ەلباسىمىز ءوزىنىڭ جاڭا جولداۋى ارقىلى ەلىمىزدىڭ ەندىگى باعىت-باعدارى مەن الداعى مىندەتتەرىن ايقىنداپ بەردى. بۇل جولداۋدىڭ ەڭ باستى ەرەكشەلىگى – حالىقتىڭ ءال-اۋقاتىن ارتتىرىپ, تۇرمىس ساپاسىن جاقسارتۋعا باعىتتالعانى بولىپ وتىر. سول سەبەپتى دە ونى ەلدىڭ يگىلىگىنە باعىتتالعان تاريحي قۇجات دەپ قابىلداۋعا ابدەن بولادى.
شىن مانىندە, جولداۋدا ايتىلعان بارلىق باسىمدىقتار ميلليونداعان قازاقستاندىقتاردىڭ ءومىر ءسۇرۋ ساپاسىن جاقسارتىپ, ولاردىڭ باسەكەگە قابىلەتتىلىكتەرىن كوتەرەتىن ءتيىمدى تەتىكتەر. ال بۇل – الەمنىڭ ەڭ دامىعان 30 مەملەكەتىنىڭ قاتارىنا قوسىلۋدى كوزدەيتىن ءبىز ءۇشىن باستى تالاپتاردىڭ ءبىرى.
پرەزيدەنت جولداۋدا بۇگىندە جاھاندىق جانە جەرگىلىكتى ماسەلەلەردىڭ شيەلەنىسە تۇسكەنىن, مۇنداي تىعىرىقتان شىعۋدىڭ بىردەن-ءبىر جولى ادامنىڭ دامۋى ەكەنىن ايتتى. سوندىقتان دا ۇكىمەتكە جانە بارلىق مەملەكەتتىك ورگاندار مەن كومپانيالارعا جۇمىس تاسىلدەرىن وزگەرتۋدى تاپسىردى. بۇل قازاقستاندىقتاردىڭ ءال-اۋقاتىنىڭ ءوسۋى ەلىمىزدىڭ ەڭ باستى باسىمدىعىنا اينالادى دەگەن ءسوز.
جالپى, مەملەكەت باسشىسىنىڭ سىندارلى ساياساتىنىڭ ارقاسىندا قازاقستان تاۋەلسىزدىكتىڭ العاشقى جىلدارىنان باستاپ دامۋدىڭ دارا جولىمەن ءجۇرىپ كەلەدى. ءبىز وسى ۋاقىت ارالىعىندا ساياسات پەن ەكونوميكادا ۇلكەن جەتىستىكتەرگە جەتتىك. ءتۇرلى حالىقارالىق فورۋمدار مەن جيىنداردى جوعارى دەڭگەيدە وتكىزىپ, الەمدىك قوعامداستىقتىڭ سەنىمىن ابىرويمەن اقتادىق. سول ارقىلى دۇنيە جۇزىنە بەيبىتشىلىك پەن كەلىسىمنىڭ, سەنىم مەن تۇراقتىلىقتىڭ التىن بەسىگى رەتىندە تانىلدىق.
دەسەك تە, زامان ءبىر ورنىندا تۇرمايدى. قازىر الەمنىڭ ۇلكەن وزگەرىستەردى باستان كەشىرىپ جاتقانى دا بەلگىلى. سول الەمنىڭ ءبىر بولشەگى رەتىندە قازاقستان دا وسى ۇدەرىستەردەن تىس قالمايدى. سوندىقتان بىزگە ەندى اتالعان وزگەرىستەر مەن جاھاندىق سىن-قاتەرلەرگە لايىقتى توتەپ بەرۋدىڭ جولىن قالىپتاستىرۋ اسا ماڭىزدى. ال ونىڭ نەگىزى باي, ءبىلىمدى, دەنى ساۋ ۇلت ەكەنىن ەلباسى جاڭا جولداۋىندا ناقتى كورسەتىپ بەرىپ وتىر.
جولداۋدا ايتىلعان التى باعىت تا حالىقتى الاڭداتقان ەڭ وزەكتى جانە كۇرمەۋى قيىن ماسەلەلەردى وڭتايلى شەشۋگە جول اشىپ بەردى. سونىڭ ىشىندە ەلدىڭ تابىسىن ءوسىرۋ, تۇرمىس ساپاسىن ودان ءارى جاقسارتۋ, ءومىر سۇرۋگە جايلى ورتا قالىپتاستىرۋ, ازاماتتاردىڭ سۇرانىسىنا ساي مەملەكەتتىك اپپارات قۇرۋ, سىرتقى ساياساتتىڭ تيىمدىلىگىن ارتتىرۋ جانە ءاربىر قازاقستاندىقتىڭ ەلىمىزدەگى وزگەرىستەرگە اتسالىسۋىن قامتاماسىز ەتۋگە باعىتتالعان جاڭا مىندەتتەر حالىقتىڭ كوكەيىندە جۇرگەن كوپتەگەن ساۋالعا بەرىلگەن ناقتى جاۋاپ بولدى.
اسىرەسە ەلباسىنىڭ ءبىلىم بەرۋ, دەنساۋلىق ساقتاۋ, شاعىن جانە ورتا بيزنەستى دامىتۋ, قولجەتىمدى باسپانا, قۇقىق قورعاۋ ورگاندارىنىڭ جۇمىسىن جەتىلدىرۋ, سىبايلاس جەمقورلىقپەن كۇرەستى كۇشەيتۋ, مەملەكەتتىك قىزمەتتىڭ تيىمدىلىگىن ارتتىرۋ سياقتى حالىقتىڭ كۇندەلىكتى ومىرىندەگى سالالارعا ەرەكشە ءمان بەرۋى, ەشبىر اسىرەلەۋسىز, قازاقستاندىقتاردىڭ تۇرمىس ساپاسىن جاڭا دەڭگەيگە كوتەرەتىن يگى قادام. سول سەبەپتى دە بۇل باسىمدىقتاردى حالىق بىردەن قولداپ, ولاردىڭ ناتيجەلى جۇزەگە اسىرىلۋىنا بەلسەندى قاتىساتىنىنا كامىل سەنەمىن.
ارينە بۇل باسىمدىقتار بويىنشا وسىعان دەيىن دە ەلىمىزدە كوپتەگەن باعدارلامالار قابىلدانىپ, ساياسي, ەكونوميكالىق, رۋحاني جانە الەۋمەتتىك جاڭعىرۋلار قولعا الىنعانى بەلگىلى. سوندىقتان «قازاقستاندىقتاردىڭ ءال-اۋقاتىنىڭ ءوسۋى: تابىس پەن تۇرمىس ساپاسىن ارتتىرۋ» اتتى جاڭا جولداۋدى مەملەكەت باسشىسىنىڭ بۇگىنگە دەيىنگى بارلىق باستامالارىنىڭ لايىقتى جالعاسى دەۋگە تولىق نەگىز بار.
ەلباسىنىڭ سەنىمدى تىرەگى, ەلمەن ەتەنە جۇمىس ىستەيتىن پارتيا رەتىندە «نۇر وتان» جولداۋدىڭ ءمانى مەن ماڭىزىن ءاربىر قازاقستاندىققا ءتۇسىندىرىپ, ونىڭ تابىستى ورىندالۋى ءۇشىن ءوز ۇلەسىن قوساتىن بولادى.
