ء ىس-شارا ەكى ەلدىڭ جاستار ۇيىمدارى اراسىندا ءوزارا قارىم-قاتىناستى كۇشەيتۋ, تاجىريبە الماسۋ, سونداي-اق الەۋمەتتىك ماڭىزى بار جوبالاردى جۇزەگە اسىرۋ سالاسىندا ىنتىماقتاستىقتى تالقىلاۋ ماقساتىندا وتكىزىلدى. فورۋم قاتىسۋشىلارىنا العى ءسوز سويلەگەندەر قاتارىندا قازاقستان رەسپۋبليكاسى قوعامدىق دامۋ مينيسترلىگىنىڭ جاستار جانە وتباسى ىستەرى كوميتەتى توراعاسىنىڭ مىندەتىن اتقارۋشى ا. ورالوۆ, جاستار ىستەرى جونىندەگى فەدەرالدى اگەنتتىگىنىڭ حالىقارالىق قىزمەتى ءبولىمىنىڭ باستىعى د. يۆانوۆ, الماتىداعى رەسەي فەدەراتسياسىنىڭ باس كونسۋلدىعىنىڭ باسشىسى س. سەمەنوۆ بولدى.
ا. ورالوۆ ءوز سوزىندە رەسەي مەن قازاقستاننىڭ ودان ءارى ستراتەگيالىق دامۋى اياسىندا مەملەكەتتىك جاستار ساياساتىنىڭ ماڭىزدى ورىن الاتىنىن اتاپ ءوتتى. «جاستاردى قالىپتاسۋ جانە دامۋ كەزەڭىندە قولداۋ, جاس ۇرپاقتىڭ قوعامعا كىرىگۋىنە جاعداي جاساۋ – ماڭىزدى مەملەكەتتىك مىندەت. زاماناۋي ەكونوميكالىق جانە ساياسي جاعدايلار ەلىمىزدىڭ جاستارىنا وزدەرىنىڭ ءتيىمدى باستامالارى مەن شىعارماشىلىعىن جۇزەگە اسىرۋعا مۇمكىندىك تۋعىزدى. جاستار ساياساتى مەن ازاماتتىق قوعامدى دامىتۋداعى ۆولونتەرلەردىڭ ۇلەسىن اتاپ ايتقان ءجون, سونداي-اق ارىپتەستەرىمدى رەسەيدەگى ەرىكتى جىلىمەن قۇتتىقتاعىم كەلەدى», - دەدى ا. ورالوۆ.
سونىمەن قاتار, جاستار جانە وتباسى ىستەرى كوميتەتى توراعاسىنىڭ مىندەتىن اتقارۋشى قاتىسۋشىلاردى ەكى جاقتى ىنتماقتاستىقتى دامىتۋ بويىنشا جۇرگىزىلىپ جاتقان جۇمىسپەن تانىستىرىپ ءوتتى.
«جەرگىلىكتى اتقارۋشى ورگاندار دەڭگەيىندە ءوزارا ءىس-قيمىلدىڭ ءتيىمدى ۇلگىلەرى بار. قازاقستانمەن شەكارالاس وبلىستاردا جاستار فورۋمدارى, سلەتتەر, كونفەرەنتسيالار وتكىزىلەدى. جەتەكشى رەسپۋبليكالىق جاستار ۇيىمدارىنىڭ رەسەيلىك جاستار وداعىمەن, جاس ۇلانمەن, جاستار قوعامدىق پالاتاسىمەن, رەسەيلىك ستۋدەنتتىك جاساقتارمەن ءوزارا قارىم-قاتىناس ورناتىلعان», - دەپ ايتتى ا. ورالوۆ.
ءىس-شارا بارىسىندا جاستار ۇيىمدارى وكىلدەرى, ۆولونتەرلەر, جاس ماماندار, ستۋدەنتتەر قاتارىنان قاتىسۋشىلار جوبالارمەن تانىستىرىپ, تۋريزم, ۆولونتەرلىك, جاستار كاسىپكەرلىگى سالالارىنداعى تاجىريبەسىمەن ءبولىستى.
«جاستار» عىلىمي-زەرتتەۋ ورتالىعىنىڭ ديرەكتورى ت. قاليەۆ جانە پوستكەڭەستىك كەڭىستىكتە قوعامدىق-ساياسي ۇردىستەردى زەردەلەۋ جونىندەگى اقپاراتتىق-تالدامالىق ورتالىعىنىڭ باس ديرەكتورى د. چيجوۆا ىنتىماقتاستىقتى دامىتۋ پەرسپەكتيۆالارى جونىندە ۇسىنىستارىن ايتتى.
سونداي-اق, ءىس-شارا اياسىندا قازاقستان جانە رەسەي جاستار ۇيىمدارىنىڭ: قازاقستان جاستارىنىڭ كونگرەسى, جاستاردىڭ ىسكەرلەر كەڭەسى رەسەي فەدەراتسياسىنىڭ جاستار ۇكىمەتتەرى قاۋىمداستىعىمەن جانە تاتارستان رەسپۋبليكاسىنىڭ جاستار ۇكىمەتى اراسىنداعى ىنتىماقتاستىق تۋرالى مەموراندۋمدارعا قول قويۋ ءراسىمى ءوتتى.
رەسەي فەدەراتسياسى دەلەگاتسياسىنىڭ قۇرامىندا 36 ادام – مەملەكەتتىك ورگاندار مەن جاستار ۇيىمدارىنىڭ وكىلدەرى, ۆولونتەرلەر, جاستارمەن جۇمىس ىستەيتىن ماماندار, جاس كاسىپكەرلەر, ستۋدەنتتەر بار. تمد-عا قاتىسۋشى مەملەكەتتەردىڭ جاستار فورۋمى 2018 جىلدىڭ 14 قىركۇيەگىنە دەيىن جالعاسادى.
