– مۇنداي كورمەلەرگە قاتىسۋ – ءاربىر ونەرلى جاس ءۇشىن وزىندىك ەمتيحان ىسپەتتى. ارنايى كوميسسيا جۇمىستاردى ىرىكتەگەنىمەن, سۋرەتشىلەرگە قاتاڭ تالاپتار قويىلعان جوق. كورمەدە سۋرەتشىلەر ءۇشىن وزگە دە ارىپتەستەرىنىڭ تۋىندىلارى قاتار قويىلدى. وسىنداي سالىستىرۋلار قىلقالام يەلەرىنە ءوز جۇمىستارىنا باسقا كوزبەن قاراپ, شەبەرلىكتەرىن شىڭداۋعا كومەكتەسەدى. قازىرگى تاڭدا سۋرەتشىلەر رەاليزمدى وتە سيرەك سالاتىن بولدى. ولار كوبىنە ءوزىنىڭ ىشكى جان دۇنيەسىنە كوز سالادى: سۋرەتتەردە ستيليزاتسيا كوپ, قيال-عاجايىپ سيۋجەتتەر ءجيى كەزدەسەدى. تۋىندىلارىن كوپشىلىك نازارىنا ۇسىنباس بۇرىن, ولاردىڭ ارقايسىسى ءوزىن-ءوزى سىرتتاي باعالاۋلارى ءتيىس, – دەيدى ونەرتانۋشى ناتاليا يۆانينا.
كورمەدەگى ەل نازارىن اۋدارعان تۋىندىنىڭ ءبىرى – بۇقار جىراۋعا ارنالعان گيپستەن جاسالعان مۇسىنشە بولدى. ول اراب جازباسىمەن جانە اشەكەيلەرمەن بەزەندىرىلگەن حاننىڭ باس كيىمى بەينەسىندە جاسالعان.
– بۇل يدەيانى جۇزەگە اسىرۋ ءۇشىن ءۇش جىل بويى اقپارات جيناپ, تاريحشىلارمەن, يمامدارمەن كەڭەستىم. ءمۇسىننىڭ نەگىزگى ورتاڭعى تىك بولىگى جەتى حاننىڭ مورىمەن ارلەنگەن, ول بۇقار جىراۋ جەتى حاننىڭ كەڭەسشىسى بولعانىن بىلدىرەدى. بارلىق مورلەر تامشى ىسپەتتەس – ول قان تامشىسىن بىلدىرەدى. وسىنداي ءپىشىندى ءمور تەك حاندا عانا بولاتىن, سەبەبى حان عانا سوعىستى باستاۋعا بۇيرىق بەرە العان. ءمۇسىننىڭ قىرلارىندا اراب تىلىندە سەگىز جازبا بار – ول مۇسىلماننىڭ باستى سەگىز قاسيەتى. ەڭ جوعارى جاعىندا دالا بۇركىتى بەينەلەنگەن, ءبىر قىرىنان قاراسا بارلىق مۇسىلمانداردىڭ بەلگىسى – جارتى ايشىق سەكىلدى كورىنەدى, – دەيدى ءمۇسىن اۆتورى امانتاي اكىشەۆ.
قايرات ءابىلدا,
«ەگەمەن قازاقستان»
قاراعاندى
