كوشپەندىلەر فيلوسوفياسى, دالا وركەنيەتى, كەڭىستىك پەن ۋاقىت تۇسىنىگىن جاڭاشا تۇرلەندىرىپ جۇرگەن سىرلىبەكتىڭ كارتينالارى ەموتسيالىق قابىلداۋدان گورى ينتەللەكتۋالدى ويلانۋعا جەتەلەيدى. ماسەلەن, وتكەن مەن بۇگىننىڭ توعىسىنداعى ايەل عۇمىرىن ارقاۋ ەتكەن «دالا اۋەنى» (2011) اتتى فوتو سەرياسىندا دا يدەيالىق ماڭىز الدىڭعى ورىنعا شىعارىلعان. ونداعى اۋەنگە قۇلاق سالساڭىز, كۇيبەڭ تىرلىكتىڭ تاساسىنداعى ايەل ءومىرىنىڭ الىستان تالىپ جەتكەن ءۇنى بىرتە-بىرتە ۇدەي تۇسكەنىن بايقار ەدىڭىز. ايەل الا تاڭنان قارا كەشكە دەيىن بەل جازباستان جۇمىس ىستەي ءجۇرىپ بەسىگىن توبەسىنە كوتەرەدى. قىم-قۋىت تىرلىكتە ەشكىمگە رەنجىگەن ەمەس, ەشتەڭەدەن تۇڭىلگەن ەمەس. اۋەلدەن سولاي بولۋى كەرەك كورىنگەن. «جازمىشتان وزمىش جوق» دەگەنگە ابدەن مويىنسۇنعان جانە بۇل اۋەن ۇزىلمەستەن جالعاسا بەرمەك.
«بۇل دالا – مەنىڭ تۋىپ-وسكەن جەرىم. مۇندا بالاباقشا, كينوتەاتر سياقتى مادەني ورىندار اتىمەن جوق. اينالاڭنان كورەتىنىڭ جاپان دالا, قۇلا ءتۇز. ال بۇل فوتوسۋرەتتەگى ايەلدەر بولمىسىنىڭ وزىندىك سەبەبى بار. مەن ەس بىلگەلى انامنىڭ قولى بوس وتىرعانىن كورگەن ەمەسپىن. سيىر ساۋدان اتاتىن تاڭى قورا-قوپسىنىڭ, ءۇي شارۋاسىنىڭ ءومىرى بىتپەيتىن جۇمىستارىمەن جالعاسا بەرەتىن. مەنىڭ شەشەم عانا ەمەس, بارلىق شالعايداعى ايەلدەردىڭ ءومىرى وسىلاي ءبىر-بىرىنە ۇقساس. تۇگەسىلمەيتىن شارۋانىڭ بىتپەيتىن اۋەنى مەنىڭ جانىما باتادى», دەيدى فوتوسۋرەتشىنىڭ ءوزى.
ول كەز كەلگەن فوتوسۋرەتتى تۇسىرمەس بۇرىن الدىمەن جوبانىڭ جەكەلەگەن كورىنىستەرىنەن باستاپ, تۇتاس قۇرىلىمىنىڭ ەسكيزىن سىزىپ الادى. ەكسپەريمەنتالدىق-سيمۆوليكالىق مانەردەگى مۇنداي تۋىندىلارىنىڭ ءبىرى رەتىندە قازاقستاننىڭ ءتۇرلى وڭىرلەرىندە تۇسىرىلگەن 7 بولىمنەن تۇراتىن «ۇلكەن مالىمەت» (2013) اتتى جۇمىسىن ايتۋعا بولادى. مۇندا دا باس تاقىرىپ – اۋىل تىرشىلىگى.
جالپى, سىرلىبەكتىڭ شەبەرحاناسى ءداۋىر اتموسفەراسىنىڭ فورمالىق-مازمۇندىق ىزدەنىستەرىمەن دارالانادى. قوجا احمەت ياساۋي اتىنداعى حالىقارالىق قازاق-تۇرىك ۋنيۆەرسيتەتىن گرافيكا ماماندىعى بويىنشا اياقتاعان ول كەيىنگى جىلدارى ينستاللياتسيا, فوتو-ۆيدەو ينستاللياتسياسى, پەرفومانس جانرىندا شەبەرلىگىن شىڭداپ كەلەدى. فورما قالىپتاستىرۋعا ەرەكشە ءمان بەرەتىن سۋرەتشىنىڭ قاي شىعارماسىندا بولسىن جان تەبىرەنىسى مەن جاناشىرلىقتان تۋعان تەرەڭ كۇيزەلىسى, بارىمىزگە ەتەنە تانىس ءومىر شىندىعى جاتىر.
ايا ءومىرتاي,
«ەگەمەن قازاقستان»
