كۇن ساناپ كوركەيىپ, جاڭا ساۋلەتكە يە بولىپ كەلەدى. قازىر وبلىس ورتالىعىندا كوپتەگەن جاڭا جوبالار جۇزەگە اسىرىلىپ جاتىر, سول ارقىلى قالامىزدىڭ ءسانى كىرىپ, تازا, قولايلى بولىپ كەلەدى. بارشاڭىزعا دەنساۋلىق, وتباسىلارىڭىزعا باقىت پەن بەرەكە تىلەيمىن, - دەدى قالا اكىمى اليمۇحاممەد كۇتتۇمۇرات ۇلى.
اتىراۋ قالاسىنىڭ كۇنىن اتاپ ءوتۋ بارىسىندا نۇرسايا ىقشاماۋدانىندا 800 ورىندىق جابىق اكۆاپارك اشىلدى. جاڭا ويىن-ساۋىق ورىنى زاماناۋي ستاندارتتارعا نەگىزدەلگەن, مۇندا ءار اۋىسىمدا 18 قۇتقارۋشى كەزەكشى بولادى.
مەرەكەلىك شارا 19.00-دە سۇلتان بەيبارىس الاڭىندا قازاقستاندىق جانە رەسەيلىك ەسترادا جۇلدىزدارىنىڭ قاتىسۋىمەن وتەتىن گالا-كونتسەرتپەن اياقتالادى.
23.00-دە مەرەكە قوناقتارىنىڭ قۇرمەتىنە مۋزىكالىق وتشاشۋ بولادى.
