وتكەن جىلى قوستاناي وبلىسىندا 322 000 ادام زەينەتاقى قورىنا جارناسىن تولەمەگەن. سولاردىڭ اراسىنان بيىل 285 000 ادامنىڭ مارتەبەسى انىقتالدى. وبلىستىق جۇمىسپەن قامتۋدى ۇيلەستىرۋ جانە الەۋمەتتىك باعدارلامالار باسقارماسىنىڭ ماماندارى ءۇي-ءۇي, اۋلالاردى ارالاپ ءجۇرىپ, قالعان 37 مىڭ ادامدى دا انىقتادى. سونىڭ ىشىندە 11500 ادام جەكە مالىمەن, ءوز اۋلاسىنداعى شارۋاشىلىعىمەن كۇن كورەدى.
«وسىلار بىرىڭعاي جيىنتىق تولەم تولەۋشىلەر بولىپ تابىلادى. ال قالعاندارى ستۋدەنتتەر, ءۇي شارۋاسىنداعى ايەلدەر, قازاقستاننان كەتىپ قالعاندار, جۇمىسسىزدار بولىپ شىقتى», - دەدى وبلىستىق جۇمىسپەن قامتۋدى ۇيلەستىرۋ جانە الەۋمەتتىك باعدارلامالار باسقارماسى باسشىسىنىڭ ورىنباسارى ايدا حۇسايىنوۆا. وبلىستىق «الەۋمەتتىك مەديتسينالىق ساقتاندىرۋ قورى» وبلىستىق فيليالىنىڭ ديرەكتورى ساۋلە ايمۇحامبەتوۆانىڭ ايتۋىنشا, ەلىمىزدە سالىق پەن زەينەتاقى جانە مەديتسينالىق ساقتاندىرۋ جۇيەسىنە قاتىسپايتىندار ءۇشىن بىرىڭعاي جيىنتىق تولەم ەنگىزىلەتىن بولادى.
«ول 2019 جىلدىڭ 1 قاڭتارىنان باستاپ ەنگىزىلەدى. ول ءتورت ءتۇرلى سالىقتان تۇرادى. 1ايلىق ەسەپ كورسەتكىشى قالالىقتار ءۇشىن, 0,5 ايلىق ەسەپ كورسەتكىشى اۋىلداعىلار ءۇشىن بەلگىلەنگەن. ونىڭ 10 پروتسەنتى – جەكە تابىس سالىعىنا, 20 پروتسەنتى – الەۋمەتتىك ساقتاندىرۋعا, 30 پروتسەنتى زەينەتاقى قورىنا, 40 پروتسەنتى – مىندەتتى الەۋمەتتىك مەديتسينالىق ساقتاندىرۋ قورىنا تولەنەدى. ال ءبىر ايلىق ەسەپ كورسەتكىشى قازىر 2405 تەڭگە» دەدى ساۋلە ايمۇحامبەتوۆا.
قىسقاسى, ەگەر الگى 11500 ادام بىرىڭعاي جيىنتىق تولەم تولەۋدەن باس تارتسا, ولار اۋىرعان جاعدايدا, «مىندەتتى الەۋمەتتىك مەديتسينالىق قورى» ەسەبىنەن تەگىن مەديتسينالىق كومەك الا المايدى, بارلىعىن دا وزدەرى قالتاسىنان تولەيتىن بولادى. ال توتەنشە جاعداي بۇعان كىرمەيدى. ماماندار بريفينگتە بىرىڭعاي جيىنتىق تولەمنەن باس تارتقان ادامدارعا كومەكتىڭ باسقا ءتۇرى ازىرگە جوق ەكەنىن ايتتى.
ءنازيرا جارىمبەت,
«ەگەمەن قازقستان»
قوستاناي
