بۇل عيمارات 1925 جىلى بۇعان دەيىن «قىرعىز-قايساق» اتانىپ كەلگەن ۇلتىمىزعا «قازاق» اتاۋىن قايتارىپ بەرۋ تۋرالى تاريحي شەشىم قابىلدانعان قازاق ورتالىق اتقارۋ كوميتەتى عيماراتىنىڭ سىزبا-نۇسقاسى نەگىزىندە سالىنعان. سالتاناتتى جيىندا وبلىس اكىمى قىرىمبەك كوشەرباەۆ:
- بيىل ءبىز استانا مەن قىزىلوردا قالاسىنىڭ مەرەيتويىن اتاپ وتۋدەمىز. جيىرما جىل بۇرىن مەملەكەت باسشىسى نۇرسۇلتان ءابىش ۇلى نازارباەۆ تاۋەلسىز قازاقستاننىڭ ەلورداسىن استانا قالاسىنا كوشىرۋ تۋرالى ستراتەگيالىق شەشىم قابىلداپ, سول ارقىلى جاسامپاز مەملەكەتىمىزدىڭ تۇتاستىعىن قامتاماسىز ەتتى.
قىزىلوردا – جانكەنت, شىرىك-رابات, سىعاناق سىندى ەجەلگى استانالاردىڭ جانە اق وردا مەن التىن وردا سياقتى حان وردالارىنىڭ اۋماعى, كەڭەس وداعى كەزىندە قازاق رەسپۋبليكاسىنىڭ استاناسى, سونداي-اق, اعارتۋ, ساياسي جانە ونەركاسىپتىك دامۋ ورتالىعى بولدى. ۇلتىمىزدىڭ رەسمي «قازاق» اتالۋى تۋرالى شەشىم دە وسى كيەلى مەكەندە قابىلداندى. بيىل ەلوردامىز استانانىڭ 20 جىلدىق جانە قىزىلوردا قالاسىنىڭ 200 جىلدىق مەرەيتويلارىن قاتار اتاپ وتۋدەمىز. بۇل قازاقستاننىڭ العاشقى جانە قازىرگى استانالارى اراسىنداعى ەرەكشە رۋحاني بايلانىستى اڭعارتادى دەپ ويلايمىن. ءبىز ۇلتتىق قۇندىلىقتارىمىزدى ساقتاپ ءارى جاڭعىرتۋىمىز كەرەك,- دەدى.
بىلتىر سىرداريانىڭ سول جاعالاۋىندا جاڭا قالانىڭ قۇرىلىسى باستالعان بولاتىن. قازىرگى تاڭدا جەكە ينۆەستيتسيالاردىڭ قارجىسى ەسەبىنەن 18 كوپقاباتتى تۇرعىن ءۇيدىڭ, «بولاشاق» ۋنيۆەرسيتەتى كورپۋسىنىڭ جانە مەملەكەتتىك-جەكەمەنشىك ارىپتەستىك شەڭبەرىندە 320 ورىندىق بالاباقشانىڭ, مەملەكەت قارجىسى ەسەبىنەن جاستارعا قىزمەت كورسەتۋ ورتالىعى مەن قاجەتتى ينفراقۇرىلىمداردىڭ قۇرىلىسى جۇرگىزىلىپ جاتىر. 2019-2020 جىلدارى سول جاعالاۋدا بىرقاتار كوپقاباتتى ۇيلەر, مەكتەپتەر, وبلىستىق كوپسالالى اۋرۋحانا, نەكە قيۋ سارايى, بالاباقشا, فيزيكا-ماتەماتيكالىق مەكتەپ جاتاقحاناسىمەن بىرگە, ساۋدا-ويىن ساۋىق كەشەنىن سالۋ جوسپارلانىپ وتىر.
باقتيار تايجان,
«ەگەمەن قازاقستان»
قىزىلوردا وبلىسى
