كوز مايىن تاۋىسىپ, تىرنەكتەپ جينالعان ەكسپوناتتاردىڭ بىرقاتارى سولتۇستىكقازاقستاندىقتاردىڭ نازارىنا ۇسىنىلىپ, وتكەن عاسىرلار قويناۋىنا ساياحات جاساپ قايتقانداي ۇلكەن اسەر الدى. مۋزەيدىڭ «ولكەنىڭ ەجەلگى تاريحى», «وتكەننىڭ تىلسىم تىرشىلىگى», «تۋعان جەر تاريحى», «ولكە حالىقتارىنىڭ مادەنيەتى مەن تۇرمىسى», «قوستاناي وبلىسىنىڭ تابيعات بايلىقتارى» سەكىلدى ارحەولوگيالىق, پالەونتولوگيالىق, وسى زامانعى تاعى باسقا زالدار كەلۋشىلەردىڭ نازارىن ايرىقشا اۋدارىپ, ءوڭىردىڭ شەجىرەلى تاريحىنان تەرەڭ سىر شەرتەدى.
– جاسىراتىنى جوق, بۇگىنگى جاستار وزدەرى تۇراتىن ءوڭىردىڭ تاريحي-مادەني مۇرالارى جايلى تاراتا ايتقانىمەن, وزگە ايماقتار تۋرالى بىلەرى از. وسى ورايدا «رۋحاني قازىنا» باعدارلاماسى اياسىندا ۇيىمداستىرىلىپ وتىرعان كوشپەلى كورمە وسى ولقىلىقتىڭ ورنىن تولتىرىپ, جاس بۋىنعا بەرەر تاربيەسى زور بولماق. ەلباسىمىز باعدارلامالىق ماقالاسىندا اتاپ كورسەتكەندەي بابالارىمىز عاسىرلار بويى ۇشقان قۇستىڭ قاناتى تالىپ, جۇگىرگەن اڭنىڭ تۇياعى توزاتىن ۇلان-عايىر ايماقتى ۇلتتىڭ بولاشاعى, كەلەر ۇرپاق ءۇشىن قورعاپ, ميراس ەتتى. ولاي بولسا, قازاقستاننىڭ ءار تۇكپىرى– ءبارىمىز ءۇشىن ىستىق, كيەلى اتامەكەنىمىز. قوستاناي–تاس, قولا, تەمىر داۋىرلەرىنە جاتاتىن ارحەولوگيالىق ەسكەرتكىشتەرىمەن, تابيعات لاندشافتارىمەن, كەن, قازبا بايلىقتارىمەن ەرەكشەلەنەتىن وبلىس ,–دەيدى مەيماندار.
قازاق حالقىن وقۋ-بىلىمگە شاقىرعان ىبىراي ءالتىنساريننىڭ 1884 جىلى جارىق كورگەن «قازاق حرەستوماتياسىنىڭ» تۇننۇسقاسىن كورۋ مۇمكىندىگى تۋدىرىلعانىنىڭ ءوزى نەگە تۇرادى؟ بابامىز اتىنداعى مەموريالدىق مۋزەيدىڭ ديرەكتورى مارعۇلان وسپانوۆتىڭ ايتۋىنشا ساۋاتسىزدىقتى جويۋ ماقساتىمەن قازاق ساحاراسىندا تۇڭعىش رەت دالا قوڭىراۋىن سوعىپ, مەكتەپ اشقان ۇلت ۇستازى, وتباسى, اۋلەتى تۇتىنعان تۇرمىستىق زاتتار, ماڭىزدى قۇجاتتار, فوتولار اسا قۇندى جادىگەرلەر سانالادى. 1991 جىلى تۇرعىزىلعان مەموريالدىق مۋزەي قورىندا بۇگىندە 12 مىڭنان استام ەكسپونات بار.
كوشپەلى كورمە ءداستۇرلى مۇراجاي ءىسىن جاڭعىرتۋ, تسيفرلىق جۇيەگە كوشۋ, ەسكى قۇجاتتاردى قالپىنا كەلتىرۋ, عىلىمي جۇمىستاردى بىرىزدىلەندىرۋ شارالارى جۇيەلىلىكپەن جۇرگىزىلىپ, جاڭاشا ادىستەردىڭ كەڭىنەن قولدانىلاتىنىن دا ايقىن بايقاتتى.
ءومىر ەسقالي,
«ەگەمەن قازاقستان»
سولتۇستىك قازاقستان وبلىسى
