اۋماقتىعى بەس رەسپۋبليكانىڭ ىشكى ىستەر مينيسترلىگىنىڭ ەسىرتكىنى باقىلاۋدى تىكەلەي قولعا الىپ وتىرعان دەپارتامەنتتەرىنىڭ, دەنساۋلىق ساقتاۋ مينيسترلىگىنىڭ ناركولوگيالىق-ەمدەۋ ورتالىقتارى مەن مەملەكەتتىك ەمەس ۇيىمداردىڭ وكىلدەرى, سونداي-اق بىرقاتار الىس شەتەلدەن كەلگەن مارتەبەلى مامان-مەيمانداردىڭ قاتىسۋىمەن وتكەن جينالىستىڭ ەكى كۇنگە سوزىلاتىنى تۋرالى كەشەگى ماقالادا جازعانبىز.
ءماجىلىستىڭ ەكىنشى كۇنى نەگىزگى اڭگىمە دەنساۋلىق ساقتاۋ مەن ەسىرتكى قاۋىپسىزدىگى, ونىڭ اينالاعا تيگىزەتىن زالالى تاقىرىبىنا ارنالدى. كەڭەيتىلگەن وتىرىستا ەلىمىزدە پايدا بولعان جاڭا سينتەتيكالىق ەسىرتكى تۇرلەرىن پايدالانۋدىڭ جاڭاشا جول تابۋى مەن قازىرگى تاڭداعى ونىڭ ساندىق ءوسىمى, ونى جاڭاشا ەمدەۋ ۇلگىلەرى تۋرالى قازاقستان دارىگەرلەرى ويلارىن ورتاعا سالدى. تاجىكستان مەن تۇرىكمەنستاننان, وزبەكستان مەن قىرعىزستاننان كەلگەن وكىلدەر ءوز ەلدەرىندەگى ەسىرتكى ساياساتىنىڭ اقۋالى تۋرالى ساليقالى تۇردە وي ءبولىستى. وسى كۇنگە دەيىن ناشاقورلىق پەن جەزەكشولىكتەن بىردەن ءبىر ادا ەل تۇرىكمەنستاننىڭ ءومىر سالتى دا قىزىعارلىق, ارينە. الايدا, كورشىدەن مازا كەتسە, قول قۋسىرىپ ول قالاي تىنىش وتىرماق؟
پىكىر بىلدىرۋشلەردىڭ ويىن اياقتاۋىنا ۋاقىت جەتپەي, سويلەۋشىگە ءسوز جەتپەي قىزۋ وتكەن ەكى كۇندىك كونفەرەنتسيادان ءبىر اڭعارىلعانى – كەڭىردەكتى قانشا جەردەن سوزساق تا «بولار ءىس بولىپ, بوياۋى ءسىڭىپ قويعان.» قازىرگى قازاقستاننىڭ اۋماعىندا ەسىرتكىگە تاۋەلدى 23,5 مىڭ ادام تۇرىپ جاتىر. مۇقيات ەسەپكە الىنعاندارى. ولاردىڭ ىشىندە 200-دەي كامەلەتتىك جاسقا تولماعاندار, 2000-داي ايەلدەر بار. CADAP-تىڭ حالىقارالىق جيىنىندا قازاقستاندىق مارتەبەلى وكىل يۆان دوبرىشين سونداي ءۋاج ايتتى. ءتىپتى, بۇل سوڭعى بەس جىل ىشىندە 35 پروتسەنتكە كەمىگەن كورسەتكىش ەكەن.
دارىگەر-ماماندار, پسيحولوگتار, مەملەكەتتىك ەمەس ۇيىم مۇشەلەرى, شەتەلدىك مەيماندار بۇل جيىندا عاسىرلىق-عالامدىق دەرتكە توسقاۋىل قويۋ كەرەكتىگىن اشىنىپ, القىنىپ ايتقانمەن, ونىڭ الدىن الۋدىڭ, بولدىرماۋدىڭ جولىن تابۋدا مۇلدەم شاراسىز ەكەندىگى بايقالىپ تا تۇردى. ويتكەنى, ەسىرتكى ترافيگىنىڭ جولى كەسىلگەن جوق! بىراق, ادەتتەگىدەي, وعان قارسى اياۋسىز كۇرەس جالعاسا بەرمەك.
ەسىتركىگە قاتىستى حالىقارالىق ءماجىلىستىڭ ءتامامدالۋىنا ۋاقىت تاياعاندا ۆەب-سايتتار الماتىدا «امفيتامين» پسيحوتتروپتىق زاتىن تاسىمالداۋشىنىڭ قۇرىقتالعانى تۋرالى شۇعىل حابار تاراتتى. ەكونوميكالىق تەرگەۋ قىزمەتىنىڭ ساربازدارى ەۋرووداق (ەو) ەلدەرىنىڭ بىرىنەن پوچتا تاسىمالى ارقىلى كەلگەن 2,522 گرامم ەسىرتكىلىك زاتتى قابىلداعان ازاماتتىڭ قولىنا كىسەن سالىپتى. تەرگەۋ شارالارى جۇرگىزىلىپ جاتىر.
تالعات ءسۇيىنباي,
«ەگەمەن قازاقستان»
الماتى
