بۇعان دەيىن 380,4 ملرد تەڭگەنى قۇرايتىن 11 جوبا, ەندى 29,91 ملرد تەڭگەنى قۇرايتىن 5 جوبا, ناتيجەسىندە سوڭعى 1,5 ايدا 16 ينۆەستوردىڭ جالپى سوماسى 410,31 ملرد تەڭگەنى قۇرايتىن ينۆەستيتسيالىق بيزنەس جوبالارى سىبايلاس جەمقورلىقتان قورعالاتىن بولادى.
بۇل تۋرالى وسىمەن ءۇشىنشى رەت وتكەن «ماڭعىستاۋ وبلىسىنداعى ينۆەستيتسيالىق احۋال: سىبايلاس جەمقورلىققا قارسى مەحانيزمدەر» اتتى بيزنەس-كەزدەسۋدە ايتىلدى. وعان «اتامەكەن» كاسىپكەرلەر پالاتاسى, وڭىرلىك سىبايلاس جەمقورلىققا قارسى ءىس-قيمىل ۇلتتىق بيۋروسى, «Kazakh Invest» ۇك» وڭىرلىك فيليالى, وتاندىق جانە شەتەلدىك ينۆەستورلار, مەملەكەتتىك ورگانداردىڭ وكىلدەرى قاتىستى.
ءوز سوزىندە اگەنتتىكتىڭ اۋماقتىق دەپارتامەنتىنىڭ باسشىسى نۇرگۇل جاننازاروۆا, جوبانىڭ ماقساتى قولايلى ينۆەستيتسيالىق احۋالدى قالىپتاستىرۋ جانە مەملكەتتىك بيلىك ينستيتۋتتارىنا بيزنەس پەن ينۆەستورلاردىڭ سەنىمىن ارتتىرۋ ەكەندىگىن اتاپ ءوتتى.
«اگەنتتىكتىڭ باستاماسىمەن قازىرگى تاڭدا رەسپۋبليكا بويىنشا بارلىق جەرلەردە ينۆەستورلاردىڭ قۇقىقتارىن قورعاۋ, ولاردىڭ ءوز جوبالارىن جۇزەگە اسىرۋ كەزىندەگى اكىمشىلىك كەدەرگىلەرگە جولىقپاۋ جانە سىبايلاس جەمقورلىقتىڭ الدىن-الۋ مىندەتى تۇر. ياعني, مەملەكەتتىك ورگاندار تاراپىنان بيزنەسكە كەدەرگى جاسالسا, ۋاكىلەتتى ورگاندار قاراپ قالمايدى, زاڭ اياسىندا شارالار الىناتىن بولادى», - دەدى نۇرگۇل جاننازاروۆا.
شاراعا قاتىسقان كاسىپكەرلەر دە اتالعان جوبانىڭ بيزنەس ءۇشىن قولايلى ەكەندىگىن اتاپ ءوتتى جانە العاشقى ناتيجەسى دە جوق ەمەس.
«مەن بۇل جوبا اياسىندا ءوزىمدى تولعاندىرعان ماسەلەلەر بويىنشا ءتيىستى ورىندارعا جولىققان بولاتىنمىن. اتاپ ايتار بولسام, ءوز كاسىبىمدى جارنامالاۋ ماقساتىندا جارناما باننەرلەرىن ءىلۋ ءۇشىن اكىمدىكتەن كوپ ۋاقىتتان بەرى كەلىسىم الا الماي ءجۇردىم. اگەنتتىكتىڭ اۋماقتىق دەپارتامەنتى ارالاسقان سوڭ مەنىڭ سۇراعىم وڭ شەشىمىن تاپتى. سونىمەن قاتار, جيھاز فابريكاما گاز تارتۋ ماسەلەسىندە دە قيىندىقتار تۋىنداعان بولاتىن. ول ماسەلە دە كوپ كۇتتىرمەي, وڭ شەشىلدى»,- دەيدى جەكە كاسىپكەر البەرت بيتنەر.
جوبا اياسىندا ينۆەستورلار ءۇشىن «Hot Line» كارتالار جاساقتالىپ, ينۆەستورلار اگەنتتىكتىڭ جانە ۇلتتىق بيۋرونىڭ اۋماقتىق دەپارتامەنتتەرىنىڭ باسشىلارىنا بايلانىس قۇرالدارى ارقىلى تىكەلەي شىعۋعا مۇمكىندىك بەرىلگەن. بۇدان باسقا كاسىپكەرلەر الەۋمەتتىك جەلىلەر, مەسسەندجەرلەر, سكايپ, وڭىرلىك 8707 170 1424 شۇعىل جەلىسىنە حابارلاسۋ ارقىلى ينۆەستيتسيالىق جوبانى جۇزەگە اسىرۋ بارىسىندا كەزدەسكەن اكىمشىلىك كەدەرگىلەر نەمەسە سىبايلاس جەمقورلىق دەرەكتەرى بويىنشا جوبانىڭ وبلىستاعى فرونت-وفيسىنە حابارلاسا الادى.
ءىس-شارا سوڭىندا اۋماقتىق دەپارتامەنت وكىلى ەربول جۇماباي جوبانىڭ نەگىزگى باسىم-باعىتتارىمەن تانىستىردى. ءوز كەزەگىندە كاسىپكەرلەر شارانى جوعارى دەڭگەيدە ۇيىمداستىرعان ماڭعىستاۋ وبلىسىنىڭ كاسىپكەرلەر پالاتاسى مەن اگەنتتىكتىڭ اۋماقتىق دەپارتامەنتىنىڭ وكىلدەرىنە العىس ءبىلدىردى.
