نيۋ-دەليدە قر پرەمەر-ءمينيسترىنىڭ ورىنباسارى اسقار جۇماعاليەۆ پەن ءۇر اقپاراتتىق تەحنولوگيالار جانە تەلەكوممۋنيكاتسيالار ءمينيسترى راۆي شانكار پراساد كەزدەستى.
كەزدەسۋ بارىسىندا اسقار جۇماعاليەۆ «تسيفرلىق قازاقستان» مەملەكەتتىك باعدارلاماسى تۋرالى ايتىپ بەردى. پرەمەر-ءمينيستردىڭ ورىنباسارى ءۇندىستاننىڭ كيبەرقاۋىپسىزدىك, ادام كاپيتالىن دامىتۋ, بيومەتريا جانە ت.ب. سالالارداعى جوبالاردى ىسكە اسىرۋداعى ەلەۋلى تاجىريبەسىن اتاپ ءوتتى.
«ادام كاپيتالىن دامىتۋ – «تسيفرلىق قازاقستان» باعدارلاماسىنىڭ ەڭ ماڭىزدى باعىتتارىنىڭ ءبىرى. جوعارى كاسىبي كادرلارسىز تسيفرلىق باستامالاردى ىسكە اسىرۋ مۇمكىن ەمەس. ءۇندىستاننىڭ بىلىكتى ات-كادرلارىن دايارلاۋدا ۇلكەن تاجىريبە جيناقتاعانىن كورىپ وتىرمىز. ءۇندى ارىپتەستەرىمىزدىڭ وسى سالاداعى تاجىريبەسى ءبىزدىڭ قىزىعۋشىلىعىمىزدى تۋدىرىپ وتىر», — دەدى اسقار جۇماعاليەۆ.
راۆي پراساد قازاقستاننىڭ تسيفرلىق باستامالارى الەمدىك ترەندتەرگە سايكەس كەلەتىنىن, ال مەملەكەت باسشىسىنىڭ جان-جاقتى كورسەتىپ وتىرعان قولداۋى «تسيفرلىق قازاقستان» باعدارلاماسىن ءساتتى ىسكە اسىرۋدىڭ كەپىلى ەكەنىن اتاپ ءوتتى. سونداي-اق, مينيستر مامانداردى دايارلاۋ سالاسىندا تاجىريبەمەن بولىسۋگە دايىن ەكەنىن جەتكىزىپ, ءۇندىستان باسقا دا سالالاردا ىنتىماقتاستىق ورناتۋعا مۇددەلى ەكەنىنە نازار اۋداردى.
ءۇندىستاننىڭ اقپاراتتىق تەحنولوگيالار جانە كوممۋنيكاتسيالار مينيسترلىگىندە NASSCOM, NIELT, CDAC, SPTI, EP سەكىلدى جەتەكشى ءۇندى كومپانيالارى ءوز ونىمدەرىمەن تانىستىردى. قازاقستان تاراپى استانا حابپەن تانىستىرىپ, قازاقستاننىڭ يننوۆاتسيالىق ەكوجۇيەسىن دامىتۋ كەلەشەگى تۋرالى ايتىپ بەردى.
اسقار جۇماعاليەۆ ءۇندى باق-نىڭ سۇراقتارىنا جاۋاپ بەرە وتىرىپ, ەشبىر ەل تسيفرلىق جوبالاردى ءوز بەتىنشە ىسكە اسىرا المايتىنىن اتاپ ءوتتى. سەبەبى, تەحنولوگيالار ۇنەمى وزگەرىپ, قارقىندى تۇردە جەتىلدىرىلىپ وتىرادى, تۇراقتى نەگىزدە پىكىر الماسىپ, بىلىممەن جانە تاجىريبەمەن ءبولىسىپ وتىرۋ قاجەت. سوندىقتان دا, وسىنداي كەزدەسۋلەر قازاقستان ءۇشىن دە, ۇندىستانعا دا وتە پايدالى. سونداي-اق, ا: جۇماعاليەۆ ءۇندى كومپانيالارىن بيىل 5 قاراشادا اشىلاتىن استانا حابقا شاقىردى.
