قازىرگى ۋاقىتتا ءتۇرلى سوزىلمالى سىرقاتتارمەن ديسپانسەرلىك ەسەپتە تۇراتىن ازاماتتار تەگىن ءدارى-دارمەكپەن قامتاماسىز ەتىلەدى. ە.ءبىرتانوۆتىڭ ايتۋىنشا, ەلىمىزدە تۇرعىنداردى ءدارى-دارمەكپەن تەگىن جانە جەڭىلدىكپەن قامتاماسىز ەتۋ جۇيەسى دەنساۋلىق ساقتاۋدى رەفورمالاۋ مەن دامىتۋدىڭ 2005-2010 جىلدارعا ارنالعان مەملەكەتتىك باعدارلاماسى شەڭبەرىندە 2005 جىلدان باستالعان. بۇگىندە دارىلىك زاتتاردىڭ 400-دەن اسا ءتۇرى 49 نوزولوگيا بويىنشا جۇزەگە اسىرىلىپ, دارىلىك زاتتاردىڭ جالپى نارىعى جيىنتىعىندا 2017 جىلى 458,6 ملرد تەڭگەنى قۇراعان كورىنەدى. اتاپ وتەر بولساق, ونىڭ ىشىندە 181,2 ملرد تەڭگە نەمەسە 40 پروتسەنتى رەسپۋبليكالىق جانە جەرگىلىكتى بيۋدجەت قارجىلاندىرىلاتىن تەگىن مەديتسينالىق كومەك كورسەتۋ ءۇشىن دارىلىك زاتتار ساتىپ الۋعا جۇمسالعان. 2010 جانە 2018 جىلدار ارالىعىندا عانا مەديتسينالىق پرەپاراتتاردى بىرىڭعاي ديستريبيۋتور ارقىلى ساتىپ الۋ 31,3 ملرد تەڭگەدەن 196,6 ملرد تەڭگەگە دەيىن وسكەن. مينيستر بريفينگ بارىسىندا 2018 جىلعا دارىلىك زاتتار مەن مەديتسينالىق ماقساتتاعى بۇيىمداردى ورتالىقتاندىرىپ ساتىپ الۋدىڭ مارتەبەسىنە توقتالىپ ءوتتى.
ء مالىم بولعانداي, دارىلىك پرەپاراتتارمەن قامتاماسىز ەتۋشى بىرىڭعاي ديستريبيۋتوردىڭ 2018 جىلعا ارنالعان تىزىمىندە دارىلىك زاتتار مەن مەديتسينالىق ماقساتتاعى بۇيىمداردىڭ 1 117 اتاۋى بولسا, ونىڭ ىشىندە 633 اتاۋى ستاتسيونارلىق كومەك كورسەتۋگە, ال 484 اتاۋ امبۋلاتوريالىق ءدارى-دارمەكپەن قامتاماسىز ەتۋگە قاراستىرىلعان كورىنەدى. وسىلايشا, بارلىعى «سق – فارماتسيا» جشس قويماسىنا كەشەگى كۇنگى جاعداي بويىنشا دارىلىك زاتتار مەن مەديتسينالىق ماقساتتاعى بۇيىمداردىڭ 1069 اتاۋى جەتكىزىلگەن. بۇل رەتتە, س ۆيرۋستىق گەپاتيتىن ەمدەۋگە ارنالعان «سوفوبۋۆير» پرەپاراتىن جەتكىزۋ وسى پرەپاراتتىڭ بۇۇ دامۋ باعدارلاماسى ارقىلى ساتىپ الىنۋىنا بايلانىستى قىركۇيەك ايىندا كۇتىلۋدە. «2018 جىلعا ارنالعان امبۋلاتوريالىق دەڭگەيدەگى دارىلىك زاتتاردى جىبەرۋ 8 وڭىردە, اتاپ ايتقاندا, اتىراۋ, الماتى, قاراعاندى, پاۆلودار, شىعىس قازاقستان, سولتۇستىك قازاقستان وبلىستارىندا, استانا جانە الماتى قالالارىندا مەديتسينالىق-سانيتارلىق العاشقى كومەك مەكەمەلەرى جانىنداعى ءدارىحانالار ارقىلى جۇزەگە اسىرىلۋدا. بۇل دارىلىك زاتتاردىڭ قولجەتىمدىلىگىن قامتاماسىز ەتۋ جانە حالىقتىڭ مەديتسينالىق كومەكپەن قاناعاتتانۋ دەڭگەيىن ارتتىرۋ ساياساتىنا سايكەس كەلەدى. قالعان 8 وڭىردە پرەپاراتتاردى بوساتۋ, دارىلىك زاتتاردى ەسەپكە الۋ جانە ىسكە اسىرۋ قىزمەتىن ساتىپ الۋ تەتىگىمەن بولشەك ساۋدا ءدارىحانالارى ارقىلى ىسكە اسىرىلادى. دارىلىك زاتتار مەن مەديتسينالىق ماقساتتاعى بۇيىمداردى حالىققا مساك ۇيىمدارى جانىنداعى ءدارىحانالار ارقىلى بوساتۋ بيۋدجەت قاراجاتىن 6,0 ملرد تەڭگەگە ۇنەمدەدى. تيىسىنشە, حالىقتى تەگىن مەديتسينالىق پرەپاراتتارمەن قامتۋ ۇلعايدى», دەدى ۆەدومستۆو باسشىسى.
بريفينگتە قانت ديابەتىمەن سىرقاتتاناتىن اۋرۋلاردى ءدارى-دارمەكپەن قامتاماسىز ەتۋ ءۇشىن بىرىڭعاي ديستريبيۋتوردىڭ 2018 جىلعا ارنالعان تىزىمىنە ءدارى-دارمەك پەن مەديتسينالىق بۇيىمداردىڭ 48 اتاۋى كىرەتىنى بەلگىلى بولدى. بۇگىنگى تاڭدا قانت ديابەتىمەن سىرقاتتاناتىن ادامداردى ەمدەۋ ءۇشىن ءدارى-دارمەك پەن مەديتسينالىق بۇيىمداردىڭ بارلىق اتاۋى ساتىپ الىنعانى ايتىلدى. ءمينيستردىڭ سوزىنە قاراعاندا, جىل سوڭىنا دەيىن 3,5 ملن ناۋقاس تەگىن ءدارى-دارمەكپەن قامتاماسىز ەتىلۋى ءتيىس. بۇل ورايدا وتكەن جىلدان باستاپ, بۇكىل تەگىن ءدارى-دارمەكتى ساتىپ الۋ پروتسەسى ورتالىقتاندىرىلىپ, بارلىق دارىلەر «سك-فارماتسيا» كومپانياسى ارقىلى ساتىلىپ الىناتىن بولادى. «بىرنەشە تەحنيكالىق ماسەلەلەر شەشىلىپ, كونكۋرستاردى ونلاين تۇردە اشىق وتكىزدىك. اشىقتىق نەگىزىندە باعالار تومەن ءتۇستى. ناتيجەسىندە, 26 ملن تەڭگە ۇنەمدەلدى. بۇل قاراجات قوسىمشا ءدارى الۋعا جۇمسالدى جانە قوسىمشا 20 مىڭنان استام ناۋقاسقا تەگىن ءدارى-دارمەك بەرىلدى. بىرىڭعاي ديستريبيۋتوردىڭ 2019 جىلعا ارنالعان ءتىزىمى 2018 جىلعى شىلدەدە بەكىتىلدى. تەندەر مەملەكەتتىك ساتىپ الۋ پورتالىندا جاريالاندى جانە ەلەكتروندى فورماتتا جۇرگىزىلەدى. ساتىپ الۋ قورىتىندىسى بيىل 17 قازاندا جاسالادى جانە بىرىڭعاي ديستريبيۋتوردىڭ قويماسىنا جەتكىزۋ قاراشا-جەلتوقسان ايلارىندا كۇتىلۋدە. قازىرگى زامانعى ەمدەۋ سحەماسىنا سايكەس تۋبەركۋلەز, ايتۆ نوزولوگيالارى بويىنشا ءدارى-دارمەكتىڭ جاڭا اتاۋلارى قوسىلدى», دەدى مينيستر. وسى رەتتە ءدارى-دارمەك پەن مەديتسينالىق بۇيىمداردىڭ ساپاسىن باقىلاۋدىڭ حالىقارالىق ستاندارتتارعا سايكەستىكپەن اككرەديتتەلگەن دارىلىك-زاتتاردى ساراپتاۋ ۇلتتىق ورتالىعىنىڭ زەرتحانالارىندا جۇزەگە اسىرىلاتىنىن اتاپ وتكەن ءجون.
بريفينگتە جۋرناليستەر ۆەدومستۆو باسشىسىنا تەگىن ءدارى-دارمەكتىڭ حالىققا جەتكىزىلمەي قالۋ سەبەپتەرى جايلى سۇراق قويدى. ە.ءبىرتانوۆ دەنساۋلىق ساقتاۋ باسقارمالارى مەن ەمحانالار ءدارى-دارمەك كولەمىن دۇرىس جوسپارلاي الماي, ناۋقاستاردىڭ ازايۋى نەمەسە كوبەيۋى فاكتورىن ەسكەرمەگەندىگىن العا تارتتى. دارىلىك زاتتاردىڭ تاۋارلىق اتاۋىنىڭ وزگەرۋى, تۇراقتى تۇردە قايتا تىركەۋدەن وتەتىنى دە نازارعا الىنباعان. وسىعان بايلانىستى وڭىرلەر دارىلەرگە دۇرىس تاپسىرىس بەرمەگەن. قازىرگى ۋاقىتتا بارلىق ەمحانالار ەلەكتروندى جۇمىس فورماتىنا اۋىسىپ جاتىر جانە مينيسترلىك ناۋقاستاردىڭ ناقتى سانى مەن قاجەتتى دارىلەرىن ونلاين باقىلاۋعا الدى.
انار تولەۋحانقىزى,
«ەگەمەن قازاقستان»
