بيىل العاشقى 74 تۇلەك وقۋىن ءبىتىردى. ولاردىڭ 43-ءى ماگيستراتۋرادا وقۋلارىن جالعاستىرادى. 14-ءى وبلىستىڭ ءىرى كاسىپورىندارىنا – «سكز-ۋ» جشس, «قىزىلوردا جارىعى» جشس, «انسار سەرۆيس» جشس, «تەپلوتەحنيك» جشس-نا, مامانداندىرىلعان مەملەكەتتىك مەكەمەلەرگە – يندۋستريالىق-يننوۆاتسيالىق دامۋ, ەنەرگەتيكا جانە تۇرعىن ءۇي-كوممۋنالدىق شارۋاشىلىعى باسقارمالارى مەن جاستار رەسۋرستىق ورتالىعىنا جانە تاعى باسقا جۇمىستارعا ورنالاستىرىلدى.
قايبىر جىلى وزبەكستانمەن شەكتەسەتىن اۋدانداعى جوعارى وقۋ ورنىنا جولىمىز تۇسكەن. بۇرىن اسحانا بولعان ورتالىقتان ينستيتۋت اشقان ازامات وقىتۋشىلاردى, پروفەسسورلاردى وزبەكستاننان الدىرامىن دەگەن ەدى. شىندىعىندا, ولار ساباق بەرىپ تە جارىتپايدى. وقۋ ورنىن ۇستاپ تۇرۋ, الەۋەتىن كوتەرۋ ءۇشىن تىزىمگە قوسقان, جالاقىسىن بەلگىلەگەن. كەلسە دە ءبارىبىر, كەلمەسە دە ءبارىبىر. جوعارى وقۋ ورنى تالابىنا ۇستىندەگى لىپاسى كەلمەيتىن سول وقۋ ورنى جابىلعانىمەن, اقشاسىن تولەسەڭ ساباققا كەلمەسەڭ دە ديپلومدى قولىڭا بەرەتىن ءبىلىم وشاقتارى ءالى دە كوپ. وتكەندە ەلباسى ۇكىمەت باسشىسىن قابىلداعاندا ءبىلىم سالاسىنىڭ سىن كوتەرمەيتىندىگىن ايتتى. مەملەكەت باسشىسى جوعارى وقۋ ورىندارىنداعى بىلىقتى جويۋ جونىندە تاپسىرما بەرگەنىمەن, ءالى شەشىمىن تاپپاعان ماسەلەلەر جوق ەمەس.
ال رەسەيدىڭ ەڭ ءىرى ەكى قالاسىندا وقىپ جاتقان جاستار بىزدەگى كودەدەي كوپ ماماندىقتارعا ەمەس, اۋاداي قات تەحنيكالىق ماماندىقتارعا, سىر ءوڭىرىن وركەندەتۋ ءۇشىن كەرەك ماماندىقتارعا ماشىقتانىپ جاتىر. قىزىلوردادا كەلەسى جىلى تاعى 150 تۇلەك وقۋىن بىتىرەدى.
وبلىس اكىمى قىرىمبەك كوشەرباەۆ العاشقى تۇلەكتەردى قابىلداپ, اق تىلەگىن جەتكىزدى.
– قۇرمەتتى ارىپتەستەر! سىزدەر بۇگىندە مەنىڭ ايماق, ەل دامۋىنا ەتەنە ۇلەس قوساتىن بىلىكتى مامان, ەڭبەك ەتۋشى ۇزەڭگىلەس ارىپتەسىمە اينالدىڭىزدار. اتا-بابامىز «تۋعان جەرگە تۋىڭدى تىك» دەپ بەكەر ايتپاعان, ەلباسىمىز دا «پاتريوتيزم – كىندىك قانىڭ تامعان جەرىڭە, وسكەن اۋىلىڭا, قالاڭ مەن وڭىرىڭە, ياعني تۋعان جەرىڭە دەگەن سۇيىسپەنشىلىكتەن باستالادى», دەپ ايتىپ كەلەدى. مەن دە ءوز كەزەگىندە «تۋعان جەرگە تاعزىم ەتۋ – پارىزىم, تۋعان جەرگە قىزمەت ەتۋ – قارىزىم» دەگەن ۇراندى ۇستانامىن. سوندىقتان ءبىلىم الىپ, بەلگىلى ءبىر ماماندىق يەسى اتانىپ, تۋعان جەرلەرىڭە ورالعان قادامدارىڭىز وڭ بولسىن دەپ تىلەيمىن, – دەدى ايماق باسشىسى.
سالتاناتتى جيىندا تۇلەكتەر مەن ولاردىڭ اتا-انالارى مەكتەپ بىتىرگەننەن كەيىن رەسەيدىڭ ەڭ ۇزدىك تەحنيكالىق جوعارى وقۋ ورىندارىندا ءبىلىم الۋعا جانە جۇمىسقا ورنالاسۋ مۇمكىندىگىن جاساعان وبلىس باسشىلىعىنا ريزاشىلىقتارىن ءبىلدىردى.
– مۇنداي مۇمكىندىك باسقا ايماقتاردا بولماعانىن اتاپ وتكىم كەلەدى. ماسكەۋ مەن پەتەربۋرگتە كوبىنەسە سىربويىلىق جاستار وقۋدا. باسقا ستۋدەنتتەر بىزگە جاسالعان ماتەريالدىق جانە رۋحاني قولداۋلارىڭىزعا قىزىعا قارايتىن. قازىر ءتىپتى ماسكەۋگە ارزان اۋە رەيستەرى ۇيىمداستىرىلعان. سونداي-اق وقىپ جۇرگەن كەزدىڭ وزىندە «ارالتۇز», «بايكەن-U», «قىزىلوردا جارىعى», «ابزال جانە ك» سياقتى ءىرى كومپانيالار جۇمىس ۇسىنا باستادى. مەن «قىزىلوردا جارىعى» جشس-ىندە جۇمىس ىستەيمىن. اتا-انام مەن وبلىس باسشىلىعىنىڭ ءۇمىتىن اقتاپ, العان ءبىلىمىمدى تۋعان جەردىڭ يگىلىگىنە جاراتسام دەيمىن, – دەيدى رەسەيدە وقۋ ءبىتىرىپ, «قىزىلوردا جارىعى» جشس-نە جۇمىسقا ورنالاسقان ەلامان مەڭدىقۇل.
كەزدەسۋدە تۇلەكتەر وبلىس اكىمىنە «وردا» جاستار قوعامدىق بىرلەستىگىنىڭ كۋالىگىن تابىستادى. بۇل ۇيىم بيىلعى جىلدىڭ تامىز ايىندا سىربويىلىق جاستاردىڭ ماسەلەلەرىن شەشۋگە جانە رەسەيلىك جوعارى وقۋ ورىندارىنداعى ستۋدەنتتەر مەن تۇلەكتەردى بىرىكتىرۋگە ارنالىپ قۇرىلعان بولاتىن.
بيىل 60-تان استام مەكتەپ تۇلەگى ماسكەۋ ۇلتتىق تەحنولوگيالىق زەرتتەۋلەر ۋنيۆەرسيتەتىنە, ك.ا.تيميريازەۆ اتىنداعى رەسەي مەملەكەتتىك اگرارلىق ۋنيۆەرسيتەتىنە, سانكت-پەتەربۋرگ مەملەكەتتىك يندۋستريالىق تەحنولوگيالار جانە ديزاين ۋنيۆەرسيتەتىنە, يننوپوليس ۋنيۆەرسيتەتىنە جانە ماسكەۋ ەنەرگەتيكا ينستيتۋتىنا ءتۇستى.
سونىمەن بىرگە, سىربويىلىق جاستارعا مامانداندىرىلعان «كيبەرقاۋىپسىزدىك» جانە «پروتسەستەردى ماتەماتيكالىق مودەلدەۋ» سالاسىندا م.ۆ.لومونوسوۆ اتىنداعى ماسكەۋ مەملەكەتتىك ۋنيۆەرسيتەتىنە جىل سايىن 20 گرانت جانە ەۋرازيالىق ەكونوميكالىق قوعامداستىقتىڭ پارلامەنتارالىق اسسامبلەياسى اياسىنداعى جوعارى وقۋ ورىندارىنا گرانت بولىنەدى.
اقپاراتتاندىرۋ مەن تەحنولوگيالاردى ەنگىزۋ بويىنشا تاتارستان رەسپۋبليكاسىنداعى يننوپوليس ۋنيۆەرسيتەتىندە اقپاراتتىق جانە تسيفرلى تەحنولوگيالار بويىنشا جىل سايىن قىزىلوردالىق تۇلەكتەردىڭ ءبىلىم الۋىنا كەلىسىم جاسالعان. الداعى ۋاقىتتا «سكولكوۆو» يننوۆاتسيالىق ورتالىعىمەن ارىپتەستىك ورناتۋ جوسپارلانىپ وتىر.
سونداي-اق از قامتىلعان جانە كوپ بالالى وتباسىلاردان شىققان 900-گە جۋىق تۇلەك وبلىس اكىمىنىڭ ءبىلىم گرانتىنا يە بولدى. 2018 جىلى گرانت سانى ەكى ەسەگە ارتتى, ونىڭ 70 پايىزى IT ماماندىقتارىنا بولىنەدى.
بيىلعى جىلى وبلىس اكىمىنىڭ 116 ستيپەندياتى وقۋىن ءبىتىردى.
بۇگىندە رەسەيدىڭ جوعارى وقۋ ورىندارىندا وقىپ جاتقان جاستار وبلىس اكىمىنىڭ تىكەلەي قاداعالاۋىندا. ءوڭىردى تۇلەتۋ, ەلدىڭ ءال-اۋقاتىن كوتەرۋ زامان تالابىنا ساي ءبىلىم الىپ جاتقان سول جاستاردىڭ قولىندا ەكەندىگىن بىلەتىن ءوڭىر باسشىسى, ماعجان اقىن ايتقانداي, «مەن جاستارعا سەنەمىن» دەپ وتىر.
باقتيار تايجان,
«ەگەمەن قازاقستان»
قىزىلوردا وبلىسى
