جينالعان جۇرتشىلىقتى ەلباسىنىڭ 2019 جىلدىڭ 1 قاڭتارىنان باستاپ ەڭ تومەنگى جالاقىنى 1,5 ەسە, ياعني 28 مىڭنان 42 مىڭعا دەيىن ءوسىرۋ جونىندەگى ۇكىمەتكە بەرگەن تاپسىرماسى قۋانتتى.
نەگىزىنەن, جولداۋدىڭ باستى تاقىرىبى ەل تۇرعىندارىنىڭ ءال-اۋقاتىن ودان ءارى جاقسارتۋعا ارنالدى. وبلىستىق «اتامەكەن» ۇلتتىق كاسىپكەرلەر پالاتاسىنىڭ ديرەكتورى ەربول ارىنوۆتىڭ پىكىرىنشە, ەلدىڭ ءارى قاراي دامۋى ءۇشىن- مەملەكەتتىڭ بارلىق مەحانيزمدەرى جۇمىس ىستەۋى قاجەت.
مىسالى, پرەزيدەنت وندىرىسپەن اينالىساتىن ەكونوميكانىڭ ناقتى سەكتورىن قولداۋدى مىندەتتەدى. حالىق تۇتىناتىن تاۋارلاردى شىعارۋ قاجەتتىگىن ايتتى. كوپتەگەن تاۋارلاردى شەتەلدەن ساتىپ الاتىنىمىز دا راس. وعان ساپانىڭ تومەندىگى, اينالىم قاراجاتىنىڭ ازدىعى دا سەبەپ بولار. جولداۋدان كەيىن كاسىپكەرلىك سالاسىنا بولىنەتىن قاراجات ەكونوميكانىڭ ناقتى سەكتورىنا بەرىلىپ, ناقتى ناتيجە بەرۋى كەرەك دەپ ەسەپتەيمىن.
ەربول ارىنوۆتىڭ ايتۋىنشا, كاسىپكەرلەر پالاتاسى وبلىستاعى شاعىن جانە ورتا بيزنەستىڭ دامۋىنا ۇلەس قوسۋدا. بيىل «باستاۋ» جوباسى بويىنشا وبلىستا 1765 تىڭداۋشىنى وقىتۋ جوسپارى بار, ياعني, ناتيجەسىندە 353 بيزنەس-جوبا جۇزەگە اسپاق. قازىرگى تاڭدا قۇنى 420,8 ميلليون تەڭگەگە 107 جوبا قارجىلاندىرىلدى. وسى جوبالار ارقىلى جاڭا جۇمىس ورىندارى اشىلادى. جالپى, ۇلتتىق كاسىپكەرلەر پالاتاسى بيزنەستى قورعاۋ, زاڭناماعا تۇزەتۋلەر ەنگىزۋ, بيزنەس شىعىندارى مەن تەكسەرۋدى قىسقارتۋ, بيزنەس احۋالدى جاقسارتۋ بويىنشا جۇمىستار اتقارۋدا.
ال, قالالىق ءماسليحات دەپۋتاتى, كاسىپكەر قوبىلانبەك قوجيننىڭ ايتۋىنشا, قازىرگى كەزدە كوشباسشى كاسىپكەرلەر وزدەرىنىڭ كاسىپورىندارىنىڭ قىزمەتىن ءارى قاراي دامىتۋ ءۇشىن بيزنەس-جاتتىقتىرۋشىلار شاقىرىپ, عىلىمي تەحنولوگيالارعا جۇگىنۋدە. عىلىم دامىماي, بيزنەس تە دامىمايدى.
قوبىلانبەك قوجيننىڭ پىكىرىنشە, وڭدەۋ ونەركاسىبى مەن شيكىزاتتىق ەمەس ەكسپورتتى قولداۋ ماقساتىمەن الداعى 3 جىلدا قوسىمشا قاراجات بولىنسە- بۇل ەكسپورتتىق الەۋەتتى ارتتىرىپ, ىشكى نارىقتى وتاندىق تاۋارلارمەن تولتىرۋعا جول اشادى.
قالالىق ءماسليحاتتىڭ تاعى ءبىر دەپۋتاتى, اباي اتىنداعى دارىندى بالالارعا ارنالعان №10 مەكتەپتىڭ ديرەكتورى سامال ايتقازينانى ايتۋىنشا, مەكتەپتە وقۋشىلاردىڭ «زەردە» عىلىمي ۇيىمى, عىلىمي جوبالار, وليمپيادا شىڭى, يننوۆاتسيالىق يدەيالار, مارافوندار مەن سايىستار اتتى جاڭاشىل ۇيىرمەلەر جۇمىس جاساۋدا. جان-جاقتى جاڭاشىل ساباقتار, جاڭاشىل ءبىلىم جۇيەسى-وقۋشىلارىمىزدىڭ الداعى بولاشاققا دەگەن ارمان-ماقساتتارىن بۇگىنگى كۇننەن باستاپ قالاۋدا.
بۇگىنگى جولداۋدى تىڭداعان مەكتەپ مۇعالىمدەرىن ۇجىمىن بيۋدجەتتىك سالا ماماندارى جالاقىسىنىڭ 35 پايىزعا ءوسۋى قۋانتتى.
كەلەسى جىلى «پەداگوگ مارتەبەسى تۋرالى» زاڭ ەنگىزىلۋى دە قۋانىشتى جاڭالىق. كوپشىلىك ەلىمىزدىڭ ءبىلىم بەرۋ سالاسىنداعى رەفورمالار قاشان توقتايدى سۇراپ جاتادى. مىسالى, نازارباەۆ زياتكەرلىك مەكتەبىنىڭ تاجىريبەسىن الىپ, جالپى ءبىلىم بەرەتىن مەكتەپتەرىندە ەنگىزىلسە. سوندا بارلىق مەكتەپتەر ساپالى تۇردە, ءبىر باعىتتا جانە ءبىر ارنادا جۇمىس جاسايدى. سوندىقتان, جولداۋدا بالاباقشادان باستاپ جوعارى وقۋ ورنىنا دەيىنگى ارالىقتا ءبىلىم بەرۋدىڭ جاڭا زامان تالاپتارىنا ساي قول جەتكىزۋگە باسا نازار اۋدارىلدى.
فاريدا بىقاي,
«ەگەمەن قازاقستان»
پاۆلودار
