الماتى وبلىسىنىڭ جامبىل اۋدانىنا قاراستى قاسىمبەك اتتى اۋىل بار. وسى اۋىلدا الەمدىك ستاندارتتارعا ساي ەلەكتر تاۋارلارىن وندىرەتىن زاۋىت جۇمىس ىستەيدى. 2012 جىلى اشىلعان «قاز تەك ينۆەست» كاسىپورنى كۇندەلىكتى تۇرمىستا قولداناتىن جانە كوشەنى جارىقتاندىرۋعا قويىلاتىن جارىقشامدار, لامپالار, اسپالى شامدار, روزەتكالار, توك ۇزارتقىشتارى مەن باسقا دا جارىق تەحنيكاسى جابدىقتارىن جاساۋمەن شۇعىلدانادى. «قاز تەك ينۆەست» كاسىپورنى الماتى وبلىسىنىڭ عانا ەمەس, ەلىمىزدىڭ ەكونوميكاسىنا قىزمەت كورسەتىپ وتىرعان جانە وڭىردەگى الەۋمەتتىك ماسەلەلەردىڭ شەشىلۋىنە ۇلەس قوسۋشى بىرەگەي وتاندىق ءوندىرىس. ءونىم ءوندىرۋشى زاۋىتتا 300-گە جۋىق ادام تۇراقتى جۇمىسپەن قامتىلعان. رەسپۋبليكا بويىنشا 4 فيليالى مەن 13 ديلەرلىك دۇكەنى جۇمىس ىستەپ تۇر.
– 2015 جىلى «تەكسان مەتالل» جوبالىق جەلىسى بويىنشا ەلەكترقالقانداردى, ءورت قالقاندارىن, قوقىس جاشىگىن, شەشىنۋگە ارنالعان جانە قۇجاتتار مۇراعاتىنا ارنالعان مەتالل شكافتاردى جاساۋدى جولعا قويدىق. بۇگىندە بىشكەكتە, دۋشانبەدە, تاشكەنتتە جانە دۋباي, پاناما مەن گانادا بولىمشەلەرىمىزدى اشتىق, – دەيدى كومپانيانىڭ باس ديرەكتورى دياس قۇرماشەۆ.
قازىر كاسىپورىننىڭ زاۋىتىندا اي سايىن 200 مىڭ داناعا جۋىق ءونىم شىعارىلادى. ياعني كەڭسەدە, كوشەدە, وندىرىستە جانە كۇندەلىكتى تۇرمىستا قولدانىلاتىن جارىقديودتى شامداردىڭ 350 ءتۇرلى نۇسقاسى دايىن كۇيىندە نارىققا جونەلتىلىپ جاتىر. شامدارعا قاجەتتى زاتتاردىڭ 92 پروتسەنتىن جەرگىلىكتى ءونىم قۇرايدى. ءونىمنىڭ ساپاسىن جاپونيا, تۇركيا مەن گوللانديادان اكەلىنگەن قۇرال-جابدىقتار قامتاماسىز ەتەدى.
«قازاقستاندا جاسالعان» برەندىن الەمگە تانىتۋ باعىتىندا دا «قاز تەك ينۆەست» كاسىپورنى ايتارلىقتاي ەڭبەكتەنۋدە. انىعىندا, زاۋىتتىڭ ەكسپورتتىق الەۋەتى زور. قازىرگى كەزدە قاسىمبەك اۋىلىندا جاسالعان جارىقديودتى شامدار رەسەي, وزبەكستان, قىرعىزستان, تاجىكستان جانە پارسى شىعاناعى, لاتىن امەريكاسى ەلدەرىنە, ءباا, گانا سياقتى مەملەكەتتەرگە ەكسپورتتالادى ەكەن. بۇل جايىندا كاسىپورىن باسشىسى دياس قۇرماشەۆ:
– ءبىز ەلىمىزدە ءبىرىنشى بولىپ وتاندىق تاۋاردى پارسى شىعاناعى ەلدەرىنە, لاتىن امەريكاسى مەن افريكا ەلدەرىنە ەكسپورتتاي باستادىق. گۋان چجوۋ قالاسىندا جارىقديودتى دەڭگەيلەر مەن دروسسەلدەردى شىعاراتىن جەكە زاۋىتىمىز بار. ءبىزدىڭ ماماندار كەز كەلگەن ونىمگە 10 جىلعا دەيىن كەپىلدىك بەرەدى, – دەيدى.
قالماحانبەت مۇقامەتقالي,
«ەگەمەن قازاقستان»
الماتى وبلىسى,
جامبىل اۋدانى
