قازاقستان مۇسىلماندارى ءدىني باسقارماسى بيىلعى جىلدى «يسلام جانە وتباسى» جىلى دەپ جاريالاعان بولاتىن. سوندىقتان, «وتباسى كۇنىنە» وراي, «نۇر استانا» ورتالىق مەشىتىنىڭ ۇيىمداستىرۋىمەن وتباسىلىق قۇندىلىقتاردى ناسيحاتتاۋعا باعىتتالعان «ۇلگىلى وتباسى – قوعام تىرەگى» اتتى سەمينار وتكىزىلدى.
قمدب-نىڭ استانا قالاسى بويىنشا وكىلى, «نۇر استانا» ورتالىق مەشىتىنىڭ باس يمامى اسقار مۇقانوۆ سەميناردىڭ اشىلۋ ساتىندە ءسوز سويلەپ, ءىس-شارانىڭ ماڭىزى جايلى بايانداپ بەردى.
«حالقىمىزدا «وتان وتباسىنان باستالادى» دەگەن اتالى ءسوز بار. ۇلكەن قۇندىلىقتار قامتىلعان ماقالدى باسشىلىققا العان اتالارىمىز قوعامنىڭ تىرەگى ءاربىر وتباسى ەكەنىن باعزىدان ءبىزدىڭ سانامىزعا ءسىڭىرىپ كەلگەن. شىن مانىندە وتباسىندا بەرەكە-تىنىشتىق بولماسا ازاماتتاردىڭ قوعامعا ەسە قوسۋى مۇمكىن ەمەس. ەلباسى «وتباسى – قازاقستان قوعامىنىڭ دىڭگەگى, ەكونوميكاداعى, مادەنيەتتەگى, الەۋمەتتىك ساياساتتاعى بارلىق جاڭا جەتىستىكتەرىنىڭ نەگىزى» دەپ بۇل ماسەلەنىڭ ءبىزدىڭ قوعام ءۇشىن ماڭىزىن كورسەتىپ بەردى. سوندىقتان «يسلام جانە وتباسى» جىلى اياسىندا وتكىزىلىپ وتىرعان سەمينارىمىز حالقىمىزدىڭ وتباسى قۇندىلىقتارىن جاڭعىرتىپ, جاس وتباسىلارعا ناسيحاتتاۋعا باعىتتالىپ وتىر», - دەي كەلىپ اسقار مۇقانوۆ ءىس-شاراعا قولداۋ بىلدىرگەن استانا قالاسىنىڭ اكىمدىگىنە, سەمينار سپيكەرلەرىنە العىس ءبىلدىردى.
استانا قالاسىنىڭ قوعامدىق دامۋ باسقارماسىنىڭ باسشىسى دانيار ەسين سەمينارعا ارنايى قاتىسىپ, ونىڭ قوعامدىق ماڭىزى ايىرىقشا ەكەنىن اتاپ ءوتتى.
«ەلباسى «بولاشاققا باعدار: رۋحاني جاڭعىرۋ» اتتى ماقالاسىندا «ەگەر جاڭعىرۋ ەلدىڭ ۇلتتىق-رۋحاني تامىرىنان ءنار الا الماسا, ول اداسۋعا باستايدى» دەپ ۇلتتىق جاڭعىرۋدىڭ نەگىزگى ۇلتتىق رۋحانيات ەكەنىن اتاپ كورسەتكەن ەدى. اتالمىش سەمينار قوعامنىڭ ۇيىتقىسى بولعان وتباسى قۇندىلىقتارىن ناسيحاتتاپ, جانۇيا جاراسىمى, ءبىرتۇتاس قوعام قۇرۋ ءىسى ءۇشىن دە ايرىقشا مانگە يە. وسىنداي ەل رۋحانياتى ءۇشىن پايدالى ءىس-شارانى ۇيىمداستىرىپ وتىرعان قمدب-نىڭ استانا قالاسى بويىنشا وكىلدىگىنە العىسىمىزدى بىلدىرەمىز», - دەدى د. ەسين.
سەمينار اياسىندا قمدب-نىڭ شاريعات جانە ءپاتۋا ءبولىمىنىڭ مەڭگەرۋشىسى سانسىزباي قۇربان ۇلى, ف.ع.ك., پروفەسسور, مادەنيەتتانۋشى, ابايتانۋشى ومار جالەل, «استانا قالاسى اكىمدىگىنىڭ ءدىن پروبلەمالارىن زەرتتەۋ ورتالىعى» كمم «دەسترۋكتيۆتى ءدىني اعىمداردان زارداپ شەككەندەرگە پسيحولوگيالىق كومەك كورسەتۋ» ءبولىمىنىڭ باسشىسى, پسيحولوگ قويشيەۆا ليمانا, قمدب-نىڭ ايەل-قىزدار سەكتورىنىڭ جەتەكشىسى اقبوپە قاناتقىزى قاتارلى بىلىكتى ماماندار نەكە, تالاق ماسەلەلەرىنىڭ شاريعاتتاعى ۇكىمى, حالقىمىزدىڭ جاس وتباسىلارعا بەرگەن تاربيەسى, ايەل زاتىنىڭ وتباسىنداعى ورنى مەن ماڭىزى جايلى باياندامالار وقىدى. سونىمەن بىرگە, سەمينار قاتىسۋشىلارى تاراپىنان قويىلعان وتباسى ماسەلەلەرىنە بايلانىستى سۇراقتارعا تۇشىمدى جاۋاپ بەردى.
