بۇل جوبا تۇركيانىڭ عىلىمي الەۋەتىن تانىتا وتىرىپ, باۋىرلاس ەلدىڭ عالىمدارى جانە ماماندارىنىڭ ءوزارا ىنتىماقتاستىعىن ارتتىرۋ ماقساتىندا جۇرگىزىلىپ وتىر. ال قازىرگى تاڭدا كەز كەلگەن دامىعان ەل عارىش سالاسىن بەيبىت ماقساتتا يگەرۋگە كوپ كوڭىل بولەدى. بۇلاردىڭ قاتارىندا تۇركيا مەملەكەتى دە بار. تۇرىك ەلىندە الەمنىڭ ەڭ ۇزدىك ۋنيۆەرسيتەتتەرىنىڭ عارىشقا قاتىستى زەرتتەۋ جۇمىستارىنا اتسالىسىپ جۇرگەن كوپتەگەن جاس ماماندار مەن عالىمدار بار. سولاردىڭ ءبىرى – ماسساچۋسەتس تەحنولوگيالىق ينستيتۋتى (MIT) مەن وكسفورد سياقتى الەمنىڭ ەڭ ۇزدىك ۋنيۆەرسيتەتتەرىندە ءبىلىم العان جاس پروفەسسور, شۆەتسياداعى ەۋروپالىق يادرولىق زەرتتەۋلەر ورتالىعى CERN-دەگى تۇركيانىڭ وكىلى بىلگە دەميركوز. ول يۋنۋس ەمرە ينستيتۋتىنىڭ قولداۋىمەن 2017 جىلى بەلورۋسسيادا جاريالانعان ء«بىلىم جىلى» شاراسى اياسىندا عالىمدارمەن كەزدەسىپ, كونفەرەنتسيا وتكىزگەن بولاتىن. پروفەسسور وسى جىلى قازاقستاننىڭ ءۇش قالاسىندا عالىمدار جانە ستۋدەنتتەرمەن كەزدەسۋدى جوسپارلاپ وتىر.
اتالعان شارا اياسىندا بىلگە دەميركوز استاناداعى يۋنۋس ەمرە اتىنداعى تۇرىك مادەنيەت ورتالىعىنىڭ ۇيىمداستىرۋىمەن كەشە نازارباەۆ ۋنيۆەرسيتەتتە ستۋدەنتتەر مەن عالىمدارعا ارناپ كونفەرەنتسيا وتكىزدى. كونفەرەنتسيانىڭ تاقىرىبى «تۇركيادا عارىشتىق رادياتسيا تەستەرىن جاساۋ جوباسى: CERN-مەن ىنتىماقتاستىق».
ء«بىز قازىرگى ۋاقىتتا عارىشتىق رادياتسيانىڭ زياندارىن زەرتتەپ جاتىرمىز. سونىمەن قاتار ادام بالاسىنىڭ وسى رادياتسياعا توزىمدىلىگى قانشالىقتى, ونى قالاي كۇشەيتۋىمىز كەرەك سول جاعىنان ءبىرشاما جۇمىس اتقارۋدامىز. كونفەرەنتسيالار ءۇشىن مەن قازاقستاندى تاڭداۋىم بەكەر ەمەس. ويتكەنى قازاقستان – عارىشقا جول سالعان, عارىش يندۋسترياسى دامىپ كەلە جاتقان ەل. قازاقستان 1993 جىلعى اقپان ايىنداعى مەملەكەت باسشىسى نۇرسۇلتان نازارباەۆتىڭ جارلىعىنا سايكەس عارىش سالاسىن دامىتۋعا ارنالعان وكىلەتتى ورگان «قازعارىش» وردالى ءبىر ۇيىمعا اينالىپ ۇلگەردى. جانە دە مەن ءوزىمنىڭ كوپتەگەن شاكىرتتەرىم ارقىلى قازاقستان جايلى اقپاراتتارعا قانىق بولدىم», دەدى ول.
تاياۋ شىعىس تەحنيكالىق ۋنيۆەرسيتەتىنىڭ پروفەسسورى بۇعان دەيىن بىرنەشە لاۋازىمدىق قىزمەتتەردى اتقارىپ, ءوز سالاسىنىڭ بىلىكتى مامانىنا اينالعان. دالىرەك ايتقاندا, 2013-2014 جىلدارى تۇركيانىڭ عىلىمي-تەحنولوگيالىق زەرتتەۋ ۇيىمىنىڭ (TÜBİTAK) كوسموس ينستيتۋتىندا كەڭەسشى, 2014-2015 جىلدارى ارالىعىندا تۇركيا رەسپۋبليكاسى ەنەرگيا جانە پايدالى قازبالار ءمينيسترىنىڭ كەڭەسشىسى, 2015 جىلدان باستاپ تاياۋ شىعىس تەحنيكالىق ۋنيۆەرسيتەتى قوعام مەن ءبىلىم ورتالىعىندا باسقارما مۇشەسى, 2013 جىلى TÜBİTAK ءبىلىم كەڭەسى جانە تاعى دا باسقا جاۋاپتى جۇمىستاردى ابىرويمەن اتقارىپ, 2018 جىلى ROKETSAN (راكەتا ءوندىرىسى يندۋسترياسى) كەڭەسشىسى بولىپ تاعايىندالعان.
بىلگە دەميركوز عالىمدار جانە ستۋدەنتتەرگە ارنالعان كونفەرەنتسياسىن الداعى ۋاقىتتا تۇركىستان قالاسىنداعى قوجا احمەت ياساۋي اتىنداعى حالىقارالىق قازاق-تۇرىك ۋنيۆەرسيتەتىندە جانە الماتىداعى قوجا احمەت ياساۋي اتىنداعى حالىقارالىق قازاق-تۇرىك ۋنيۆەرسيتەتىنە قاراستى ەۋرازيالىق زەرتتەۋ ينستيتۋتىندا جالعاستىرادى.
راۋان قايدار,
«ەگەمەن قازاقستان»
