رەسپۋبليكا وڭىرلەرىنەن ەكى جۇزگە تارتا, سونداي-اق اقش, تۇركيا, رەسەي, بەلارۋس, وزبەكستان, تاجىكستان, قىرعىزستان جانە ت.ب. شەت مەملەكەتتەردەن كەلگەن كىتاپحانا سالاسىنىڭ ماماندارى سوڭعى جيىرما جىلداعى جەتىستىكتەر مەن قوردالانعان ماسەلەلەر توڭىرەگىندە پىكىر الماستى.
سەزدىڭ رەسمي بولىمىندە پارلامەنت سەناتى الەۋمەتتىك-مادەني دامۋ جانە عىلىم كوميتەتىنىڭ ءتورايىمى بىرعانىم ءايتىموۆا مادەنيەت سالاسى, ونىڭ ىشىندە كىتاپحاناشىلاردىڭ قىزمەتىنە قاتىستى تالاپتار زاڭمەن ۇنەمى تولىقتىرىلاتىندىعىن اتاپ ءوتىپ, كىتاپحانالار قىزمەتىنىڭ ازىرگە ءبىر عانا باپپەن شەكتەلىپ وتىرعاندىعىنا توقتالدى. دەسە دە, كىتاپحاناعا قاتىستى ماڭىزدى ماسەلەلەردى شەشۋگە ۇكىمەت تاراپىنان تۇراقتى كوڭىل ءبولىنىپ كەلەدى. الداعى ۋاقىتتا كىتاپحانالارعا قاجەتتىلىك ماسەلەسى مەملەكەتتىك گرانتتار اياسىندا جاندانا ءتۇسۋى ءتيىس. ال كىتاپحانالاردىڭ كوبەيۋى ەلىمىزدىڭ ينتەللەكتۋالدى دەڭگەيىنىڭ ارتۋىنا زور ىقپال ەتەتىنى ءسوزسىز.
زاماناۋي تەحنولوگيالار عاسىرىندا ادەبي مۇرامىزدى ساقتاپ قالۋ, سيرەك باسىلىمداردى قالپىنا كەلتىرۋ, كونە قارىپتە باسىلعان باسپا ونىمدەرىن سىرى مەن سىنىن بۇزباي كەلەشەك ۇرپاققا جەتكىزۋ وسى سەزدىڭ باستى تاقىرىبىنا اينالدى. كىتاپحاناشىلار كەزدەسۋىندە پىكىرىن بىلدىرگەن اقىن ولجاس سۇلەيمەنوۆ ادەبيەت, كىتاپ تاقىرىبىنىڭ كۇندەلىكتى ومىرىمىزبەن بايلانىسى ونىڭ جارقىن كەلەشەگىنەن حاباردار ەتەدى. كىتاپ باردا ادامزاتتىڭ مادەنيەتى مەن ءبىلىمى بار, دەپ اتاپ وتسە, عالىم ءابساتتار دەربىسالى كىتاپحانالار سوناۋ كونە عاسىرلاردان باستاۋ الاتىنىن ءارى كوپتەگەن عۇلامالارىمىزدىڭ, ونىڭ ىشىندە ءال-فارابي سياقتى تۇلعالاردىڭ عىلىمي تۇرعىدان دامۋى كىتاپحانالار قىزمەتىمەن تىعىز بايلانىستى ەكەندىگىنە توقتالدى.
كىتاپحانالاردىڭ ومىرشەڭ بولۋى ءبىلىمدى, جارقىن كەلەشەكتىڭ كەلبەتىنىڭ جارقىن كورىنىسى. كىتاپحانانىڭ جاھاندانۋ عاسىرىندا مادەني ينستيتۋت مارتەبەسىن ساقتاۋىنا قوعامنىڭ قوسار ۇلەسى زور. وسى تۇرعىدا ءسوز سويلەگەن الماتى قالاسى مادەنيەت جانە ارحيۆتەر باسقارماسى باسشىسىنىڭ ورىنباسارى دانيار اليەۆ, قازاقستان جازۋشىلار وداعىنىڭ توراعاسى ۇلىقبەك ەسداۋلەت, ۇلتتىق كىتاپحانا ديرەكتورى جانات سەيدۋمانوۆ, رەسەي مەملەكەتتىك كىتاپحاناسىنىڭ ديرەكتورى ۆ.دۋدا, يۋنەسكو وكىلدەرى كىتاپحانا مەن كىتاپحاناشىنىڭ قوعامداعى رولىنە قاتىستى ماڭىزدى جايتتارمەن ءبولىستى.
ەكى كۇنگى سەز اياسىندا سالادا شەشىلۋگە ءتيىستى كوپتەگەن ماسەلەلەر نازارعا الىنىپ, كىتاپحانا جەلىسىنىڭ ساپالى ادامي كاپيتالدى قالىپتاستىرۋداعى جانە قوعامدىق سانانى جاڭعىرتۋداعى ءرولى مەن ورنى, كىتاپحانا سالاسىن دامىتۋ, تسيفرلاندىرۋ جۇيەسىندەگى كىتاپحانالار, ارنايى كىتاپحانالاردى ساندىق ورتاعا ينتەگراتسيالاۋ جانە زاماناۋي فورماتتا دامىتۋ سياقتى وزەكتى تاقىرىپتار قوزعالدى.
ەلۆيرا سەرىكقىزى,
«ەگەمەن قازاقستان»
الماتى
