قازىر جەتىسۋ توپىراعىندا وسكەن كوكونىسپەن قاتار, ەت, ءسۇت, قۇس ونىمدەرىنە سۇرانىس جوعارى. اسىرەسە ۇلكەن قالالارداعى نارىققا جول تارتقان ونىمدەردىڭ وتىمدىلىگى بايقالادى. مۇنىڭ ءبىر دالەلىن جاقىندا استانا قالاسىندا وتكەن الماتى وبلىسىنىڭ كۇندەرى اياسىنداعى جارمەڭكەدەن بايقاۋعا بولادى. ەكى كۇن ىشىندە جەتىسۋ اگرارشىلارى جالپى قۇنى 270 ملن تەڭگە بولاتىن 470 توننا اۋىل شارۋاشىلىعى ءونىمىن ساۋدالاپ ۇلگەرگەن.
جالپى, ەلورداداعى «قازاقستان» سپورت كەشەنىنىڭ جانىندا وتكەن جارمەڭكەگە جۇرت كوپ جينالدى. استانالىقتارعا ۇسىنىلعان ازىق-ت ۇلىك, كوكونىس ونىمدەرىنىڭ باعاسى ارزان, ساپاسى جوعارى بولعاندىقتان ساۋدا قىزدى. بۇل جولى الماتى وبلىسىنىڭ 17 اۋدانى مەن 3 قالاسىنىڭ شارۋالارى 17,0 توننا ەت ونىمدەرىن, 21,9 توننا ءسۇت ونىمدەرىن, 12,4 توننا بالىق پەن 106,1 توننا كوكونىس, 43,4 توننا جەمىس-جيدەك جانە 43,3 توننا كارتوپ ونىمدەرىن ساتتى. وسىلايشا, جەتىسۋلىق شارۋالار ەكى كۇن بويى وتكەن جارمەڭكەدە 48 ءتۇرلى ءونىم ساۋدالاپ, ەلوردا تۇرعىندارىنىڭ سۇرانىسىن قاناعاتتاندىردى.
قالماحانبەت مۇقامەتقالي,
«ەگەمەن قازاقستان»
الماتى وبلىسى
