رەسەي فەدەراتسياسى فەدەرالدىق جينالىسىنىڭ فەدەراتسيا كەڭەسى مەن تمد-عا قاتىسۋشى مەملەكەتتەردىڭ پارلامەنتارالىق اسسامبلەياسى ۇيىمداستىرعان فورۋمعا رەسەي فەدەراتسياسىنىڭ پرەزيدەنتى ۆ.پۋتين, حالىقارالىق ۇيىمدار جەتەكشىلەرى, سونداي-اق الەمنىڭ 100 ەلىنەن 500-دەن استام وكىل قاتىستى.
قازاقستان دەلەگاتسياسىنىڭ قۇرامىنا پارلامەنت دەپۋتاتتارى, مەملەكەتتىك ورگاندار باسشىلارى, قوعامدىق ۇيىمدار وكىلدەرى كىردى.
گۇلشارا ابدىقالىقوۆا قۇتتىقتاۋ سوزىندە قازاقستان پرەزيدەنتى نۇرسۇلتان نازارباەۆتىڭ «الەم. XXI عاسىر» مانيفەسىندەگى: «وتكەن عاسىرلاردىڭ قاسىرەتتى قاتەلىكتەرىن قايتالاۋعا جول بەرمەي, الەمدى سوعىس قاتەرىنەن تۇپكىلىكتى ارىلتۋ ءۇشىن ۇكىمەتتەردىڭ, ساياساتكەرلەردىڭ, عالىمداردىڭ, بيزنەسمەندەردىڭ, ونەر قايراتكەرلەرىنىڭ جانە بۇكىل الەمدەگى ميلليونداعان ادامنىڭ كۇش-جىگەرىن جۇمىلدىرۋ قاجەت» دەگەن سوزىنە نازار اۋداردى.
مەملەكەتتىك حاتشى تۇراقتى جانە ادىلەتتى قوعام قۇرۋ ءۇشىن ايەلدەر ەكونوميكا ءومىرىنىڭ بارلىق سالاسىنا تولىققاندى اتسالىسۋى قاجەت ەكەنىن اتاپ ءوتتى.
– بۇگىندە ءبىزدىڭ ەلىمىز ورتالىق ازيا مەن اۋعانستانداعى قاۋىپسىزدىكتى قامتاماسىز ەتۋگە ايرىقشا كوڭىل ءبولىپ وتىر. ءبىز تاجىكستان مەن قىرعىزستانداعى قاقتىعىستاردى جويۋعا اتسالىستىق, يران مەن سيريا جونىندەگى كەلىسسوزدەر ءۇشىن الاڭ ۇسىندىق, – دەدى مەملەكەتتىك حاتشى.
فورۋم اياسىندا مەملەكەتتىك حاتشى گۇلشارا ابدىقالىقوۆا «بۇۇ-ايەلدەر» ۇيىمىنىڭ اتقارۋشى ديرەكتورى, بۇۇ باس حاتشىسىنىڭ ورىنباسارى فۋمزيلە ملامبو-نگكۋكامەن جانە «ايەلدەر جيىرمالىعىنىڭ» (W20) نەگىزىن قالاۋشى ءارى پرەزيدەنتى گيۋلدەن تيۋركتانمەن ەكىجاقتى كەزدەسۋلەر وتكىزدى. وندا وزەكتى الەۋمەتتىك-ەكونوميكالىق جانە مادەني-گۋمانيتارلىق پروبلەمالار, سونداي-اق بەيبىتشىلىك پەن قاۋىپسىزدىكتى نىعايتۋ ماقساتىمەن ايەلدەردىڭ مۇمكىندىگىن ودان ءارى ارتتىرۋ, حالىقارالىق جانە وڭىرلىك باستامالار كوتەرۋدەگى ءرولىن كۇشەيتۋ ماسەلەلەرى تالقىلاندى.
