ر. ۆاسيلەنكو «الەمدەگى جاڭا كوپپوليارلى مەدياتسيا - ءۇمىت پەن شىندىق اراسىندا» پانەلدىك سەسسياسىنداعى سوزىندە فورۋمعا قاتىسۋشىلاردى كوپجاقتى ديپلوماتيانى دامىتۋعا جانە ىنتىماقتاستىققا, سونداي-اق جانجالداردى بەيبىت جانە الدىن الا رەتتەۋگە باعىتتالعان قازاقستاننىڭ سىرتقى ساياساتىنىڭ باسىمدىقتارى تۋرالى حاباردار ەتتى.
وسىعان بايلانىستى قازاقستان تاۋەلسىزدىك العان ساتتەن باستاپ حالىقارالىق قاۋىپسىزدىكتى نىعايتۋعا, سونىمەن قاتار شيەلەنىستى جاعدايلاردى ساياسي جانە ديپلوماتيالىق تاسىلدەر ارقىلى بەيبىت جولمەن شەشۋگە ەلەۋلى ۇلەس قوسىپ وتىرعانىن اتاپ ءوتتى.
قازاقستان ديپلوماتى استانانىڭ شيەلەنىس ايماقتارىنداعى ماسەلەلەردى حالىقارالىق قۇقىقتىڭ نورمالارىنا سايكەس ىقپالدى حالىقارالىق تەتىكتەردى قابىلداۋ ارقىلى بەيبىت جولدارمەن شەشۋدى قولدايتىنىن باسا ايتتى. قازاقستاندى الەمدە وڭىرلىك مەدياتور رەتىندەگى ءرولىن جوعارى دەڭگەيدە مويىنداۋى ءبىزدىڭ ەلىمىزدىڭ ەۋروپاداعى قاۋىپسىزدىك جانە ىنتىماقتاستىق ۇيىمىنا (ەقىۇ) جانە يسلام ىنتىماقتاستىعى ۇيىمىنا (يىۇ) توراعالىق ەتۋى, سونداي-اق پرەزيدەنت نۇرسۇلتان نازارباەۆتىڭ ازياداعى ءوزارا ىقپالداستىق جانە سەنىم شارالارى جونىندەگى كەڭەستى (اوسشك) شاقىرۋ تۋرالى باستاماسىن الەمدىك قوعامداستىقتىڭ قولداۋى بولدى.
«پرەزيدەنتىمىزدىڭ بىتىمگەرشىلىك نەگىزىندە ونىڭ جەكە كوزقاراسى مەن ۇستانىمدارى ارقاۋ بولادى. ونىڭ كۇش-جىگەرىنىڭ ارقاسىندا ءارتۇرلى ەلدەر اراسىنداعى قارىم-قاتىناستارداعى شيەلەنىستەر ازايۋدا», - دەدى ر.ۆاسيلەنكو.
پرەزيدەنت ن. نازارباەۆتىڭ جەكە مەدياتسيالىق جىگەرىنىڭ ارقاسىندا 2016 جىلى رەسەي مەن تۇركيا كوشباسشىلارى اراسىنداعى قارىم-قاتىناس قالپىنا كەلتىرىلدى جانە 2017 جىلدىڭ باسىنان باستاپ سيريا بويىنشا استانا پروتسەسى ىسكە قوسىلدى.
وسى رەتتە, استانا كەلىسسوزدەرى جيىنعا قاتىسۋشىلاردىڭ ۇلكەن قىزىعۋشىلىعىن تۋدىردى. قازاقستان ديپلوماتى قازىرگى كەزگە دەيىن ۇيىمداستىرىلعان كەلىسسوزدەردىڭ ون راۋندىنىڭ باستى جەتىستىگى – جاۋىنگەرلىك ارەكەتتەردى توقتاتۋ ءتارتىبىن ءۇش جاقتى باقىلاۋ تەتىگىن ورناتۋ, سيرياداعى شيەلەنىستى السىرەتى ايماقتارىن قۇرۋ, سونداي-اق ۇستالعاندارمەن الماسۋ, قازا تاپقانداردى تاپسىرۋ جانە حابارسىز كەتكەن ادامداردى ىزدەۋ بويىنشا جۇمىس توپتارىنىڭ قۇرۋ ەكەندىگىن اتاپ ءوتتى.
ورتالىق ازياداعى حالىقارالىق قاتىناستار تۋرالى جالپى ايتا كەلە, ديپلومات قازاقستان وڭىردەگى بارلىق اكتورلار اراسىنداعى سىندارلى قارىم-قاتىناستى دامىتۋدى جاقتايتىنىن, وتكەن «ۇلكەن ويىنعا» قاراعاندا «بارلىعى ءۇشىن ۇلكەن ۇتىس» پاراديگماسىنىڭ ناقتىلىعى مەن ارتىقشىلىعىنا سەنىمدى بولىپ وتىرعانىن اتاپ ءوتتى.
وتىرىس وعان قاتىسقان بارلىق مەملەكەتتەردىڭ وڭىرارالىق ءوزارا ءىس-قيمىلعا جانە ۇسىنىلعان فورماتتاعى بەلسەندى ديالوگتى جالعاستىرۋعا, قازاقستانمەن ىنتىماقتاستىقتى ارتتىرۋعا ۇلكەن قىزىعۋشىلىعىن تانىتتى. يران يادرولىق باعدارلاماسى بويىنشا كوپ جىلدىق كەلىسسوزدەرگە تىكەلەي قاتىسقان ەۋروپا سىرتقى ءىس-ارەكەتتەر قىزمەتىنىڭ (ەسۆد) باس حاتشىسى حەلگا شميد پانەلدەگى ءوز سوزىندە «التى قوسۋ ءبىر» فورماتىندا حالىقارالىق توپتىڭ كەلىسسوزدەردى جۇرگىزۋدەگى, سونداي-اق بىرلەسكەن كەشەندى ءىس-قيمىل جوسپارىن (بكقج) يمپلەمەنتاتسيالاۋداعى قر سىندارلى ءرولىن اتاپ ءوتتى. بۇل رەتتە, تۇراقتى الەۋمەتتىك-ەكونوميكالىق دامۋدى قامتاماسىز ەتۋدى قوسا العاندا, وڭىرلىك كۇن تارتىبىندەگى وزەكتى ماسەلەلەردى شەشۋدە ەۋروپا وداعىنىڭ قازاقستانمەن جانە وڭىرمەن ودان ءارى سىندارلى ىنتىماقتاستىعىنىڭ الەۋەتى تۋرالى اتاپ ءوتىلدى.
فورۋم اياسىندا ر. ۆاسيلەنكو مەن ح. شميد اراسىندا جانە بىرقاتار ەۋروپا جانە ازيا ەلدەرىندەگى ارىپتەستەرىمەن ەكىجاقتى كەزدەسۋلەرى ءوتتى. ەۋروپا سىرتقى بايلانىستار قىزمەتى باسشىسىمەن قر مەن ەو اراسىنداعى كەڭەيتىلگەن ارىپتەستىك پەن ىنتىماقتاستىق تۋرالى كەلىسىم شەڭبەرىندە جان-جاقتى ىنتىماقتاستىقتى ودان ءارى نىعايتۋ ماسەلەلەرى, ونىڭ ىشىندە قازاقستان مەن ەو اراسىنداعى ۆيزالىق رەجيمدى جەڭىلدەتۋ پەرسپەكتيۆالارى, سونداي-اق ورتالىق ازيا ەلدەرىمەن قارىم-قاتىناس بويىنشا ەو جاڭا ستراتەگياسىن ازىرلەۋ بارىسى تالقىلاندى.
