القالى جيىنعا زاڭ شىعارۋشى, اتقارۋشى جانە سوت تارماقتارىنىڭ وكىلدەرى, حالىقارالىق جانە ۇكىمەتتىك ەمەس ۇيىمداردىڭ, ادۆوكاتۋرانىڭ جانە باق وكىلدەرى قاتىستى. جيىندى اشقان ق. سۇلتانوۆ كوميسسيانىڭ قاتارىنا قوعامدىق دامۋ ءمينيسترى دارحان كالەتاەۆتىڭ قوسىلعانىن جاريالادى.
ءىس-شارا بارىسىندا اقپارات جانە كوممۋنيكاتسيالار ءمينيسترى داۋرەن اباەۆ «اقپاراتقا قول جەتكىزۋدى قامتاماسىز ەتۋدەگى اقپاراتتىق-كوممۋنيكاتسيالىق تەحنولوگيالاردىڭ ءرولى» تاقىرىبىندا بايانداما جاسادى.
«مەملەكەتتىك باسقارۋدى رەفورمالاۋ, ازاماتتىق قوعامدى دامىتۋ جانە سىبايلاس جەمقورلىققا قارسى كۇرەس پروتسەسىندە اقپاراتتىڭ اشىقتىعى جانە قول جەتىمدىلىگى ماڭىزدى ءرول اتقارادى. اقپاراتقا قول جەتكىزۋ قۇقىعىنىڭ الەۋمەتتىك ماڭىزدىلىعى دا ايقىن. مەملەكەتتىك ورگاندار قىزمەتىنىڭ اشىقتىعى ولاردىڭ تاراپىنان تەرىس پايدالانۋ مۇمكىندىگىن ازايتادى, ياعني ادام قۇقىقتارىنىڭ قورعالۋ دەڭگەيىن ارتتىرادى», دەدى ۆەدومستۆو باسشىسى.
مينيستر اقپاراتقا قولجەتىمدىلىكتى قامتاماسىز ەتۋ ءۇشىن ارنايى قۇرىلعان «اشىق ۇكىمەت» پورتالدارىنىڭ قىزمەتىنە توقتالدى.
بۇگىندە «اشىق دەرەكتەر» پورتالىندا ورنالاستىرىلعان دەرەكتەر جيىنتىعىنىڭ سانى – 3179. پورتالدىڭ دەرەكتەرى نەگىزىندە 23 قوسىمشا ازىرلەنگەن.
«اشىق نورماتيۆتىك قۇقىقتىق اكتىلەر» پورتالىندا اشىق تۇردە مەملەكەتتىك كورسەتىلەتىن قىزمەتتەر ستاندارتتارىن قوسا العاندا, نورماتيۆتىك قۇقىقتىق اكتىلەردىڭ جوبالارى جاريا تالقىلانادى. پورتال جۇمىس ىستەگەن كەزەڭ ىشىندە 29 143 نقا جوباسى جاريالاندى, ولارعا 14 000-نان استام پىكىرلەر قالدىرىلدى», دەدى د. اباەۆ.
ءمينيستردىڭ ايتۋىنشا, اقپاراتپەن قامتاماسىز ەتۋدەگى بارلىق پروبلەمالاردى شەشۋ ءۇشىن كەشەندى ءتاسىل قاجەت. وسى ماقساتتا ۇلىبريتانيانىڭ تاجىريبەسىنە سۇيەنە وتىرىپ, مەملەكەتتىك ورگانداردىڭ بىرىڭعاي سايتىن قۇرۋ بويىنشا جۇمىس جۇرگىزىلىپ جاتىر. بۇل رەتتە, بىرىڭعاي سايتتى قۇرۋ جىل سايىن اقپاراتتىق رەسۋرستاردى ازىرلەۋ مەن سۇيەمەلدەۋگە بولىنەتىن شىعىستاردى ەكى ەسەدەي قىسقارتۋعا مۇمكىندىك بەرەدى. بايانداما سوڭىندا مينيستر «اشىق ۇكىمەت» قاعيداتتارىن ىلگەرىلەتۋ بويىنشا الداعى ۋاقىتتا اتقارىلاتىن جۇمىستارعا توقتالدى. 2019 جىلى مەملەكەتتىك ورتالىق ورگانداردىڭ, 2020 جىلى جەرگىلىكتى اتقارۋشى ورگانداردىڭ ينتەرنەت-رەسۋرستارىن بىرىڭعاي پلاتفورماعا كوشىرۋ جوسپارلانعان.
«اشىق ۇكىمەت» پورتالدارىندا جانە رەسمي ينتەرنەت-رەسۋرستا جۇرگىزەتىن جۇمىسىن اقپارات جانە كوممۋنيكاتسيالار مينيسترلىگى مەملەكەتتىك ورگاندار قىزمەتىنىڭ تيىمدىلىگىن جىل سايىن باعالاۋ شەڭبەرىندە باقىلايدى. 2017 جىلى «مەملەكەتتىك ورگاننىڭ اشىقتىعى» باعىتى بويىنشا شىعىس قازاقستان وبلىسىنىڭ اكىمدىگى جانە قازاقستان رەسپۋبليكاسىنىڭ مەملەكەتتىك قىزمەت ىستەرى جانە سىبايلاس جەمقورلىققا قارسى ءىس-قيمىل اگەنتتىگى الدىڭعى قاتاردان كورىندى.
اقمارال اعزامقىزى,
«ەگەمەن قازاقستان»
